Comunicat stampa

USP – La cunseguënzes da manovra de sparani y liberalisazions per l’autonomia dl Südtirol ie (NCUEI) ai 18 de jené, stai argumënc dl’ancunteda dl presidënt Durnwalder cun l Vizekanzler Michael Spindelegger a Viena. N iede cialeran da pert dl Südtirol nstësc de marciadé cun Roma, sce l ne unissa pona nia respetà la normes de autonomia, speren sun l sustëni da pert dl’Austria. Cunsulënzes ie nce unides fates n cont dl tunel dl Prëner.

USP – L cunsëi de aministrazion dl’Agenzia Cësa à azetà la dimiscions dl diretëur Norbert Lantschner. Chësc ie unì fat ora do avëi audì l patron y do na senteda straurdinera (INIER) ai 16 de jené.

USP - L Cunsëi provinziel dla scola se à (INIER) ai 16 de jené ancuntà per rujené ora l’unificazion dl calënder de scola. La se tratova de dé ju n bënsté che la Jonta provinziela adrova per pudëi tò na dezijion definitiva. La votazion finela ie jita ora contra la pruposta. Aldò dla descuscion dl Cunsëi provinziel dla scola, che à durà de feter cater ëura, se aspieten mo vel mudazion ala pruposta.

USP – Te si senteda da (NCUEI) ai 16 de jené à la Jonta provinziela dat pro na lingia de delibres. Tla cunferënza stampa do la senteda à l presidënt cunedì de plu argumënc de majer nteres.

USP – I chemuns à l duvier de analisé avisa i raions che ie te pericul ulache l ne dëssa nia unì frabicà. Frabicac che ie bele te de tei raions pierd de valor y nsci ie l lauré ora di planns aldò plutosc problematich. La Jonta provinziela à (NCUEI) ai 16 de jené fat ora de judé a finanzië i planns di raions te pericul che mancia mo te 75 chemuns y de spënjer la data per de ju i planns nchin ala fin dl 2015.

USP – La Jonta provinziela à dat pro i urdenamënc per set studi dl’Università liedia de Bulsan. Danter chisc, iel (NCUEI) ai 16 de jené nce unì azetà la ntroduzion de n studi nuef tl ciamp dla ngenieria de energia.

USP - Do che la sozietà de jol Air Alps ie jita sun l cul, se prova la Jonta provinziela a purté inant la pruzedures acioche l vënie prësc inò pità joi a Roma. Riesc do la senteda dla Jonta à l presidënt (NCUEI) ai 16 de jené cunedì che l ie bele trëi sozieteies de jol nteressedes ala linia.

USP – I sculeies dl Lizeum d’ert cun Scola prufesciunela de Urtijëi à ntan l’ena passeda fat scultures de dlacia per n cuncors metù a jì n culaburazion cun la lia turistica y l chemun. L prim pest à venciù l scultura dl auto VW Käfer. Ai sculeies ti iel cun chësta scumenciadiva unì pità na ucajion particulera de nseniamënt, per l zënter de Urtijëi pieta la scultures na bela atrazion artistica.

USP - Nchin ala fin de jené possa la lies damandé n cuntribut provinziel per judé a finanzië ativiteies tl ciamp dla cultura ladina ntan l 2012. N mierculdi ai 25 de jené vëniel tla Val Badia - y n lunesc ai 30 de jené te Gherdëina - pità n servisc de nfurmazion y aiut per fé la dumandes, ulache n posse nce les de ju.

USP – Ntan l inviern vëniel laurà y anjenià ca l daz sun la streda dl jëuf dl Stelvio per vester anjeniei per l instà. Do la senteda dla Jonta provinziela à l presidënt (NCUEI) ai 09 de jené cunedì che la provinzia ujina de Sondrio ie a una cun chësc pruvedimënt.