Atualità

Tl contest dla ligna de recordanzes de personalités fora dal monn dla scora y de atri ciamps á le Ciamp Inovaziun y Consulënza sëgn arjigné ca la secunda publicaziun, chësc iade scrita da Eduard Pizzinini da Al Plan de Mareo dal titul "Na vita al sorvisc dla scora y dal paisc". Le liber nü gnará presenté en domënia ai 06 de dezëmber dales 15.00 tl salf dla Raika d’Al Plan.

La Junta provinziala á tut incö ( al 1 de dezëmber) la dezijiun da scrí fora n concurs por la conzesciun de stipendiums por la formaziun do l’Université cun referimënt ala perioda danter le 1 de otober cina ai 30 de setëmber dl 2016.

La Junta provinziala á tut la dezijiun da stlüje jö convenziuns por resservé alplü 55 cuartiers te ciases por studëntes y studënc a Viena y 255 te convic a Desproch por sostigní jones y jogn che stüdia tl’Austria.

Descurí la storia locala, modernisé l’insegnamënt dl ladin y ester de sostëgn por insegnanc y scolars: le Ciamp Inovaziun y Consulënza á publiché indöt 6 unités didatiches nöies por les scores altes che ti vá a funz a de plü periodes dla storia dles valades ladines. Le publicaziuns didatiches ti é gnüdes presentades incö (30/11) ai insegnanc tla sënta dl Museum Ladin Ciastel de Tor a San Martin.

Jochen Jung, autur, letur y un di plü gragn editurs dla leteratöra todëscia sará le ghest d’onur en mercui ai 2 de dezëmber dla biblioteca provinziala Teßmann da Balsan por na sëra de discusciun y presentaziun de sües incuntades leterares cun poetësses y poec dl passé y dl presënt.

D’isté él gnü aprové la reforma scolastica cun la lege „La Buona Scuola“ che gnará sëgn adatada ales leges provinziales. Por fá chësc vare deboriada inviëia l’assessur Mussner y l’intendënt Verra döt le personal didatich, i rapresentanc di geniturs y studënc a döes sëres de dialogh a Urtijëi (03/12) y San Martin (10/12) por informé en cunt di mudamënc che gnará a s’l’dé tl sistem scolastich ladin.

Le Ciamp Inovaziun y Consulënza tl Departimënt Educaziun y Cultura ladina inviëia düc i interessá ala presentaziun dles unités didatiches nöies de ladin por la scora alta en lönesc, ai 30 de novëmber dl 2015, dales 15.00 tl Museum Ladin Ciastel de Tor. Ala presentaziun tolarál ince pert l’assessur ladin Florian Mussner, l’intendënt Roland Verra y le diretur Felix Ploner.

Por se dé jö cun i avenimënc y le svilup dles localités dl Südtirol s’á incunté incö, vëndres ai 20 de novëmber, söporjö 100 cronisć en gaujiun dl 18ejimo De di Cronisć dl Südtirol. L’assessur Florian Mussner á rengrazié i cronisć por so laur de racoiüda volontar por i paisc dla Provinzia y ti á surandé n’onoranza por i gragn miric te chësc setur ince a siur Christian Moroder.

N codejel, da desciarié ince online, cöi adöm dötes les informaziuns sön i Dis dla Porta daverta y les manifestaziuns d’informaziun desvalies organisades dai lizeums, dales scores altes, dai Istituc tecnics y profescionai por i scolars y les scolares dla terza mesana y i geniturs che mëss chirí fora so percurs de formaziun cina ai 15 de merz dl 2016.

Al toma ai 22 de dezëmber le termin por la pesentaziun de domandes por la conzesciun de stipendiums a bëgn de studënc che frecuentëia cursc aldinfora dla Provinzia de Balsan, dla scora alta o de cursc de formaziun profescionala a tëmp plëgn. A desposiziun por curí les domandes él indöt 400.000 euro.