Comunicat stampa

USP – Nia plu 80 ma 100 Euro al mëns paia la Provinzia per la families. L cuntribut auzà de n chert ie un di pruvedimënc dla Jonta provinziela per dé plu forza de compra, y ie unì publicà tla gazëta ufiziela dla region. L regulamënt va n drova ai 29 de utober, ma davia che l dipartimënt provinziel per l soziel à bele laurà danora, possa i cuntribuc auzei per mutons bele unì paiei ora per l mëns de utober.

USP – L Guviern provinziel de Bulsan à dat pro la terza pert di cuntribuc da chëst ann per sustenì la cultura ladina. Te chëst capitul iel scioldi per ativiteies cultureles y nvestimënc de lies cultureles. Chëst ann à l Assessorat Ladin de ndut bel pudù sustenì lies, artisc’ y aministrazions publiches cun 1.121.600 Euro.

USP – La Jonta provinziela de Bulsan à numinà la nueva cunsulta provinziela di jëuni y dla jëunes per la grupa de rujeneda ladina, che resterà nchin al 2011. La dëssa purté dant prupostes al guviern provinziel n cont dl lëur per y cun la junëza, ndicazions per l plann anuel provinziel, per leges nueves, cuntribuc y nrescides sun jëuni y jëunes y cuestions de mpurtanza per la junëza.

USP – N dumënia 26 de utober vën lità l Cunsëi provinziel nuef. Duta la nfurmazions de chi che possa lité, i orars can che n possa lité y i documënc che n muessa tò pea, vën prejentei tres n video tl internet.

USP – Tla doi valedes ladines dla Provinzia de Bulsan ie n dumënia ai 26 de utober passa 15.000 persones cherdedes a jì a lité. Me l 4,4% di litadëures dla Val Badia y de Gherdëina ie jic a sté oradecà.

USP – La veles provinzieles resta ai 26 de utober, pruvedimënc per la crisa finanziera y la tratatives per l’energia ie stai i trëi argumënc prinzipei dla senteda dl Jonta provinziela de Bulsan, ncuei lunesc 20 de utober. I argumënc de majera mpurtanza à l presidënt purtà dant te cunferënza stampa.

USP – I lëures per fé da nuef l puent dla streda statela a Corvara ie jic inant tan bën che ncuei, lunesc (20 de utober) possel bel unì giaurì. Permez al puent da dant pieta l puent nuef plu lerch ai mesuns che passa, plu segurëza a chëi che va a pe y nce la lerch segureda per passé cun la roda. L assessëur provinziel ala stredes giaurirà l puent nuef ncuei dala trëi domesdì.

L Istitut de statistica Astat fej al savëi che tl ann 2007 se à stabilisà l ciamp dl frabiché. Do cater ani che l ie unì frabicà dassënn truep, iel tl ann 2007 unì frabicà 4,5 milion de metri cubich, che ie feter tant sciche tl ann 2002. Pra la cunzescions da frabiché iel stat 1,5% de plu cëses cun cuatieres, permez ala frabiches zënza cuatieres ulache l ie stat 4,6% de manco.

USP – La Provinzia de Bulsan à scrit ora n cuncors de ideies per na streda de zircunvalazion te Sëlva. Cun chësc var scumëncia la prima pert de proietazion per abiné na soluzion al gran muvimënt di auti che passa tres l luech de Sëlva. “Tres l cuncors de ideies puderan udëi co miuré cuncretamënter l problem de viabilità per Sëlva” sorissea l assessëur ala stredes.

USP – Cun l aiut de cianties, juesc y stories possa i mëndri dla scolina avëi n cuntat cun l’autra rujenedes de nosta provinzia. I trëi Istituc pedagogics dla Provinzia de Bulsan à dat ora n liber cun CD nuef che pieta na basa per chësc cuntat cun la trëi cultures. Ncuei (16 de utober) iel unì prejentà a Urtijëi tla Scolina Salieta la publicazion “Miteinander – Insieme – Deboriada”.