Atualità

Les gradatöres provinziales y d’Istitut provisories dles scores elementares, mesanes y altes dles localités ladines por l’ann de scora 2015/16 é gnüdes publicades ai 3 de jügn sön la plata ofiziala dl’Intendënza ladina. Les döes listes ne é nia ciamó definitives.

Le coliamënt dl svilup dla scora ladina cun les recordanzes personales dl maester, diretur y intendënt da denant Franz Vittur é tl zënter dla publicaziun nöia „recordanzes de n maester“ che é gnüda presentada incö (04 de jügn) a Badia. Le liber é gnü dé fora dal Ciamp Inovaziun y Consulënza dl Departimënt Educaziun y Cultura Ladina.

Costruí na rëi de colaboraziun danter i rapresentanc ladins tl’Euregio por sostigní le laur cultural y l’identité ladina: chësta é stada la tematica zentrala dl’incuntada a Balsan danter l’assessur por la cultura ladina Florian Mussner y Luca Agostini (presidënt dl Istitut cultural ladin Cesa de Jan), che é gnü nominé da püch rapresentant cultural di Comuns da Souramont tl’Euregio.

Ai 29 de lugio sarál l’aniversar di 25 agn dala mort de Bruno Kreisky. Por chësta ocajiun inviëia le Archif provinzial a n’incuntada de stüde ai 12 de jügn che jará a funz ala relaziun de Bruno Kreisky cun le Südtirol. Tla Ciasa Kolping da Balsan gnarál tigní de plü referac de plü esperc dla storia locala y internazionala. Al sará ince presënc le presidënt Kompatscher y l’assessur Mussner.

A na sëra d’informaziun cun la presentaziun de n liber nü y de plü referac cörc sön la Pröma Vera Mondiala inviëia la Biblioteca provinziala Teßmann de Balsan ai 09 de jügn dales 20.00 inant. Adöm cun i editurs sarál ince presënc i trëi assessurs por la cultura.

www.14-18.europaregion.info é la misciun che porta al portal web dl’Euregio Tirol-Südtirol-Trentin dediché al centenar dla Gran Vera. Tl mëis de jügn vëgnel ejaminé da plü daimpró l’economia finanziara tratan la Gran Vera, cun l’emisciun de papiers de valüta statai y i pröms voucher dl Comun de Balsan.

Prësc set agn é Elsa Zardini stada a cé dl’Union Generela di Ladins dla Dolomites. Cun la fin de ma ára dé jö süa inciaria. „I oress rengrazié la presidënta Zardini por so laur de volontariat a bëgn dla cultura ladina y ince por le clima de colaboraziun tres produtif y positif“, insciö l’assessur por la cultura ladina Florian Mussner.

Dui films di auturs Hans Albala (Viena) y Bruno Jori (Maran) gnará mostrá en vëndres, ai 5 de jügn dales 20.00 tla Biblioteca Teßmann da Balsan. La moderaziun y presentaziun dla sëra sará tles mans di auturs Ada Zapperi Zucker y da Martin Hanni. La forza dl’ega y dla natöra sará döes dles tematiches prinzipales dla manifestaziun.

N aumënt di stromënc de finanziamënt, poscibilités de finanziamënc de plü agn y la diminuziun dla burocrazia: chisc é danter l’ater i obietifs dl dessëgn de lege nü sön la promoziun dla cultura, che é gnü aprové da püch dala Junta provinziala y presenté incö dai assessurs Christian Tommasini y Philipp Achammer. De plü ince les novités por la cultura ladina.

Amplié i stromënc de finanziamënt y i ënc che pó fá domanda, n test unich y la scemplificaziun dla burocrazia é i obietifs prinzipai dl dessëgn de lege nü che reverda la promoziun dla cultura. Le ddl nü é gnü aprové incö (26 de ma) dala Junta provinziala sön proposta di assessurs Florian Mussner, Christian Tommasini y Philipp Achammer. La presentaziun sará en jöbia ai 28 de ma.