Comunicat stampa

USP – Feter degun proiet tl Südtirol ne à abù tan suzes sciche chël dla cësa tlima. L assessëur al ambient Michl Laimer à do sies ani che ie unì nvià via l proiet, bele pudù premië la milejima cësa tlima tl Südtirol.

USP – Ti trëi ani dal 2005 al 2007 iel tla Provinzia de Bulsan n media stai 3.781 morc al ann. 21,6% caji fossa stai mesun schivé y chësc ulëssa di che n teoria pudëssa 820 persones mo vester n vita. Chësc fat dà da pensè: al didancuei ie mo for uni cuinto cajo de mort unit a se l dé per na rejon che fossa stata da schivé. Chësc reverda dantaprima i ëi: si mort fossa te mo n tan de caji stata da schivé (29,7%), permez a pra l’ëiles (13,6%).

USP – Per via dla puecia lerch y per miuré la tecnica vën restruturà y ngrandì l spedel de Burnech. I lëures va inant drët bën. Chësc à pudù cunstaté l assessëur ai lëures publics Florian Mussner deberieda cun l assessëur ala sanità Richard Theiner. La sëntes dl servisc de prim aiut y dla reabilitazion di mëndri ie bele finedes.

USP – L cumité nuef de evaluazion dla scoles ladines se à (ncuei) juebia, 5 de juni ancuntà per la prima senteda y à lità si presidënt. A cë de chësta grupa ie unì lità Lois Ellecosta. L duvier per i proscimi cater ani ie chël de mëter dant i argumënc aldo de chëi che dëssa unì valutedes la scoles ladines. L’assessëur ala scola ladina, Florian Mussner vëij tl’evaluazion n aiut y na motivazion per tenì aut l livel de nosta scoles.

USP – Danter i premiei dl cuncors “Prima la Musica” a Dispruch, se à nce doi ensambles dla Scola de Mujiga de Gherdëina fat unëur. Dla valeda ladina iel unì premià trëi sculeies al flaut, un dal’armonica y cinch che sona la perscuscion.

USP – Chi che ulëssa fé do la matura possa se njenië ca cun l aiut dla scola da sëira. N mierculdi ai 4 de juni vëniel a Persenon tenì na sëira de nfurmazion sun la scola da sëira che fej l program dl istitut tecnich per l cumerz y la scola auta per l soziel. A Bulsan vëniel dat nfurmazion per la preparazion ala matura per geometri.

USP - Na delegazion dl Israel à ntan l ultimo fin dl’ena vijità l Museum Ladin a San Martin de Tor meneda dal assessëur ladin Florian Mussner.

USP - La Jonta provinziela de Bulsan à tla senteda de (ncuei) lunesc, 3 de juni fat ora de scrì ora n cuncors de ideies per na streda de zircunvalazion per Sëlva. Per i proscimi 10 ani ie l program dla zircunvalazions tl Südtirol bele fat, perchël saral rie ntegré sëuraprò mo la streda per Sëlva. Danter l’autra decijions dla jonta iel nce pruvedimënc per al forza de compra, paiamënc ai chemuns per l IRAP, cuntroi de cuntribuc da plu provinzies, y la fundazion dla Business Location Südtirol.

USP - L’impëgn de mantignì y restrotoré les viles dla Val Badia onorëia l’Assessorat Ladin dla Provinzia de Balsan cun le pest “na vila de valüta”. Le pest che é gnü scrit fora por le pröm iade é de 7.000 euro. “Les viles é de gran valur, porchël orunse onorè chi che ciara de ëres cun gran pasciun, insciö l’assessur Florian Mussner.

USP – N valgun dis te berstot, te butëiga o te ustaria possa per sculeies dla terza mesana no me vester na bela speriënza, ma nce n aiut a to na decijion per si daunì tl lëur. Tl Palais Widmann a Bulsan iel (ncuei) mierculdi 28 de mei, unì prejentà l proiet per sculeies dla mesana de vester lerneri per vel dis.