Atualità

L’entrada te vera dla Talia y les situaziuns de vera sön le front é les tematiches dl convëgn dediché al “Ann de vera 1915” che pëia ia en jöbia ai 12 (cun na mësa torona) y che vá inant en vëndres ai 13/11 (cun referac). Le convëgn é organisé dala Teßmann y dal’Academia austriaca dles Sciënzes adöm cun le Zënter de competënza regionala dla LUB y l’Istitut storich talian-todësch de Trënt.

La Junta provinziala á aprové incö (ai 3 de novëmber) la secunda pert dl finanziamënt 2015 por l’Université Lëdia da Balsan. La Provinzia mët a desposiziun 15,2 miliuns de euro por l’ativité dl ënt de formaziun y ti conzed, danterater, da manajé inant la Biblioteca medejinala virtuala.

La plataforma de interaziun soziala y digitala „facebook“ é n stromënt d’ütl por baraté fora sü pinsiers y l’adoranza di lingac te chësc contest é sté tl zënter de n’analisa che gnará presentada en mertesc, ai 10 de novëmber, da sëra tla sënta dla Teßmann da Balsan. Ala mësa torona de discusciun tolarál pert esperc dla sciënza, dla scora y dl jornalism.

I mituns dles scolines ladines reconësc so ambiënt plurilinguistich y é cosciënc de sües competënzes linguistiches. Ai capësc parores y tesć te düc trëi i lingac. Chisc é i resultac prinzipai dl’analisa linguistica dl’Intendënza ladina. „Imparé de plü lingac abonora é important por la formaziun linguistica da en doman“, á dit l’assessur Mussner ala presentaziun di resultac ai 28/10 a Urtijëi.

En domënia, ai 24 d’otober – de dles biblioteches – mët man tla Biblioteca provinziala le proiet dla biblioteca te döta la provinzia de n ann. 12 artistes y artisć dl Südtirol se dá jö cun i preiudizi sön la migraziun y laora fora na cherta postala. Les chertes é spostamënc – displacements – opiniuns corëntes dla minunga publica – positions– sön la migraziun.

Diesc agn do la mort dl regist sütirolej ti dedichëia la biblioteca provinziala Teßmann da Balsan na sëra d’aprofondimënt ai 29 d’otober al regist de films Ivo Barnabò Micheli da Bornech. Micheli á realisé i pröms gragn films sön Pier Paolo Pasolini, Heinrich Böll y N.C. Kaser. Ala Teßmann gnarál presenté n liber y n documentar. L’entrada é debann.

Por le setimo iade inviëia plü de 100 biblioteches te döt Südtirol al „De dles Bilioteches“ ai 24 d’otober dl 2015. Al vëgn pité scomenciadies de letöra y ativités leterares tratan döt le findledema y ince cina l’edema che vëgn. Danter l’ater él sön le program incuntades cun i auturs, presentaziun de libri, ativités tles scores yii. De plü é ince les ativités tles valades ladines.

I criters por la conzesciun di contribuc por le sostëgn dles ativités de laur por y cun la jonëza di grups linguistics todësch y ladin é gnüs aprová incö, mertesc ai 20 d’otober, dala Junta provinziala sön proposta dl assessur Philipp Achammer. Le percurs burocratich é gnü scemplifiché, le paiamënt antizipé sará majer.

Le Conservatore Monteverdi de Balsan pitará dal ann academich 2015/16 inant n curs de secundo livel por la formaziun de maestri de musiga che insegna da soné n stromënt: la Junta provinziala á aprové incö, mertesc ai 20 d’otober, la deliberaziun che autorisëia l’ativaziun di cursc. I posć de stüde preodüs é 34 por todësch y 12 por talian.

Per avëi na basa scientifica dla cunescënza dl ladin, tudësch y talian tl scuté su y tl ntendër di mutons dla scolines à la Intendënza ladina metù a jì adum ala Università de Persenon na evaluazion dla situazion atuela. N ressumé di resultac dl svilup linguistich di mutons y dla mutans dl ultimo ann tla scolines ladines uniral prejentà ai 28/10 dala 16.00 a Urtijëi. Duc i interessei ie inviei.