Comunicat stampa

La prejentazion y i servijes dla Presidënza dla Provinzia de Bulsan tl internet ie śën nce da abiné tla rujeneda ladina. La nueva plates web ie da (NCUEI) ai 17 de auril online. “Sciche Presidënza laurons per duta trëi grupes de rujeneda, perchël nes iel mpurtant avëi nce na verscion ladina dla nfurmazion tres internet” sorissea l presidënt dla Provinzia Durnwalder.

40 ani de autonomia te mes’ ëura. Ora de 1500 rodli de films storics amatoriei cun 450 ëura de material video à Federico Campana y Alessandro Bandinelli trat adum l film documenter “stimmen voci ujes” te chël che l vën mustrà su l svilup dl Südtirol ti ultimi dejeneies. Chësc film sarà da udëi (DUMAN) mierculdi, 17 de auril, ntan la sëira de giaurida di dis de film a Bulsan.

Acioche la rujeneda ladina possa tenì l var di tëmps y se svilupé inant, lëura na grupa de esperc da n ann sun paroles nueves. La soluzions per esprescions nueves se adrova tëmp per madurì y la bona ulentà. “Paroles nueves che vede bën nce per la valeda ujina ie de gran valor ajache les ie sciche ziedli per fé su na fundamënta per miëur cuntac danter la valedes ladines” sorissea l assessëur ladin Mussner.

Na valutazion nueva dla documentazions de cunzescions sun la basa di documënc uriginei: chësta dezijion à la Jonta provinziela tëut (N SËIRA) ai 15 de auril. Tratatives cun duta la pertes nteressedes dëssa ntant purté a lascé vester i stritoc. Sun mëisa ie nce la puscibltà de dé ju cuotes dla SEL.

L program “sparani per n cuatier” a na maniera che jëuni ruve plu saurì pra n si cuatier, la gestion tl furnel dal refudam a Bulsan ntan l tëmp de prova y n zënter de cumpetënza nuef tl Università de Bulsan dedicà ala prutezion zevila ie stai i argumënc de majera mpurtanza tratei dala Jonta provinziela ai 15 de auril y prejentei te cunferënza stampa dal presidënt Luis Durnwalder.

Acioche i jëuni se feje plu saurì a ruvé pra n si cuatier iel unì laurà ora n program se sparani speziel che se urientea al model “Bausparen” ti paejes de rujeneda tudëscia. La Jonta provinziela à (NCUEI) ai 15 de auril n linea de mascima dat pro l “sparani per n cuatier” laurà ora deberieda cun l fond de pension sëuraprò Pensplan.

La prutezion zevila dëssa deventé materia academica. La Jonta provinziela à (NCUEI) ai 15 de auril dat pro de mëter su n zënter de cumpetënza tl’Università de Bulsan n cont de scunanza dal meldefuech y catastrofes natureles.

I lëures per l furnel dal refudam nuef a Bulsan Sud ie bele na n bon pont y ti proscimi mënsc dëssa scumencé na prova de sies mënsc. La Jonta provinziela ie (NCUEI) ai 15 de auril stata a una che chësc tëmp de prova dëssa unì aministrà dal ECOcenter AG che ie de avëi di chemuns.

25 scumenciadives cultureles che reverda de plu grupes de rujeneda giaterà n sustëni de 523.400 euro dala Provinzia de Bulsan. La dumandes de sustëni ie (INIER) ai 10 de auril unides azetedes dala Cunsulta culturela dla trëi grupes de rujeneda cun i assessëures provinziei Mussner, Kasslatter Mur y Tommasini.

Riesc do la sëurandata dl pest dl Südtirol per la mendranzes se à l Dalai Lama y l presidënt Luis Durnwalder (NCUEI) ai 10 de auril, ancuntà cun i media. L Dalai Lama à detlarà che la uneranza da pert dla Provinzia de Bulsan ie senziera y cun n pensier sot. L presidënt dla Provinzia à stlarì che pra chësta vijita dl Dalai Lama ne ie ruveda deguna prutesta cinëija.