Comunicat stampa
Durnwalder anconta l presidënt nuef dla Union Generela di Ladins.
USP – L presidënt nuef dla Union Generela di Ladins dla Dolomites, Nani Pellegrini se à ncuei merdi, 18 de mei, ancuntà cun l presidënt dla Provinzia Luis Durnwalder. Deberieda cun l assessëur ladin Florian Mussner iel unì rujenà te n tlima sarëinn sun l sustëni dla cultura ladina y di media. L’idea de dé ala Union Generela la cumpetënza de na istituzion cun duvieres aministratives ne ie nia unida azeteda dal presidënt Durnwalder y dal assessëur Mussner.
Cuntribuc per la cultura ladina
USP – Trëi sortes de cuntribuc per na soma de 392.000 Euro à la Jonta Provinziela dat prò sun pruposta dl assessëur Mussner te si senteda dl lunesc.
Dumandes de nseniamënt tla scoles ladines nchin ai 11 de juni
USP – Nchin ai 11 de juni 2004 possa nsenianc che ulessa nsenië tla scoles elementeres, mesanes o autes ladines de jù la dumanda per unì tëut su tla listes per l ann de scola 2004/05. L ntendënt ala scoles Roland Verra lecorda nce che la listes provisories unirà publichedes ai 15 de lugio 2004.
Sada ai 15 de mei iel l di dla familia
82,5% dla populazion dl Südtirol sëura 14 anì à detlarà la relazion de familia dassënn mpurtanta y l 15,9 % drët mpurtanta. La majera pert dla families ie daniëura metudes adum da i doi genitores cun mutons, nce sce la cumpëida ie jita ju dassënn ti ani passei. For de plu ie i caji de persones che vif da sëules. La media plu auta de persones per familia tl Südtirol ie unida cumpededa tl Chemun de Gsies te Puster.
La streda dla Val Badia vën giaurida ntan l fin dl’ena
USP – La streda dla Val Badia vën n sada y dumënia giaurida ai auti danter la 6 da duman y mesa la nuef da sëira. L Servisc Provinziel per la Stredes fej nce al savëi che ntan la nuet resta la streda s’areda.
L assessëur Mussner vijitea la scoles dla Val Badia
USP – A Al Plan de Mareo, La Pli, Rina y San Martin de Tor à l assessëur ladin Florian Mussner ncuei juebia, 13 de mei, vijità la scoles y scolines. La se à dantaldut tratà de rujené cun i diretëures, nesnianc y nce cun i sculeies nstësc sun l sviliup dla scola ladina.
N dumënia ai 16 ie l „Di nternaziunel dl Museum“
USP – Bele dl 1977 à l cunsëi nternaziunel di museums „ICOM“ numinà per l prim iede l „Di nternaziunel dl Museum“, chëst ann vën chësc di nce valorisà tl Südtirol. N dumënia che vën, ai 16 de mei ie duc i museums provinziei davierc al publich a n priesc simbolich o defin debant. Tl Museum Ladin a San Martin de Tor uniral danter la doi y la sies domesdì purtà dant poejes ladines. L ntreda ie tlo debant.
L assessëur Mussner rejona cun sculeies y nsenianc de Gherdëina
AST - Pra la vijites ala scoles de Gherdëina à l assessëur ala scola ladina Florian Mussner, ncuei mierculdi, 12 de mei abù ucajion de ancunté sculeies, nsenianc y diretëures te si atività. La ulentà de Mussner ie de avëi n cuntat de persona per udëi miec la situazion y i bujëns dla scoles. L Assessëur cumpanià dal Ntendënt y dal Ispetëur per la scoles ladines, à pudù se fé n cheder dl lëur che vën fat di per di tulan nce a cunescënza i bujëns dla singula strutures. Danter chisc l bujën de na sënta per i servijes ntegrei te Gherdëina.
N possa inò passé l Jëuf de Frea
USP – Da ncuei merdi, 11 de mei iel inò mesun passé l Frea cun l auto. Per rejons de segurëza vën la streda, aldò dl Servisc Provinziel per la strdes, s’areda danter la 15.00 y la 21.00.
L assessëur Mussner vijitea la scoles de Gherdëina y dla Val Badia
USP – N mierculdi, juebia y vënderdi jirà l assessëur Florian Mussner a vijitè la scoles ladines dala scolina nchin ala scola auta. Al zënter dla vijites sarà l’ancuntedes cun i nsenianc y diretëures.