Atualità

Le presidënt dla Provinzia Arno Kompatscher presentará, adöm cun i assessurs por la cultura Florian Mussner, Christian Tommasini y Philipp Achammer, en jöbia ai 2 de aurí a Balsan la ligna de scomenciadies che é söl program por i 100 agn passá dala Pröma Vera Mondiala (1914-1918).

Les Consultes di Jogn di grups linguistics ladin, todësch y talian s’á incunté incö, 26 de merz, a Balsan por na pröma sentada deboriada. „Sciöche ënc de consulënza dla Junta pro tematiches che reverda i jogn á les consultes na funziun importanta che dess tl dagní gní portada inant tres de plü te na manira coletiva“, á sotligné i assessurs Florian Mussner, Christian Tommasini y Philipp Achammer.

Söporjö 100 jogn y jones dal Südtirol, Tirol y Trentin tolarà pert da indoman (25 de merz) ćina a en sabeda ai 28 ala cuarta ediziun dl Festival dla jonëza dl’Euregio. Al se trata de na manifestaziun cun plü incuntades te düć trëi i raiuns dl’Euregio (Riva del Garda, Maran y Stams) por aprofondì i aspeć desvalis intoronn ala tematica prinzipala „Costruì deboriada l’Euregio“.

Söporjö 500 ofertes por l’isté 2015 di mituns, jogn y families à l’Ofize Jonëza dla Provinzia publiché da püch sön la plata www.provinz.bz.it/ferien. Implü él da ciafè sön la plata internet plü informaziuns d’ütl por la perioda da d’isté danter jügn y setëmber.

La scemplificaziun dl’ortografia dl ladin scrit dla Val Badia é gnüda aproada incö (23/03) dai rapresentanc istituzionai dla scora y cultura ladina dla Provinzia de Balsan. L’ortografia nöia é le früt de tröpes discusciuns danter i esperc te chësc ciamp,y pó da sëgn inant gní adorada ofizialmënter, ti ac publics, mo ince por ci che á da nen fá cun l’insegnamënt dl ladin tles scores.

La ediziun 2015 dl tornê de hockey danter les scores mesanes dles valades ladines, organisada dal Sorvisc Sport Scolastich dl’Intendënza Ladina de Balsan, é jüda a piz incö domisdé, vëndres ai 20 de merz, a Corvara. Jogadus de Gherdëna, dla Val Badia, de Fodom/Alleghe, de Ampëz y de Fascia à combatü por le titul „campiun de hockey interladin 2015“. Le pröm post é jü te Gherdëna.

Inće chësc ann pitarà la Rapresentanza dl’Euregio Südtirol-Tirol-Trentin n’oportunitè por imparè da conësce da plü daimprò les istituziuns dl UE a Bruxelles. L’Alpeuregio Summer School ti darà la poscibilité a jogn laureà, y tl 2015 por le pröm iade inće ai studënć, da fà n’esperiënza direta a contat con les istituziuns politiches dl’Uniun Europeica. Domandes ćina ai 15 de aurì.

“Sciöche la popolaziun dl Kronland â viüt la Pröma Vera Mondiala”: Le storiograf y publizist conesciü Michael Forcher tignarà en jöbia ai 26 de merz dales 20 da sëra n referat tla Biblioteca provinziala sön la storia dl Tirol tratan la Pröma Vera Mondiala.

En mercui ai 25/03 dales 11:40 y dales 20:00 gnaral presentè sön paladina dala pröma y la secunda tlassa dl lizeum linguistich da La Ila le resultat de n proiet cultural metü da jì dala Repartiziun Cultura y Intendënza Ladina y coordinè da Erika Castlunger. Les tlasses à laurè sö i aspeć desvalies dla vera en ocajiun dl aniversar dl scomënciamënt dla pröma vera mondiala.

„Vire l’intlujiun“, chësc é le titul de n convëgn che vëgn metü da jì dal’organisaziun ’Kooperation Pustertal’, na plataforma che cöi adöm y mët en rëi dötes les istituziuns y i sorvisc che laôra cun jogn y mituns. Le terminn por l’incuntada é en vëndres ai 20 de merz a Toblach, a chël che al tolarà inće pert i assessurs Philipp Achammer y Waltraud Deeg.