Comunicat stampa

La Jonta provinziela à dat pro l program di lëures 2013 per purté l internet aslune te uni luech dl Südtirol, chësc vëija dant de plu lëures nce tla valedes ladines. Danter i argumënc de majer nteres tratei dala Jonta provinziela y prejentei dal presidënt Durnwalder te cunferënza stampa iel la spezialisazion prufesciunela per lerneri, l ressanamënt de cuatieres ti zëntri, l barat de cuatieres cun grunc dla vedla casermes y pruvedimënc per sparanië energia tla scoles y tla cëses dl’aministrazion publica.

USP - La Jonta provinziela uel sparanië custimënt sun l’energia tla cëses provinzieles. Per abiné la soluzions plu adatedes per chësc sparani uniral spartì su la documentazion plu a puntin a na maniera de pudëi se udëi ora l potenzial de sparani.

USP - Tl mpëni acioche la jënt ebe de plu da lëur, à la Jonta provinziela (NCUEI) ai 04 de merz dat pro cursc de spezialisazion prufesciunela. Tla proscima sentedes dëssel unì dat pro pruvedimënc per l ressanamënt de cuatieres y per purté inant plu riesc l barat de cuatieres fai su dala Provinzia cun puscions de vedla casermes.

USP – La Jonta provinziela à (NCUEI) ai 04 de merz dat pro l program dla nfrastrutures per la rë de culegamënc internet a slune. Sun pruposta dl assessëur Florian Mussner uniral ntan l 2013 fat lëures per n custimënt de 8.170.000 euro. Per i lëures tla Val Badia y te Gherdëina iel chëst ann udù dant na nvestizion de belau na milion de euro.

USP – Chi che ulëssa ntan l proscimo ann de scola, 2013/14 mparé a suné n strumënt o fé lezions de cianté, possa ntan l mëns de merz se scrì ite ala scoles de mujiga. La iscrizions tla scoles de mujiga de Gherdëina y dla Val Badia vën tëutes su (da NCUEI, 4 de merz) nchin ai 28 de merz.

USP - Tl palaz provinziel Widmann a Bulsan à (NCUEI DOMESDI) ai prim de merz scumencià l cunvëni de doi dis sun metodologies etnografiches per nrescì y fé al savëi l patrimone culturel nia materiel. L cunvëni ie metù a jì dal Museum Ladin y dal’Assoziazion etnografica dl Südtirol EVAA ie nasciù dal proiet transnaziunel E.CH.I. (ethnografies talianes-svizeres) te chël che l Museum Ladin se à dat ju cun l patrimone nia materiel, tradizions y usanzes de Gherdëina. L cunvëni va inant nchin sada ai doi de merz da mesdì.

USP – L suzes dl trio de ciantarines “Ganes” da La Val à purtà Maria Moling, Elisabeth y Marlene Schuen sun de gran palcs a livel nternaziunel. Si atività y si produzion nueva ie stai argumënt de n’ancunteda (NCUEI) ai 26 de fauré cun l presidënt dla Provinzia Luis Durnwalder tl palaz Widmann a Bulsan.

USP – Sun la plata web www.provinzia.bz.it/ferien iel da abiné de plu prupostes aldò de chëles che mutons y mutans, jëuni y jëunes y families dl Südtirol possa se mëter a jì l instà. L Ufize provinziel per jëuni à metù a jì chësta plata web per pité n grum de nfurmazions y prupostes sun: tëmp liede, ucajions per lauré, viagë y mparé d’instà.

Pruzedures nueves per mudazions ala plann urbanistich chemunel, la posizion dla Jonta provinziela n cont dla stazion dla furnadoia nueva da Persenon sun la Plose y la detlarazion che Südtirol ne à plu degun caji de rabia ie stai i argumënc de majer nteres da pont de ududa ladin, ora dla senteda dla Jonta provinziela, che l presidënt Durnwalder à prejentà te cunferënza stampa.

USP – La Jonta provinziela lëura te chësc tëmp for inò a inuvazions dla lege urbanistica. Te si senteda da (NCUEI) ai 25 de fauré iel unì fat ora de mudé la pruzedures canche la se trata de mudazions al plann urbanistich chemunel.