Comunicat stampa

De furmazion y nfurmazion se traterala n juebia ai 10 de utober pra dl di dedicà ai proiec “De viac de viers dl’Europa” y “MyEuropeTeachers”. La Repartizion Europa, cun i Departimënc per la educazion dla trëi grupes de rujeneda dla provinzia y cun la cunlaurazion dla Università liedia de Bulsan nvieia duc i nteressei n juebia 10 de utober 2013, dala 9,30 ala 17,30 tl Università liedia de Bulsan.

La RAI ladina scumencerà ai 4 de nuvëmber cun na segonda edizion dla nutizies tla televijon. Chësta segonda edizion de “Trail”, mo n tan longia, sarà da udëi dala diesc da sëira. Chësc ie unì cunedì (NCUEI) ai 07 de utober dal presidënt dla Provinzia Durnwalder, aldò de tant che ie chisc dis unì fata ora dala cumiscion paritetica RAI-Provinzia.

Tl Assessorat provinziel ai lëures publics iel (NCUEI) ai 27 de setëmber unì sëurandat i lëures per slargë l stradon de Gherdëina da Pruca ite, tl raion “Villnad”. La ncëria ti ie jita ala firma Oberosler SF de Bulsan.

Danter 14 listes puderan ai 27 de utober crì ora pra la veles provinzieles. Chësc à (NSNUET) ai 26 de setëmber fat al savëi l’autorità zentrela dla lites do che l à messù unì stlut ora doi listes (Di Pietro Italia dei Valori y Fratelli d’Italia). Nce l orden di sënies de lista sun la zedules da lité ie unì trat ora a sort.

Cun l moto „Weitblick/Ampie vedute“ vëniel a Bulsan pità la segonda edizion dl fetival dl inuvazion dedicà ala mont, la cumenanza y la tecnologia. Te 34 ëura de program per la scoles, 35 ëura de workshops y cunvënies, te 70 manifestazions cun 140 reladëures da diesc nazions, vëniel pità na vijion ampla. L festival ie unì giaurì (NCUEI) ai 26 de setëmber.

Ala creaziun de parores nöies él dediché le referat dal titul “Von Wutbürger bis Fiskalpakt“, ai 10 d’otober tla Biblioteca Provinziala Friedrich Teßmann. La sëra vëgn metüda a jì adöm cun la “Gesellschaft für deutsche Sprache”/Seziun de Balsan.

La mostra de pitures de Barbara Tavella che stluj ju la lingia de mostres da instà dl Istitut Culturel Ladin y che ie da udëi tla sala dla Lia Mostra d’Ert a Urtijëi, resta davierta n’ena plu giut, nchin ai 5 de utober.

“Gutenberg goes electronic“ é le titul dl referat che la Biblioteca provinziala Teßmann a Balsan mët a jì ai 3 d’otober. Tl cheder dla linia de referać „Texturen“ baia Stephan Füssel dl’Université Johannes Gutenberg de Mainz dla poscibilité y di risć di e-books por la letöra y la leteratöra.

Tla scoles elementeres de rujeneda tudëscia vëniel cris 40 nsenianc de talian sciche segonda rujeneda. L cuncors aldò ie (NCUEI) ai 23 de setëmber unì publicà tla Gazëta ufiziela. Nteressei possa se nunzië nchin ai 23 de utober.

L svilup tl raion dla Dolomites sciche arpejon mundiela, ciunes che sarà la sfides y la pusciblteies che pieta l recunescimënt da pert dl’Unesco sarà argumënt de descuscion pra la “Expo delle Dolomiti” a Longarone tl Belun. Partner de chësta fiera ie la Fundazion Dolomites-Unesco che prejënterà la fiera n mierculdi, 25 de setëmber a Bulsan.