Comunicat stampa

USP - Ai 10 de setëmber 2010 vëniel tl zënter dla scoles autes a Urtijëi metù a jì l Di dla Scola ladina te na forma nueva. L unirà pità na sort de marcià dla ideies, na mostra de “bona pratiches” sun i argumënc dl plurilinguism, dla scienzes y dla criatività. L di dedicà a duc chëi che lëura per la scola ladina unirà giaurì dal presidënt dla provinzia Luis Durnwalder y dal assessëur Florian Mussner.

USP – L’ena che vën uniral metù man cun de plu lëures de asfalt nuef tla valeda de Puster y tla Val Badia. Chiche ie sun streda muessa fé cont che l ie da aspité pra l semafer.

USP - N dumënia ai 5 de setëmber, avisa l anuel de 64 ani dal’acurdanza de Paris, unirà sëurandates la uneranzes dla Provinzia de Bulsan per l 2010. Cun l gran orden al merit uniral tl Ciastel Tirol unerà 12 persunaliteies che se à fat meric particuleres per l svilup dl Südtirol y che ne vif nia tla provinzia.

USP – N sada ai 4 de setëmber uniral giaurì l raion de paussa Bagn Rumestluns a La Val. La funtana de ega minerela pra la ustaria Al Bagn ie unida trasfurmeda te n raion de relax.

USP – Sun si viac tl Kamchatka, tla Siberia, à l presidënt dla provinzia Luis Durnwalder abù si prima ancuntedes istituzioneles: cun l aministradëur dla region russa al nvià via i prim vares per mëter n drova n’acurdanza de cooperazion te de plu ciamps sciche l cumerz, cultura, furmazion, sport y turism, che fova unida sotscrita de nuvëmber a Mosca.

USP – “La vela dl cumandant nuef de duc i Schützen de Südtirol y de chël dl Tirol ie na bona ucajion per pensé a na union danter Schützen de ca y de la dl Prëner” dij l’assessëur ala cultura Sabina Kasslatter Mur. L’assessëura nvieia i Schützen a numiné n sëul cumandant per l Tirol y per l Südtirol.

USP – Tla Val D’Aosta se anconta dai prim ai trëi de setëmber reprejentanc de plu mendranzes dl’Europa per n barat culturel y aministratif. L Assessorat culturel dla Region Aosta à chëst ann nvià l Assessorat ladin dla Provinzia de Bulsan a reprejenté la grupa de rujeneda ladina pra l “Festival des Peuples minoritares”.

USP – L Museum Ladin Ciastel de Tor mët a jì n culaburazion cun l Parch naturel Puez-Odles uni merdi ntan l instà n di dedicà ala geologia dla Dolomites. Chësta pruposta à abù gran nteres.

USP - N ann do che l ie unì giaurì la streda de zircunvalazion a S.Crestina mostra la cumpëides di auti che la vën nuzeda de plu che n se ova aspità tla proietazion. Sëuraprò ai auti y mesuns pesoc che passa via l luech, vën na gran pert dl muvimënt a se l dé da chëi che furnea ite y ora de S.Crestina. Purempò passa feter 2/3 de dut l muvimënt tres la zircunvalazion. “N media passa 5.700 auti al di tres la zircunvalazion y nia plu danter la cëses de S.Crestina, chësc cumporta n gran miuramënt dla cualità de vita tl zënter” spiega l assessëur Florian Mussner.

USP – “Se muever zënza auto”. Chësc devënta plu saurì te chëla che possa se nuzé di mesuns de trasport publich a bon priesc y cun gran flessibltà. Gran suzes à la cumbinazion de chertes sciche la Mobilcarad, la museummobil Card o la chertes per i turisc’ che pieta l trasport y ntredes a ativiteies cultureles y de tëmp liede. La bona zifres dà rejon al dipartimënt provinziel ala mubilità che pieta chësta cumbinazion de chertes.