Comunicat stampa

USP – La pert taliana dl finanziamënt dl Tunel dl Prëner dëssa bele unì dat pro l’ena che vën. Nce la proietazion dl toch da ruvé permez al tunel danter Pruca y Franzensfeste dëssa unì nvià via. Chësta vijion à ncuei (5 nuvëmber) prejentà l cumisser per l tunel dl prëner, nciarià dal Guviern talian, Mauro Fabris al presidënt dla provinzia Luis Durnwalder.

USP - Tla scoles mesanes ladines ie unì fat n’evaluazion linguistica te chëla che l ie unì analisà la cumpetënza dla rujenedes di sculeies dla terza tlasses, la paredlan a sculeies de rujeneda tudëscia y taliana. I resultac laurei ora deberieda cun esperc dl’Università vën publichei te n pitl liber, te trëi rujenedes, che unirà prejentà n vënderdi ai 12 de nuvëmber tl’Università a Persenon.

USP – L curaje zevil ie argumënt dla cunferënza ai 8 de nuvëmber a S. Martin de Tor. Nviei ie duc i nteressei. La cunferënza ie metuda a jì dal Ufize provinziel per l’ëiles deberieda cun la Cunsulta provinziela per la valivanza di dërc.

USP – “Ti mustré ai jëuni co adurvé ala drëta maniera l fonin”: chësc sarà argumënt de n di de curs metù a jì dal Ufize provinziel per media audiovisuei. Referënt dl curs per nsenianc y educadëures ie Günther Laimer. Chësc curs vën pità ai 3 de dezëmber a Bulsan.

Chëst ena che vën, dai 8 ai 12 de nuvëmber, tën l aucat populer udienzes te de pu luesc. A S.Martin de Tor saral n vënderdi 12 de nuvëmber.

USP – A Toblach iel chisc dis unì metù man de lauré cun na stazion dal tëmp nueva. Chësta stazion fej pert de n program de ndut 34 stazions che l Servisc provinziel per l tëmp ie tl lëur de baraté ora.

USP - L gran orden de merit dla Provinzia de Bulsan ie ncuei (3 nuvëmber) unì sëurandat dal presidënt Luis Durnwalder al Intendant dl Bayrischer Rundfunk (BR) Thomas Gruber. „Ël ne à nia me cialà che l Südtirol sibe argumënt sun l BR y l ARD, Gruber à nce dat n gran sustëni acioche tla provinzia de Bulsan pudons udëi la televijion tudëscia“ à detlarà Durnwalder.

USP – “Alfons Benedikter ie stat una dla figures zentreles dla storia dl Südtirol ti ani do la segonda gran viera, n architet dl’autonomia y pere de nosc sistem urbanistich” cun chësta paroles lecorda l presidënt dla provinzia Durnwalder Alfons Benedikter che ie stat passa trënt ani assessëur dla Jonta provinziela de Bulsan.

Tl cheder dl proiet RAIS de promoziun dl plurilinguism é gnü presentà ai 27 de otober tla ciasa dla Cultura a La Ila i materiai didatics nüs sön la liënda de Fanes, plü avisa a n publich de insegnanc y scolars dles scores mesanes y altes dla Val Badia da pert di auturs.

USP – A Urtijëi iel ncuei danmesdì (28 utober) unì giaurì n cunvëni de trëi dis per ti jì plu sot a metodologies y didatiches dl plurilinguism. Te na culaburazion danter scola ladina y taliana vëniel pità n ajurnamënt ai nsenianc per miuré la cualità dl nseniamënt dla rujenedes. L fej pea feter 200 esperc de cin mendranzes etniches cun persunaliteies dl Minister dl’istruzion y dl’università de Unieja.