Comunicat stampa

USP – Manfred Mölgg à venciù la bedaia de bront de slalom lerch pra i campionac dl mond a Schladming. L presidënt dla Provinzia Luis Durnwalder y l assessëur ladin Florian Mussner fej auguresc al atlet de Al Plan de Mareo per chësc gran suzes (da NCUEI) de n vënderdi 15 de fauré.

USP – Se stizan sun l fond de pension sëuraprò uel la Jonta provinziela mëter su n model de sparani per ruvé pra n cuatier. Co che pudëssa unì a cialé ora chësc model, à la Jonta provinziela (NCUEI) ai 11 de fauré tratà deberieda cun i respunsabl dl Pensplan. L presidënt dla Provinzia Durnwalder à cunedì che ntan la proscima trëi o cater enes uelen purté dant na pruposta cuncreta.

USP – Al raion a Badia che de dezëmber ie unì tucà dala gran smueia, ti à Jonta provinziela (NCUEI) ai 11 de fauré metù na sëida. Chësta sëida ie de bujën acioche la jënt tucheda posse giapé aiuc dala man publica.

USP – Do che Elmar Pichler Rolle ie (NCUEI) ai 5 de fauré unì lità assessëur provinziel, ti à l presidënt dla Provinzia Luis Durnwalder sëurandat i ciamps de cumpetënza. Nsci sëurantol Pichler Rolle la respunsabltà sun l’urbanistica y cuntreda cun leprò nce l liber fundier y l cataster.

La cuestion dla produzion de strom tl Südtirol dëssa unì ressolta te na culaburazion cun na holding. Deberieda cun la defendura dla regulamentazion per maestri de schi, formes nueves de sustëni per l cuatier y la sozietà de aiut per svilup economich “Südtirol Finiance”, ie chisc stai i argumënc prinzipei dla senteda dla Jonta provinziela, che l presidënt Durnwalder à prejentà te cunferënza stampa.

USP – Cun la fundazion dla sozietà “Südtirol Finance AG” uel la Jonta provinziela mëter a jì n strumënt de sustëni al’economia de 250 milion de euro. I assessëures provinziei à (NCUEI) ai 04 de fauré tratà i statuc che ie n majera pert bele azetei. Aldò dl presidënt dla Provinzia Durnwalder ie mo da stlarì la culaburazion danter la sozietà nueva y la Jonta provinziela, a na maniera che posse unì coordinei i pruvedimënc da tramedoi pertes.

USP – Da pert dla Union Europea iel unì damanda stlarimënc sun la regulamentazion per maestri de schi tl Südtirol che ne lascia nia pro che maestri da ora de ca lëure unfat sciche chëi da tlo. La Jonta provinziela à (NCUEI) ai 04 de fauré fat ora de defënder si regulamentazion dan la Chëurt costituzionela.

USP - Cun na lingia de pruvedimënc uel la Jonta provinziela miuré l sustëni acioche i zitadins posse ruvé pra n si cuatier. La prupostes che ie unides tratedes (NCUEI) ai 04 de fauré reverda dantaprima n aiut spezifich per chiche à nstës sparanià velch per l cuatier y aiuc per ressané cuatieres te vedla cëses. I assessëures à nce rujenà de n aiut spezifich per curì l dann gaujà dala smueia de Badia.

USP - La soluzion dla problematica dla produzion de strom tl Südtirol dëssa vester la culaburazion. Sun pruposta dl assessëur Mussner à la Jonta provinziela (NCUEi) ai 04 de fauré azetà de nvië via tratatives per ruvé a na holding danter la sozieteies dal strom tl Südtirol.

USP – Smendrì les codes d’auti ti dis critics y dales ores olache al é le majer numer d’auti sön la strada statala de Puster: La Junta provinziala laôra bele dî a chësc travert y s’anüza dl web por l’arjunje. Dai 31 de jenà (INCÖ) é le portal www.previsionetraffico.bz.it, che pîta informaziuns tl tëmp real sön la viabilité sön lla strada statala 49, online.