Comunicat stampa

USP – Per fé pensé do la jënt sun l refudam che di per di devënta for de plu à la scola mesana “Arcangiul Lardschneider” de Sëlva nvià via la scumenciadiva “Trash Art”. Sculeies à tëut ca pec de refudam y fat dainora creazions artistiches. La mostra de chisc pec ie sën, sun nvit dl assessëur Mussner, da udëi tla cësa provinziela doi a Bulsan.

USP – Pratiches plu scëmples per mudazions urbanistiches, majera lidëza urbanistica per l turism, trasfurmazion dl SMG te n’agenzia, l archif dl Ente Nazionale per le Tre Venezie y servijes soziei per jënt da oradecà ie stai i argumënc zentrei dla senteda dla Jonta provinziela ai 16 de auril. L presidënt Luis Durnwalder à cunedì la dezijions tla cunferënza stampa riesc do la senteda.

USP – Te si senteda da (NCUEI) ai 16 de auril à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres, danter chisc nce la cuestion dl archif dl Ente Nazionale per le Tre Venezie y i servijes soziei per jënt da oradecà cun n cuatier tlo da nëus.

USP - La Jonta provinziela à (NCUEI) ai 16 de auril dat pro de mudé la cundizions urbanistiches per i raions de turism sun trëi ponc: la cubatures, la cumpëida minima de liec y l giaurì di servijes de cura a tlienc che ne ie nia te cësa.

USP – La Jonta provinziela à (NCUEI) ai 16 de auril tratà l daunì dla sozieteies de avëi dla Provinzia y à tëut la dezijion de basa che la SMG (Südtirol Marketing Gesellschaft) dëssa deventé n’agenzia provinziela. I assessëures provinziei à nce da pro l rendicont anuel dla sozietà de nfurmatica, dla Business Location Südtirol y dla sozietà Central Parking.

USP - L iter burocratich-aministratif per mudé la destinazions urbanistiches per raions produtives o raions d’agricultura dëssa unì scurtà y scemplificà. Aldò dla dezijion de mascima che la Jonta provinziela à tëut (NCUEI) ai 16 de auril, dëssel vester mesun arjonjer de tel mudazions te 90 dis, mpede nchin a doi ani.

USP - Cun l proscimo ann de scola uniral nce tla scola prufesciunela a Urtijëi nsenià do l model paritetich. A chësta maniera vëniel garantì l nseniamënt tla trëi rujenedes provinzieles, ladin, tudësch y talian cun sëuraprò nce l nglëisc.

USP – Cun la publicazion nueva “Miti ladini delle Dolomiti” vëniel nvià via n proiet editoriel per fé valëi la mpurtanza storich-culturela dla lijëndes ladines y per les dé inant a n majer publich te n cuntest de valuta leterera. L Istitut Ladin Micurà de Rü nvieia al prejentazion, n merdi 17 de auril, dala 09 danmesdì tl palaz Widmann a Bulsan, n prejënza dl assessëur provinziel Mussner.

USP – Chisc dis vëniel scumencià i lëures per ngrandì y miuré la ncrujeda da Bula sun la streda de pas Pinëi. Aldò di cuntrac iel udù dant che i lëures dure trëi mënsc.

USP - L Museum Ladin Ciastel de Tor nvieia la populazion de Gherdëina à fé pea ativamënter l proiet interreg “E.CH.I. – Etnografies talianes-svizres”, tres chël che l vën fat na tueda sun l’arpejon culturela nia materiela dla valeda. Chiche se da cunté de usanzes, tradizions, festes, bai, lijëndes y stories de Gherdëina, o che à vel pez, vel foto de documentazion ie priei bel de tò su cuntat cun l Museum Ladin.