Comunicat stampa

Daidé les porsones che é sciampades da situaziuns de prigo ne é nia ma n compit istituzional mo n at de solidarieté y de umanité da pert de vigni zitadin: Chësc é stè l’apel portè dant incö (03/11) dal Presidënt Arno Kompatscher y dal vësco Ivo Muser te na conferënza stampa a Balsan olache al é inće gnü presentè les zifres dl’acoliënza tl Südtirol y anunziè na strotöra de pröm aiüt söl Prener.

8 ëres y 64 ëi à passè da püch l’ejame da ćiacia tl Südtirol: a la maiù pert de chisc ti él gnü surandè incö (31 d’otober) tl Kolpinghaus a Balsan dal assessur provinzial Arnold Schuler l’atest d’abilitaziun por l’eserzize dl’ativité da iagher.

Incö danmisdé, vëndres ai 31 d’otober, él gnü tignì tla sënta dl Eurac a Balsan n’incuntada danter l’assessuria Martha Stocker cun doturs y scienzà südtirolej che laôra foradecà y te d’atres regiuns talianes. L’incuntada é gnüda organisada dal’assoziaziun Südstern, tl zënter dla debatüda él stè l’orientamënt dl proiet de reforma dla sanité tl Südtirol.

Le mëis de otober, che se röia cun incö, jarà ite tla storia dl tëmp sciöche n mëis plü ćialt co le valur mesan. Cotan plü altes co mesanamënter é stades les temperatöres dandadöt tles prömes trëi edemes, la presënza de niores à portè implü a n mënder arbassamënt dla temperatöra tratan les nöts. Le Sorvisc meteo à mosorè temperatöres che s’avijinëia al valur mesan ma tl’ultima edema d’otober.

N grup de laûr ti à surandè na petiziun cun indöt 1745 firmes al’assessur Achammer cun la ghiranza da arjunje le reconoscimënt dles ativitês sportives extra-scolastiches sciöche materia facoltativa dl percurs didatich. „Al é öna dles mies prioritês da colié de plü les ofertes sportives cun l’ativité scolastica“, à dit l’assessur, che presentarà tosc na proposta de soluziun.

En mercui, ai 5 de novëmber dales 09:30 gnaràl tignì tl Palaz Widmann na conferënza stampa sön la situaziun dl’ocupaziun dles ëres y di ëi te de gran aziëndes tl Südtirol. Al tolarà pert l’assessuria Martha Stocker y l’aconsiadëssa por l’avalianza dles oportunitês Michela Morandini.

Ai 6 de novëmber dales 10 inant gnaral tignì a Balsan n convëgn de comparaziun sön les situaziuns desfarëntes dla proteziun iuridica dla maternitè y sön les mosöres de sostëgn ai geniturs tl Südtirol, tl Tirol y ti Grijiuns.

„Barieres linguistiches: sciöche aspetatives (falades) porta a crises de comprenjiun tles istituziuns“: chësc é le titul dla conferënza publica che gnarà tignida en jöbia, ai 6 de novëmber dales 20:00 tla biblioteca provinziala dla Teßmann a Balsan. Le reladù sarà Florian Menz, linguist de provegnënza südtiroleja.

„Le capitul investimënć reverda por le 2015 un n terzo dl bilanz de previjiun y al é inće preodü alisiraziuns fiscales por indöt 250 miliuns de euro“, à splighé incö (29/10) le Presidënt Kompatscher tratan la presentaziun dl bilanz de previjiun nü. Tres le pat de garanzia podaràl gnì metü a desposiziun plü ressurses finanziares por le frabiché abitatif, la costruziun de strades y la cultura.

Na gran desburocratisaziun, na majera transparënza y n’adoranza dla forza dl’ega dess ester les conseguënzes dla regolamentaziun nöia sön les conzesciuns de de pices derivaziuns y de chëres mesanes, che é gnüda presentada incö (29/10) dal assessur provinzial Richard Theiner.