Comunicat stampa

Pra la veles provinzieles ai 27 de utober puderà i zitadins dl Sudtirol che vif oradecà chëst ann per l prim iede lité tres lëtra. Aldò dla lege dëssa chësta puscibltà nce unì data ai zitadins che vif tl Sudtirol, ma che ne sarà l di dla veles nia a cësa. Davia che la problematica reverda de plu regulamënc y nterpretazions de lege ie la dezijions sun la pruzedures unida data inant ala cumiscion de vela.

L Tirol dl Nord y Sudtirol sëurandà ann per ann uneranzes a persunajes che se à fat merit. Sun pruposta dl presidënt dl Tirol Günther Platter à la Jonta provinziela de Bulsan dat pro de plu mudazions ai criteries de sëurandata. Tl daunì dëssa chësta uneranzes nce pudëi unì sëurandates a zitadins de rujeneda taliana.

Nce sce la cumpëida dla persones che à da lëur tl Sudtirol crësc, crësc dal’autra pert nce la cumpëida de chëi che ne à nia da lëur. La Jonta provinziela à (NCUEI) ai 9 de setëmber te si senteda plu curta tratà la problematica. Aldò dl presidënt Durnwalder dëssel unì dat priorità a pruvedimënc per stieres per ëiles y a sburdles per l’economia.

Chisc dis scumëncia i lëures per purté i culegamënc internet aslune da Ciastel nchin te Gherdëina. La ncëria al firma vel cun data (DA NCUEI) dl 9 de setëmber. I culegamënc internet che ie bele tla valeda ie de avëi dla sozietà dal telefonn, la Provinzia tol ite nce Gherdëina tla rë de fibra otica per garantì culegamënc de cualità per l daunì.

La lingia de mostres da instà tl Istitut Ladin ruva n sada ai 14 de setëmber a si finela cun na nuvità. La cuinta mostra ne sarà nia da udëi a San Martin, ma a Urtijëi. La giaurida dla mostra “Uncutted” de Barbara Tavella ie l resultat de na culaburazion cun la Lia Mostra d’Ert.

Te na culaburazion danter la Provinzia de Bulsan, l Chemun de Urtijëi y l Museum de Gherdëina an abinà na soluzion per l problem dla lerch tla Cësa di Ladins. Te na prejentazion a Urtijëi iel (NCUEI) ai 06 setëmber unì fat al savëi che tla Cësa de Cultura de Urtijëi uniral anjenià ite na sënta destacheda dl Museum de Gherdëina.

L servisc de previjion dl tëmp cun na lingia de nfurmazions y servijes tla rujeneda ladina ie unì ngrandì y vën da (NCUEI) 5 de setëmber prejentà sun la plata web nueva www.provinzia.bz.it/meteo-ladin. "Te chëla che la Provinzia pieta śën l servisc meteo te duta si vela nce tla rujeneda ladina, vën nosta rujeneda de mendranza nce te chësc cajo trateda ala pèr cun l’autres" sorissea l assessëur Florian Mussner.

Tla cater scoles autes di luesc ladins ne à 62 sculeies nia finà via l ultimo ann de scola defin positivamënter y à d’instà mo pudù fé do n ejam de singula materies. Puec dis dan che scumëncia l ann de scola nuef ie 85,5 percënt de chisc candidac passei l ejam da instà y possa nsci passé tla proscima tlas.

A Al Plan de Mareo él chisc dis gnü tachè ite i aparać nüs por dè inant i coliamënć de internet aslöm ala popolaziun. “I ùn aspetè ert che la Telecom ativass chësta zentrala, mo śëgn éra tan inant che i zitadins po se colié al internet aslöm y ester colià cun döt le monn” sotrissëia l’assessur provinzial Florian Mussner.

Ntan la lingia de cunzerc Valgardena-Musika à feter 300 ciantarins y strumentisć de Gherdëina purtà dant doi cunzerc cun opres musicheles de marueia. L assessëur ladin Florian Mussner sorissea la scumenciadiva straurdinera dl urchestra Sonoton deberieda cun i cores dla valeda, metan a cuer l valor dl livel musichel y l spirt de culaburazion. I doi cunzerc à trat adalerch passa 2000 ascutadëures.