Comunicat stampa

Amplié i stromënc de finanziamënt y i ënc che pó fá domanda, n test unich y la scemplificaziun dla burocrazia é i obietifs prinzipai dl dessëgn de lege nü che reverda la promoziun dla cultura. Le ddl nü é gnü aprové incö (26 de ma) dala Junta provinziala sön proposta di assessurs Florian Mussner, Christian Tommasini y Philipp Achammer. La presentaziun sará en jöbia ai 28 de ma.

La Junta provinziala á aprové incö le dessëgn de lege omnibus sön l’economia. La proposta prevëiga na seria de intervënc d’adatamënt ales normatives europeiches y che porta para n smendrimënt dla burocrazia y la formulaziun nöia dl passaje legislatif che reverda la cuta sön le turism, por chëra che al vëgn lauré dötaurela adöm ales assoziaziuns competëntes por n model de finanziamënt alternatif.

Imprësć alisirá dal fonds de rotaziun, bandides y contribuc direc: chisc é i trëi pilastri dl sistem de sostëgn nü por ti dé na sbürla al’economia dla Provinzia de Balsan. Incö á la Junta tut la dezijiun da daurí indô le fonds de rotaziun por domandes d’azes dai seturs dl’industria, artejanat, comerz y sorvisc. La deliberaziun stabilësc ince danü i limic d’investimënt y le tët di contribuc.

La Junta provinziala á aprové incö (26 de ma) le documënt dles oblianzes por la gestiun de 8 implanc idroeletrics. Les conzesciuns de chisc implanc é gnüdes ejaminades danü dan da püch. Cun l’aprovaziun da incö él le manajadú di implanc, la SE-Hydropower, che messará paié fonds de indöt 244 miliuns de euro sciöche mosöres de compensaziun ambientala por la perioda dal 2010 al 2040.

Recordanzes dër prezioses che descrii le svilup dla scora ladina y i recorc personai é gnüdes racoiüdes dal maester Franz Vittur, intendënt dla scora ladina dal 1975 cina al 1992, te na publicaziun nöia che gnará presentada ai 05 de jügn dales 18 tla biblioteca Sas dla Crusc a Badia.

Motivé les potenzialités artistiches di studënc y stimolé l’interes dla popolaziun sön i resultac dles scores altes ladines: la mostra d’ert „42 uedli – occhi – augen“ é na racoiüda d’operes d’ert de 21 studënc dla Scora d’Ert „Cademia“ che é gnüda daurida inier, ai 21 de ma tl salf dles mostres dla Lia mostra d’ert de Urtijëi. La mostra sará da odëi cina ai 4 de jügn, l’ingres é debann.

La biblioteca provinziela "Dr. Friedrich Teßmann" a Bulsan urganisea n mierculdi, ai 27 de mei dala 20 da sëira la prejentazion dl liber nuef dl prufessëur de università Lukas Madersbacher sun l pitëur y scultëur Michael Pacher.

Inuvatif, plurilinguistich, cuscient dla tradizions y lià ala vita soziela y economica dla valeda y ala particulariteies linguistiches y cultureles de Südtirol: l ITE Raetia à ncuei (22/05) festejà si 60 ani de atività. „Trëi sezions y leprò na bela cumpëida de ufiertes furmatives,dut chësc à purtà pro che la scola ie deventeda na istituzion scialdi moderna," nsci dij l assessëur Florian Mussner.

Cun la campagna de sensibilisaziun „No Credit“ ó le Departimënt por la Mobilité aumenté la segurëza sön strada. Tratan le fin dl’edema de Pasca de Ma gnarál partí fora jorantins cun consëis sön le rovëne sigü sön strada. Implü fajará ince la polizia comunala de plü controi sön dötes les strades dl Südtirol.

Cun incö, jöbia ai 21 de ma, pó dötes les assoziaziuns scrites ite ti registri provinziai dl Ofize Chestiuns de cabinet presenté online so bilanz y les relaziuns che reverda sües ativités fates tratan l’ann. Na sauridanza poscibla por merit di sorvisc dl’eGovernment adöm cun la cherta di sorvisc o le cunt digital dl zitadin.