Comunicat stampa

USP – L presidënt dla provinzia Durnwalder à fat udëi ite a passa 300 reprejentanc dla regions dla Comunità Europea che se à abinà tl parlamënt a Bruxelles dla maniera de aministré la montes. L cumité dla regions dla Union Euorpea à ncuei (19 de juni) dat pro l proiet sun l daunì di raions da mont tl’Europa. “É purtà dant a inuem dla regions n pachetl de pruvedimënc y é damandà ala Cumiscion europea de nvië via na politica spezifica per la montes”, à dit Durnwalder. Ala discuscion sun chësc argumënt à nce tëut pert l cumissèr dla UE ala regions Danuta Hübner.

USP – Sun la streda dla Val Badia, pra l Punt de Fer uniral ntan la proscima enes cumedà i mures de sustëni. Sun l toch de streda, che fej pert dl chemun de Badia, saral ntan i lëures me plu mesun passé sun mesa larghëza.

Ntan la proscima ena, dai 23 nchin ai 27 de juni, tën i culaburadëures di ufizies provinziei per l sparani de energia udienzes te plu luesc.

USP – Furné per 100 Euro cun duc i mesuns publics de trasport tla Provinzia de Bulsan. Chësc ie da ncuei (16 de juni) puscibl per seniores sëura 60 ani. Per giapé l “Abo 60+” bastel avëi pea l documënt y l numer de codesc fischel.

USP – L Servisc per la stredes Salten-Scilier trapina ntan i proscimi dis te si sënta nueva tla streda Francesco-Baracca 3 a Bulsan. Dal 19 de juni nchin ala fina dl mëns pudëssel, per via dl trapiné, vester da aspité n pez sun cuestions aministratives.

USP – Aldò dl Istitut provinziel de statistica iel tl prim trimester 2008 uni fat n esportazion de marcanzia dal Südtirol per n valor de 833 milion de Euro. Chësc fej ora n aumënt de 15,6% permez al medemo tëmp tl ann passà. Chël che l ie unì menà ite tl Südtirol ie auzà dl 10,4% per n valor de 934,6 milion de Euro. L bilanz de cumerz mostra nscì su n defizit de 101,6 milions de Euro. Tl medem trimester dl ann passà fova l defizit mo de 126,3 milion y ie pona calà dl 19,6%.

USP - Te si senteda de ncuei (lunesc 16 de juni) à la Jonta dla Provinzia de Bulsan dat pro na lingia de pruvedimënc soziei, economics, de furmazion y cultura. L presidënt Luis Durnwalder à prejentà i ponc de majera mpurtanza.

USP – Opres letereres juda a arichì y ti dé vita ala rujeneda. Cun chësc pensier a l’Assessorat ladin metù a ji la segonda edizion dl cuncors leterer “Auturs ladins scrî…”. Iaco Rigo y Ivan Senoner, tla categuria jëuni, à venciù l prim pest. Si opres unirà publichedes y prejentedes pra la premiazion d’autonn.

L ann de scola che se fina ie de segur stat bëndebò positif. De gra al bon tlima de descuscion y de culaburazion danter respunsabli dla scola y nsenianc, genitori y studënc iel stat mesun ruvé a soluzions consensueles sun deplù ponc de gran mpurtanza per l daunì de nosc model de istruzion dla valedes ladines. Nsci an pudù arjonjer formulazions che vën purtedes da duta la pertes n cont dl desseni de lege sun la scolina, la scola elementera y la scola mesana, che vën iust sën tratà tl Cunsëi Provinziel.

USP – La populazion dl Südtirol à arjont ala fin dl ann 2007 la cumpëida de 493.910 y ie nscì ruveda daujin a mesa milion. Nce la capitela provinziela de Bulsan ie bele passeda via i 100.000 abitanc. L aumënt dla populazon ie per 70% gaujà da tei che vën a sté da oradeca, la cumpëida dla nascites resta bassa. La situazion ie unida analiseda dal Istitut Provinziel de statistica ASTAT.