Atualità

Di 342 insegnanc dles scores ladines dla Provinzia da Balsan, ne à incö, mertesc ai 05 de má, 8 nia laurè fajon para al scioper nazional dles scores. La porcentuala che à fat para a chësta protesta é insciö de 2,3 porcënt tles scores ladines. 42,29 porcënt di insegnanc á scioperé tles scores talianes, 18 porcënt te chëres todësces.

www.14-18.europaregion.info é la misciun dl portal web dl’Euregio Tirol-Südtirol-Trentin che é dediché al centanar dla Pröma Vera Mondiala. Tla seziun „Let’s talk“ vëgnel aprofondí vigni mëis temesc nüs, cun domandes y respostes: tl mëis de má nen vara dl’entrada tl conflit dla Talia, che ai 23 de má dl 1915 ti á detlaré vera al’Austria-Ungheria.

Joseph Zoderer sará en mertesc, ai 5 de má tla Biblioteca provinziala dla Teßmann a Balsan: te chësta ocajiun liará l’autur fora dla pröma pert de süa opera leterara nöia. L’entrada por la serada de presentaziun é debann.

Do le bilinguism tochera sëgn ince ala pert ladina dl ejame de trilinguism. L’ejam de ladin gnará insciö adaté al cheder de referimënt di lingac europeich y gnará partí sö tl dagní te trëi perts (scrit, da ascuté sö y a usc). Por ci che reverda le scrit ne sarál nia plü la medema proa por A y B, chësc á stabilí da püch la Junta provinziala.

L’Orchestra sinfonica di jogn dl Südtirol (Jugendsinfonieorchester) chir mëmbri nüs: deache na pert di musizisć atuai ne podará nia plü fá pert dl’orchestra vëgnel chirí jogn y jones dai 14 ai 24 agn. Les domandes por stieres da sonadú por düc i stromënc d’orchestra pó gní dades jö cina ai 26 de má. La seleziun gnará fata tres n’aldiziun ai 14 de jügn a Balsan.

Plü visibilité y n azes alisiré ai libri ince da ciasa o dal post de laur: la biblioteca dl Ciamp Inovaziun y Consulënza dl’Intendënza Ladina fej pert da püch, sciöche ince la biblioteca dl Istitut cultural „Micurá de Rü“ y tröpes d’atres dl catalogh digital „Wissenschaftsbibliothek Südtirol“ dl’Université da Balsan.

Les Consultes di studënc taliana y todëscia, adöm ala Consulta di geniturs, á presenté incö, mercui ai 22 de aurí te na conferënza stampa le proiet „Eduval“, n chestionar por la valutaziun di professurs y maestri da pert de sü studënc.

120 scolars dala scora elementara cina la scora alta fej para al proiet “Rundenì de lijëndes”, che vëiga danfora l’elaboraziun de n poem musical por rapresenté musicalmënter la tradiziun de valüta dles liëndes ladines te n contest atual. La pröma rapresentaziun é gnüda presentada inier, 20/04 a Urtijëi, incö sarál les secundes döes (16:30 – 20:30) a Urtijëi y atres döes sará ai 24/04 a San Martin.

Sté chic n momënt y ponsé do a ci che é veramënter important tla vita – chësc é l’impuls che la scomenciadia „Before i die, i’d like to…“ ti ô dé ai jogn y che é gnüda presentada incö, lönesc ai 20 de aurí, a Balsan tl contest di Dis d’aziun de Formaziun politica 2015. Les aziuns sará despartides sö sön döta la Provinzia, dai 23 de aurí ince tles valades ladines.

Le Ciamp Inovaziun y Consulënza informëia che da incö, vëndres ai 17 de aurí, él da ciafé sön süa plata internet ofiziala n codejel de presentaziun y spligaziun dla grafia nöia dl Ladin dla Val Badia. N codejel te na verjiun stampada cun dötes les informaziuns ti gnará proscimamënter metü a desposiziun ai insegnanc y ales insegnantes dles scores ladines dla Val Badia.