Comunicat stampa

Ntan l ultimo inviern à 32 atlec dl Südtirol venciù na bedaia mundiela o arjont n podium de copa dl mond. Danter chisc atlec che ie (INIER) ai 8 de mei unic unerei dal presidënt dla Provinzia y assessëur al sport Durnwalder, iel nce 8 atlec dai luesc ladins.

La trëi grupes de rujeneda dl Südtirol valutea la storia da si pont de ududa. L liber de storia che ie unì prejentà (NCUEI) ai 09 de mei a Bulsan ie unì fat da esperc de duta trëi grupes y ie per duta trëi grupes de rujeneda: l dëssa judé pro a deventé plu cuscienc dla storia deberieda y a chësta maniera a na miëura cunvivënza dla grupes de rujeneda.

L’atività artistica fej pert dla cultura y ie tla valedes ladines drët sentida. Per sustenì chësta atività dla mendranza ladina compra la Provinzia de Bulsan uni tant vel opra d’ert. La cumiscion cherdeda ite dal Assessorat Ladin che dëssa fé prupostes y dé na valutazion sun i priejes, sa à (INIER) ai 08 de mei ancuntà l prim iede.

Cun la cumpededa dla jënt à l Istitut provinziel de statistica ASTAT y l istitut naziunel ISTAT fat na nrescida sun duta la populazion. La prima pert di resultac definitives unirà prejentei n mierculdi 15 de mei dal presidënt dla Provinzia Durnwalder te na cunferënza stampa a Bulsan.

Inier, ai 7 de mà dl 2013 él pié ia la terza ediziun dl concurs de idees “Tourismus trifft Landwirtschaft – Il turismo incontra l’agricoltura” a livel dl’Euregio cun le Südtirol, le Tirol y le Trentin. Tres chësc concurs vëgnel chirì proieć de cooperaziun te chisc dui seturs strategics por i raiuns alpins.

Na delegazion di trëi chemuns ladins storics de Belun se à (NCUEI) 08 de mei ancuntà cun l presidënt dla Provinzia Luis Durnwalder y l assessëur ladin Mussner. I argumënc dl’ancunteda tl palaz Widmann a Bulsan ie stai la ulentà di trëi chemuns storics de fé pert dl dla provinzia de Bulsan, i finanziamënc tres l fondo Brancher y l svilup dla RAI Ladina.

Te sies enes, ai 19 de juni scumëncia i ejams de matura. L ntendënt ala scoles ladines à śën numinà la 5 cumiscions per l’ejam de matura.

L Museum Gherdëina presentea tla mostra temporera “Clochards & roba da fé da mat“ lëures de sculées y sculeies dl Lizeum d’Ert “Cademia“ criei sun ispirazion de na selezion de pec dl museum. Cun chësta mostra tol l Museum Gherdëina pert ala scumënciadives per “l ann dl pez dl museum”. La mostra vën giaurida n vënerdi, 10 de mei, dala 10.00.

Ntan chësc ann iel unì metù a jì n barat danter i sculeies dl Lizeum linguistich da La Ila, la scola auta “Marie Curie” da Maran y la scola “Claudia de Medici” de Bulsan. Tl cheder di dis de educazion politica se anconta i sculeies (NCUEI) 7 de mei per n dì deberieda a Bulsan.

La prugramazion nueva per l radio dla RAI de Bulsan tla rujenedes tudëscia y ladina, la nvestizion da chëst ann per asfalt nuef sun la stredes, l bonus dla matura per se scrì ite al’università y la publicazion di paiamënc di dirijënc provinziei ie stai i argumënc prinzipei tratei dala Jonta provinziela ai 06 de mei y prejentei te cunferënza stampa dal presidënt Luis Durnwalder.