Comunicat stampa

Tl Südtirol iel ntan l 2002 unì cumpedà na media de 1,41 mutons per oma. A livel talian ie chësta media cun 1,26 mutons per oma plu bassa permez ai autri paejes dl’Europa. L’età media dl’oma pra la nascita de n mut fova tl 2002 de 30,8 ani. L raport danter i jëuni y si oma ie da 60,3% di damandei uni detlarà sciche drët bon.

USP - La streda dla Val Badia unirà n sada y dumënia 8 y 9 de mei 2004 giaurida ntan l di al muvimënt di auti. Per l muvimënt pesoch di camions y dla curieres unirà la streda giaurida da ncuei inant, vënderdi ai 7, danter la 6 da duman y la 20.30.

USP - Le Museum Ladin Ciastel de Tor presënta ‘n vëndres ai 7 de má 2004 tla calonia de Sëlva la publicaziun „ La scola d’ert de Sëlva Gherdëina – 1908-2003 – 95 ani de storia“.

Ast - Per la veles dl Parlamënt Europeich de juni à la Ripartizion per cuestions europees dla Provinzia de Bulsan dat ora n cudejel nuef. Tlo vëniel dat n cheder generel sun l’Union Europea cun na prejentazion dl Parlamënt Europeich y sun l sistem de vela. Chësc strumënt de nfurmazion dëssa vester de aiut ala populazion a capì miec la mpurtanza dla Union Europea y vester na motivazion a se nuzé dl dërt de vela.

USP – Sun dumanda dl assessëur ladin Florian Mussner à la Jonta Provinziela da permò dat prò l program per l sustëni dla cultura y dla furmazion per la grupa de rujeneda ladina. Te chësc program iel la spëises per manifestazions cultureles y per njinies, cuntribuc, nvestizions tl ciamp culturel, per l’atività de furmazion y per sustenì artic’.

USP – Ntan i lëures pra la stredes a Pruca an tl’ultima ena abinà reperc archeologiches de gran valor. Sën vëniel analisà plu avisa la situazion. Per la fin de juni 2004 fejen cont de pudëi finé i lëures pra la streda.

USP - Les ciases di parcs naturai de Al Plan de Mareo, Toblach y Sand in Taufers é da incö inant davertes al publich y se mirita na vijita. Le gran monn dla natöra di parcs naturai pò chilò gnì esploré tl pice. Ai vijitadus che é al pröm contat cun i parcs, dà chëstes strotöres na pröma vijiun de ci che ai odarà defora tla natöra. Esperc; à la poscibilité da aprofondì sües conoscënzes y ai pici mituns ti vëgnel ofrì divertimënt y jüc;.

USP – La linies publiches “Burnech – Val Badia” y “Burnech – AL Plan – Rina” ie da ncuei merdi, 4 de mei inò n funzion. Tres l giaurì dla streda dla Val Badia (SS 224) per l muvimënt pesoch possa nce passé la curieres, nscì vëniel fat al savëi dal Dipartimënt provinziel per l trasport.

Tl ann 2003 iel tl Südtirol unì giaurì 54 pruzesc de concurs, 5,2% demanco permz al ann dant. Permez ala cumpëida dla firmes fejel ora per l ann 2003 na media de 1,5 caji sun 1.000 firmes. La majera cupëida de pruzesc de concurs ntan l ann 2003 ie unida arjonta tl cuarto trimester cun 20 caji. La metà dla firmes jites n concurs ntan l ultimo ann ne fova nia plu vedles de nuef ani. Cëla nce l comunicat nr. 13 dl 3 de mei 2004 – Astat, tla njonta.

USP – Drët cuntënt se à mustrà l assessëur per l turism Thomas Widmann sun la zifres atueles dl turism da inviern tl Südtrol che mostrà sù n gran aumënt pra i turisc’ che vën dai paiejes dl Benelux. Widmann ie dla minonga che chisc resultac desmosta che l ie stata la drëta decijion per l Südtirol a se giaurì a marceies nueves te chëi che l ie da abiné l daunì turistich.