Atualità
Iscrizions de jené per l ann 2024/2025
Dai 8 de jené inant possa i genitores scrì ite i mutons y la mutans tla scolina. Dai 10 de jené inant possen scrì ite i sculeies y la sculées tla scola elementera, dai 15 de jené inant tla scola auta.
Mutons y mutans, sculeies y sculées che va per l prim iede d’auton dl 2024 ala scolina o te na scola nueva muessa bele unì scric ite al scumenciamënt dl ann. Aldò dla despusizions provinzieles n droa iel per l ann de furmazion 2024/2025 da se scrì ite online y l’iscrizion vën a se l dé l medemo di per la scolines ladines, tudësces y talianes.
N possa se scrì ite tla scolina dai 8 ai 16 de jené 2024. Nfurmazions n chësc cont ie da giapé sota Sorvisc | CIVIS, Iscriziun online tles scolines dla Provinzia Autonoma de Balsan-Südtirol. Dai 10 ai 24 de jené 2024 possen scrì ite i mutons y la mutans tla scola elementera. La iscrizion tla prima tlas elementera possa mé unì fata te una na scola. Tla prima tlas elementera iel da scrì ite duc i mutons y duta la mutans che cumplësc i sies ani al plu tert ai 31 d’agost 2024. Scrì ite tla scola elementera possen oradechël nce i mutons y la mutans che cumplësc i sies ani nchin ai 30 d’auril 2025. L passaje tla scola mesana vën alincontra fat de ufize.
L ie puscibl se scrì ite te na scola auta, scola prufescionela o scola tecnica (nce tl cajo de scoles privates ecuiparedes y recunesciudes) danter i 15 de jené y i 15 de fauré 2024.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red
