Atualità

L’anima te situazions dramatiches sciche tl cuntest de viera sarà tl zënter dl referat “L’anima dla viera – La viera tl’anima“ tenì dal dutor spezialisà te psichiatria y psicoterapia Mario Horst Lanczik ai 27 d’utober dala 19.00 tla Galaria Prisma a Bulsan. La relazion fej pert dla curnisc dla mostra 1915-2015 metuda a jì dala Repartizion Cultura ladina y dal Südtiroler Künstlerbund.

Al tema dla migraziun ti dedichëia la biblioteca provinziala Teßmann da Balsan dui apuntamënc. En vëndres ai 23 d’otober sarál da odëi le film „Io sto con la sposa“, premié plü iadi a Aunejia, y en sabeda ai 24 d’otober gnarál presenté de plü publicaziuns y auturs dla leteratöra africana y asiatica.

Laurada sö dal punt d’odüda scientifich, cun na cornisc musicala nöia y arjignada por la paladina: insciö se mostra sëgn l’opereta „Le scioz da San Jênn”. Dan da püch á i auturs Fonso Willeit, Paul Videsott y André Comploi presenté a La Pli de Mareo la publicaziun nöia de „Le scioz da San Jênn” che é gnüda laurada fora en colaboraziun cun le Museum ladin Ciastel de Tor.

Euforia, pudëi, mputënza y decadënza ntan la viera ie la tematiches prejentedes tla mostra 1915-2015: da udëi iel l’operes premiedes n ucajion dl cuncors artistich sun l centené dla Prima viera mundiela metù a jì dala Repartizion Cultura y Intendënza ladina y dal Südtiroler Künstlerbund. L assessëur Florian Mussner à giaurì la mostra ai 9 de utober tla Galaria Prisma a Bulsan.

Euforia, pudëi, mputënza y decadënza ntan la viera ie la tematiches prejentedes tla mostra 1915-2015. L unirà metù ora l’opres premiedes n ucajion dl cuncors artistich sun l centené dla Prima viera munidela metù a jì dala Repartizion Cultura y Intendënza ladina y l Südtiroler Künstlerbund. L assessëur Florian Mussner giaurirà la mostra ai 9 de utober dla 19.00 tla Galaria Prisma a Bulsan.

Viktoria Savs (nasciüda tl 1899 a Bad Reichenhall, morta a Salzburg tl 1979) ê öna dles soldares austriaches plü conesciüdes dla Gran Vera. Süa storia de vita, atualisada cun documënc nüs, mostra sciöche coraje y patriotism pó se trasformé te fanatism y sënn. La Biblioteca Provinziala dla Teßmann inviëia düc ala presentaziun dl liber ai 13 d’otober.

La revista culturala nöia „NuJ“ é scrita te plü lingac, danter chisc ince por ladin y da ladins, y pita na plataforma de presentaziun a de plü artisć jogn dl Südtirol. Ara vëgn dada fora un n iade al ann cun indöt 3.000 ejemplars. La pröma ediziun é gnüda presentada dan da püch a Urtijëi dal assessur provinzial Philipp Achammer.

N protocol d’acordanza, sotescrit incö (02/10) dal presidënt dla Provinzia Arno Kompatscher y dal vësco Ivo Muser, regolamentëia por le pröm iade te na manira complessiva düc i aspec prinzipai dl’educaziun religiosa tles scolines, inciariada ai esperc pedagogics, y dl’insegnamënt dla religiun catolica tles scores publiches.

Cun gran plajëi á l’assessur Florian Mussner tut sö i resultac dl stüde ASTAT che reverda la conescënza di lingac dl grup linguistich ladin. „L’alta conescënza dles trëi rujenedes ofiziales é la desmostraziun de n sistem scolastich che funzionëia y le plurilinguism sará n pilaster important por le svilup de nosta mendranza“, insciö Mussner. Na sfida tl dagní sará le renforzamënt dl ladin scrit.

Chësta sabeda, ai 3 de otober dl 2015 dales 20.30, gnarál presenté al Fort de Franzensfest na manifestaziun musicala speziala dal titul „S(ch)ein: Les ambries dla musiga“ cofinanziada dala Repartiziun cultura dl’Intendënza ladina. L’evënt é na manifestaziun combinada danter istalaziuns artistiches y musicales dal baroch cina aldedaincö.