Comunicat stampa

USP – La situazion dles viles de Anvì y Sottrù a Badia ie deventeda mo plu dramatica: l rone che se ova bele muet n juebia, à (NCUEI) n vënderdi domesdì, 14 dezëmber, desdrù trëi cëses a Anvì. I abitanc fova bele la sëira dant mucei ora de cësa. Duman sada jirà presidënt Durnwalder nstëssa a ti cialé ala situazion y per la 11.00 iel udù dant na cunferënza stampa.

USP – La zifres statistiches di ciamps de majer nteres per l ann 2012 ie dan man. L Istitut provinziel de statistica Astat à dat ora n cudejel, che ie sciche ti ani passei nce da giapé tla rujeneda ladina.

USP – Ivan Senoner ova pra l cuncors provinziel de leteratura ladina venciù n pest straurdiner: si romann ie unì valutà tan bën dala cumiscion che l ie pona unì publicà te n liber a pert. N mierculdi ai 19 de dezëmber unirà chësc liber nuef, che trata de n romann scrit per jëuni, prejentà tl zënter per jëuni a Urtijëi. L assessëur Florian Mussner rujenerà dl valor de chësc liber per la mendranza ladina y Judith Piccolruaz cumpanierà la sëira de leteratura al tlavir.

USP - Per l prim iede te chësta legislatura se à la trëi cunsultes provinzieles de jëuni y jëunes, chëla per la grupa de rujeneda tudëscia, la taliana y la ladina, urtà pra na senteda deberieda. Tema prinzipel fova la dejocupazion junila te Sudtirol.

La urganisazion nueva dla sozieteies provinzieles, l furnel dal refudam che dëssa passé ai chemuns, la lege per la families deberieda cun la pruzedures per i purtoies dai schi, la defendura dla lege de toponomastica y l cuntrol di auti ti raions ie stai i argumënc prinzipei tla senteda dla Jonta provinziela che l presidënt Durnwalder à prejentà te cunferënza stampa.

USP - Na pruzedura nueva per purtoies dai schi, la defendura dla lege sun la toponomastica, la puscibltà de fé cuntroi di auti y ejams ti raions ie (NCUEI) ai 10 de dezëmber unì dai pro dala Jonta provinziela.

USP – La lege nueva per la families giapa for plu forma. La Jonta provinziela à (NCUEI) ai 10 de dezëmber dat pro la pruposta de lege y a chësta maniera uniral a se l dé n documënt de basa per la families che vëij dant trëi seves de sustëni: rafurzé la cumpetënza de familia, familia y mestier deberieda cun l sustëni finanziel.

USP – La Provinzia fova n iede te feter 20 sozieteies ersternes. Da velch iela bele zapeda ora y co fé cun chëles che resta mo, à la Jonta provinziela tratà te si senteda (da NCUEI) ai 10 de dezëmber. Aldò de Durnwalder uniral proscimamënter dessegur mudazions per smendrì l custimënt y miuré l’efiziënza.

USP - Davia che la gestion dl refudam ie de cumpetënza di chemuns dëssa l furnel dal refudam nuef de Bulsan unì vendù ai chemuns. La Jonta provinziela à te si senteda (da NCUEI) ai 10 de dezëmber valuta la pusciblteies a na maniera che la tarifes ne auze nia ora de mesura.

USP – L ajurnamënt di nsenianc y anjenië materiai didatics, deberieda cun la nrescida y l’evaluazion ie i proiec prinzipei che la Ntendënza ladina cun si servijes pedagogics y l ciamp de lëur Inovazion y cunsulënza se à tëut dant per l ann 2013. Dut l program de lëur tol ite la scolines y la scoles di luesc ladins.