Comunicat stampa

N ann plu abenëura che prugramà ie l plann per de plu stieres jit n droa cun 44 pruvedimënc. L plann per de plu stieres ti proscimi ani ie (NCUEI) ai 04 de lugio unì prejentà dal assessëur Roberto Bizzo. La se trata de n prugram strategich che dà dant l cheder per la politica economica y dla stieres n cont de pruvedimënc per chiche ne à nia na stiera, l’ëiles, jënt de età y n’economia che adrova stieres nueves.

I presuposc urbanistics y de tecnica ambientela per la trassa nueva dla furnadoia de Dantercëpies te Sëlva ie anjiniëi. La Jonta provinziela à azetà la mudazion al plann urbanistich y la valutazion de dann ambientel.

Davia che n lunesc uniral te Cunsëi provinziel bele metù man la descuscion dla lege urbanistica, se anconta la Jonta provinziela ai 8 de lugio per na senteda plu curta. La tradiziunela cunferënza stampa dl presidënt Durnwalder do la senteda ne unirà nia fata.

Te n’ancunteda (NCUEI) ai 03 de lugio a Roma ne ie la regions y provinzies autonomes nia ruvedes a una sun co che les dëssa dé si cuntribut a ressané la finanzes stateles. L assessëur Roberto Bizzo, che à reprejentà la Provinzia de Bulsan sorissea che l fossa iust l’aministrazions autonomes che messëssa demustré de tré dutes dl medemo vieres. Zënza ruvé a una, nsci Bizzo, ne resteral auter che jì dan la Cëurt costituzionela.

L lëur pioniristich che Carl Insam ova scumencià dan 36 ani pra la RAI de Bulsan ie deventà na seva mpurtanta per mantenì y fé viver la mendranza ladina. Dai prim de lugio ie Insam n pension: l assessëur ladin Florian Mussner l rengrazia publicamënter per si lëur jurnalistich che à nce abù na fazion de gran valor per la rujeneda ladina.

Le Museum Ladin Ćiastel de Tor mët a jì deboriada cun l’Istitut Ladin Micurà de Rü a San Martin de Tor n curs de ladin por prinzipianć, vigni vëndres dai 5 de lugio ai 30 d’agost.

Cun n fond per l export uelen dé na sburdla a vënder mo plu prudoc oradecà. - Na reunion deberieda cun la pertes nteressedes dëssa mustré su i pruvedimënc per ti vester ala viulënza tl Sudtirol y pité mo plu segurëza. – Na tel reunion dëssa nce purté a na dezijion n cont de ti judé ai sculeies imigrei a mparé la rujenedes da tlo per na miëur ntegrazion y cualità de nseniamënt te tlas. Chisc ie stai i argumënc prinzipei tratei ai prim de lugio dala Jonta provinziela y prejentei ai media dal presidënt Luis Durnwalder.

I caji de viulënza che ie unic su ultimamënter ne ie nia tan trueps da sté cun festide, purempò ne dëssa la problematica nia unida tëuta ala lesiera. Per rujené cuncretamënter de pruvedimënc cherderà l presidënt dla Provinzia Durnwalder de plu pertes nteressedes a na senteda de coordinazion.

La Jonta provinziela uel mëter a jì che duc i sculeies sebe la rujenedes a na maniera da pudëi ntënder l nseniamënt te scola. Aldò dl presidënt dla Provinzia ne vëniel a chësta maniera nia me segurà l livel dl nseniamënt, nsci iel nce puscibl arjonjer na miëur ntegrazion di sculeies imigrei. La Jonta provinziela à (NCUEI) ai prim de lugio tratà de plu modiei per ti jì permez a chësta problematica.

Na pert dëibla dl’economia dl Sudtirol ie l vënder di prudoc oradecà. Per ti judé ala firmes tl export, à la Jonta provinziela metù su n fond dl export che juda sce l vën a mancë paiamënc. Chësc fond ie (NCUEI) ai prim de lugio unì dat pro dala Jonta provinziela y nsci possel unì nvià via cuncorsc y acurdanzes.