Atualità

I 40 agn dl’Intendënza Ladina, l’adatamënt dl sistem scolastich ladin ala reforma statala, i conzec d’integraziun y dles inciaries da ciasa é stá i punc zentrai dl De dla scora ladina organisé incö (03.09) tla sënta dla scora mesana a Urtijëi. „La scora ne dess nia ma ester na fontana dl savëi, mo ince de valurs y de vita“, á recordé l’assessur Mussner.

En gaujiun dl scomenciamënt dl ann scolastich nü organisëia le Zënter de competënza y i Zëntri por la promoziun dl lingac che se crüzia dl’integraziun di scolars che vëgn da d’atri Paisc n convëgn d’ajornamënt por i insegnac. L’incuntada gnará a se le dé en lönesc ai 7 de setëmber dales 14.00 tl’Eurac a Balsan en presënza di assessurs Mussner, Tommasini y Achammer.

Cun na conferënza pedagogica á metü man incö al 1 de setëmber l’ann scolastich 2015/16 dles scores de musiga. I assessurs por la scora Florian Mussner y Philipp Achammer á inaudé la sajiun musicala nöia adöm cun le diretur de Departimënt Peter Höllrigl y la direturia provinziala dles scores de musiga Irene Vieder tla sënta dla scora profescionala por l’agricoltöra a Auer.

Cun incö al 1 de setëmber é Edith Ploner la presidënta nöia dl Consëi scolastich provinzial y che ará insciö la funziun de coordinaziun dles sentades plenares dl organ de consultaziun dla Junta provinziala sön tematiches che reverda le monn dla scora. Dl Consëi scolastich fejel pert rapresentanc di trëi grups linguistics dl Südtirol.

Sura 40 agn á Romi Crazzolara lauré te plü inciaries pro les scores dles valades ladines. Naota sciöche maestra, spo sciöche direturia dles scores elemetares dla Val Badia y dla direziun de Mareo y dal 2009 sciöche ispeturia dles scores ladines. „Cun süa profescionalité, dediziun, competënza y respet ára dé n gran contribut por nosta scora ladina y por la formaziun de vita“, insciö l’ass. Mussner.

En ocajiun dl Dé dl’Autonomia vëgnel premié dal presidënt dla Provinzia Arno Kompatscher y dai assessurs por la scora Florian Mussner, Christian Tommasini y Philipp Achammer dötes les maturantes y por düc i maturanc che á fat l’ejam de maduranza tl 2015 y arjunt le majer numer de punc. La premiaziun vëgn a se le dé sön la plaza Silvius Magnago en sabeda ai 05/09 dales 17.00.

Cun l’aprovaziun dla reforma dla scora statala ti á le Parlamënt surandé la competënza ala Provinzia de Balsan da reconësce les abilitaziuns da insigné por todësch stlütes jö te d’atri Stac dl’Uniun europeica. Chësta prozedöra valará ma por i maestri che á l’intenziun da adoré l’abilitaziun a livel provinzial.

Le Departimënt dla scora y cultura de lingaz talian organisëia en jöbia ai 3 de setëmber al’EURAC n convëgn sön l’aprendimënt di lingac.

En ocajiun dl scomenciamënt dla ann nü dles scores de musiga vëgnel metü da jí en mertesc, al 1. de setëmber dales 14.45 tla sënta dla scora profescionala por l’agricoltöra a Auer n convëgn por düc i maestri de musiga dles scores de musiga ladines y todësces. Ala manifestaziun tolarál ince pert l’assessur Achammer, l’intendënt Höllrigl y la direturia dles scores de musiga Vieder.

Nce chëst ann vëniel metù a jì da pert dl Departimënt Educazion y Cultura Ladina l’ancunteda tradiziunela dl Dì dla Scola Ladina per i nsenianc, genitores y i sëurastanc dla scola. La tematica prinzipela de chëst ann sarà l cunzet de "home?work". L assessëur per la scola ladina Florian Mussner y l intendënt Roland Verra giaurirà ufizialmënter l ann de scola 2015/16 ai 03/09 dala 09.00 a Urtijëi.