Comunicat stampa

10 unitês didatiches por la 4a y la 5a tlassa dles scores elementares por l’educaziun linguistica integrada é le resultat de n grup de laûr metü adöm dal monn dla scora ladina, dl Université da Porsenù, dl IPL y dl Ćiamp Inovaziun y Consulënza dl Departimënt Educaziun y Cultura Ladina. Le resultat final gnarà presentè ai 19 de jenà a San Martin dales 16.

L’organisaziun nöia dl’aministraziun provinziala y dl setur dl’ energia é stà i temesc prinzipai dla tlausöra dla Junta provinziala, che é gnüda stlüta jö incö da misdé. Tratan la tlausöra él inće gnü stabilì les tematiches zentrales dl’ativité ti proscims mëisc cun danter l’ater: le plann de performance, la fujiun SEL-AEW, la lege sön le personal y la promoziun dla leteratöra ladina.

Ćina ai 30 de jenà dl 2015 pol gnì dè jö les domandes por fà l’ejam de ladin por l’insegnamënt tles scolines y tles scores. Chi che é interessà a tó pert al ejam mëss fà domanda diretamënter pro le Departimënt Educaziun y cultura ladina adoran i formulars aposta che é da ciafè te vigni direziun y sön la plata web dl’Intendënza ladina.

Ćina ai 31 de jenà dl 2015 à i provider acredità CME la poscibilité da presentè domandes de contribut pro l’Ofize Formaziun personal sanitar por l’organisaziun de cursc de formaziun permanënta por profescionisć dl setur dla sanité y por publicaziuns d’interès sanitar.

USP - La Repartiziun Cultura y Intendënza ladina adöm cun la Consulta culturala provinziala por le grup linguistich ladin lascia alsavëi che les domandes por n contribut provinzial por l’ativité culturala 2015 mëss gnì dades jö ćina ai 31 de jenà dl 2015. Les domandes de contribut por investimënć, proieć culturai, ativitês artistiches y de formaziun po gnì dades jö tratan döt l’ann.

La conferënza stampa sön i resultać prinzipai dla pröma „tlausöra“ dla Junta provinziala dl 2015 che ê preodüda por indoman, vëndres 9 de jenà dales 13 é gnüda antizipada de öna n’ora y gnarà tignida indoman dales 12.

Da en mertesc ai 13 de jenà dl 2015 po les ëres s’anuzé indô dl sorvisc de consulënza iuridica che vëgn metü a desposiziun debann dala Comisciun provinziala por l’avalianza dles oportunitês y dal Ofize Ëres dla Provinzia.

Do na palsa deura indô les Ćiases di Parcs naturai Pöz-Odles, Fanes-Senes-Braies, Trëi Pizes de Lorëi y Vedrette de Ries-Aurina. La sajun da d’invern gnarà caraterisada da na seria de mostres dër interessantes sön argomënć desvalis: dai fossii de retii ai scenars dla Pröma vera mondiala, dala laûrs rossa al refodam sön munt.

L’assessur por la Proteziun zivila Arnold Schuler à firmè sön inćiaria dla Provinzia n’acordanza nöia cun le presidënt dla Crusc Blanćia Georg Rammlmair por le renovamënt dla convenziun por la gestiun dl sorvisc d’assistënza ti caji d’emergënza y de catastrofes naturales, do che chëra da denant é tomada ai 31 de dezëmber dl 2014.

La Biblioteca provinziala Dr. Friedrich Teßmann presentëia inće chësc ann l’AudioBar tla Ćiasa dla Cultura Walther von der Vogelweide a Balsan, olache an po ascutè sö y se dè jö cun n’oferta ampla de libri audiovisifs por mituns, jogn y porsones adultes che é gnüs premià tl 2014. La mostra sarà daverta dai 17 de jenà ai 11 de forà dl 2015.