Comunicat stampa

Per l ann internaziunel dla cooperazion per l’ega 2013 urganisea la Cësa dl Parch naturel Puez-Odles deberieda cun la Bibliotech de Funes n cuncors de fotografies sun la tematica dl’ega. Granc y pitli possa dé ite si fotografies nchin ai 31 d’agost 2013.

L plann provinziel per de plu stieres ti ani 2014 nchin 2021 ie l strumënt dla Jonta provinziela per rafurzé l marcià dla stieres tl Sudtirol y per auzé nchin al 2020, la cumpëida dla jënt che à da lëur al 80 percënt. (NCUEI) Ai 24 de juni à la Jonta provinziela dat pro l documënt de mascima che vëija danterauter dant n cuntrat dla generazions tl’servisc publich, manco chëutes per i patrons de lëur y na sburdla al’economia dl frabiché.

L’urganisazion per la veles provinzieles ala fin de utober 2013 va inant a var plën. (NCUEI) Ai 24 de juni à la Jonta provinziela fat ora la ndeniteies per i chemuns y i presidënc dla sëntes de vela. Leprò ala nce metù a desposizion i mesuns per la vela tres lëtra, che unirà tenida per l prim iede.

Tl daunì ne dëssel nia plu vester de majera defrënzies de paiamënt di nsenianc de scoles defrëntes. L dessëni de cuntrat marciadà ora danter Provinzia y sindacac, ie (NCUEI) ai 24 de juni unì dat pro dala Jonta provinziela.

Chisc dis scumëncia i lëures per l terzo y ultimo lot dla streda de Rina. Chësc ntervënt de 7,3 milion de euro ie l majer lëur da chëst ann dl assessorat provinziel ai lëures publics tla valedes ladines. “Na miëur’ streda per Rina ie sciche na vëina acioche l luech posse se mantenì y se svilupé” sorissea l assessëur Florian Mussner.

L di dla biodiversità vën chëst ann tenì sun i prei de Armentara, tl chemun da La Val. N sada ai 29 de juni vëniel ntan dut l di vijità y analisà la majera cumpëida de tieres y plantes che l sarà puscibl. Leprò vëniel nce pità jites menedes da esperc. Da sëira, dala 18.30, unirà i prim resultac prejentei tl paisc da La Val.

Baratan dai programs de computer “MS Office” a "LibreOffice" fej l’aministrazion publica dl Sudtirol l prim gran var per la software liedia. Ntan i proscimi trëi ani fej me la Provinzia mudazions pra 7000 computer, sparanian a chësta maniera feter 600.000 euro de lizënzes.

Tl’Assessorat provinziel ladin iel chisc dis unì dat pro la segonda pert de cuntribuc per ativiteies de furmazion per la grupa de rujeneda ladina. Ntan chëst ann sustën la Provinzia de Bulsan a chësta maniera 15 scumenciadives de furmazion per na soma de 61.900 euro.

L Strom y la segurëza publica ie stai i doi argumënc prinzipei che à caraterisà la senteda dla Jonta provinziela dl 17 de juni. L presidënt dla SEL à prejentà la situazion atuela, cun drët de bon resultac. La Jonta à pona fat ora de scëmplifiché la pruzedures per sëurandé cunzescions a zëntreles nchin a 1000 chilowatt. Danter i ponc de majer nteres prejentei dal presidënt dla Provinzia Luis Durnwalder iel nce pruvedimënc per ti ji permez ai truep caji de ciavatedes y viulënza ntan la nuet.

De plu caji de ciavatedes ntan la nuet à purtà pro che la Jonta provinziela ebe tratà la cuestion dla segurëza publica tl Sudtirol. Aldò dl presidënt ne dëssa la situazion nia unì dramatiseda, purempò iela da tò sul scerio. I assessëures provinziei se damanda pruvedimënc coordinei da duta la pertes tuchedes.