Atualità
La Jonta provinziela mët l focus sun l’autonomia y la segurëza
Do che i ie unii litei te Cunsëi provinziel à i cumëmbri y la cumëmbres dla Jonta provinziela prejentà ai 1. de fauré a Bulsan sibe si persona che si ciamp de lëur y cumpetënza
Cinch ie i partner de cualizion, undesc ie i cumëmbri y la cumëmbres dla Jonta provinziela, che vën inò meneda dal presidënt dla Provinzia Arno Kompatscher; ël ie bele dal 2014 incà te chësta ncëria. Doi assessëures ëiles y sies assessëures ëi ie dla SVP, una na assessëura ie dl partit di Freiheitlichen (F), un n assessëur ie de Fratelli d’Italia (FdI) y un n assessëur ie dla lista Uniti per l’Alto Adige – Lega Alto Adige Südtirol. I undesc cumëmbri dla Jonta provinziela nueva à do la vela prejentà si ncëries y si ciamps plu mpurtanc de lëur, n juebia ai 1. de fauré tla sënta dl Cunsëi provinziel a Bulsan.
L presidënt dla Jonta provinziela Arno Kompatscher à dit che la Jonta provinziela uel ti jì permez aslune ala ndesfidedes d’uni sort. Ch’sta 17ejima legislatura uel aldò dl program de guviern inò jì a se tò de reviers cumpetënzes dl’autonomia, uel inant seguré na furmazion y istruzion da gran valuta cualitativa y uel cialé che l sibe segur che i lauranc y la laurantes davanie l drët y posse avëi l muet de ruvé pra n cuatier. Inant uelun se cruzië dla segurëza tl raion publich, de arjonjer la neutralità tlimatica y n renfurzamënt de na aministrazion che sibe daujin ai zitadins, per cumpedé su mé n valgunes dla cuestions plu mpurtantes.
"La va de mëter danora tla priuriteies sibe l’autonomia che la sustenibltà. L’autonomia ie la fundamënta che pudonse manejé dut cant te na maniera che l vënie fat a puntin i nteresc de Südtirol. La sustenibltà tol ite duc i ciamps, coche Jonta provinziela ulons ndrezé dut nosc fé de viers dl Sustainable Development Goals dla Unions Unides," da coche à dit l presidënt dla Provinzia Arno Kompatscher (SVP) n ucajion dla cunferënza stampa n juebia domesdì ai 1. de fauré. Tla cumpetënzes de assessorat de Kompatscher vàl ite i ciamps de Autonomia y relazions oradecà, la Finanzes, l‘Aministrazion publica sun mesura di zitadins, i Chemuns, la Prutezion zevila y i Dërc zevii cun la medema oportuniteies.
La prima vizepresidënta dla Jonta provinziela ie Rosmarie Pamer (SVP). Coche assessëura iel te si cumpetënzes de chësta legislatura la Cuejion soziela, la Familia y l Ulentariat. Pamer dij che la possa se dé ju cun „ciamps granc y biei“, njuntan: "Nosc travert deberieda muessa vester chël de miuré la cundizions de vita dla jënt desvantajeda y de svilupé i servijes aldò di bujëns dla populazion." Tres la cunlaurazion cun d’autri ciamps possa chësc unì arjont, la se ncunfotra dassënn sun si lëur, nsci sotrissea Rosmarie Pamer.
Marco Galateo (FdI) ie sciche Pamer per l prim iede te Jonta provinziela. L sëurantol la funzion de segondo vizepresidënt dla Jonta provinziela. La cumpetënzes de Galateo ie Istruzion y cultura taliana, Cumerz y servijes, Artejanat y Ndustria. "La nes muessa jì fata de ti dé tres la furmazion permanënta n plusvalor a nosta mprejes, ajache chësa ie na bona streda per tenì la jënt te nosc raion," nscila la cunvinzion de Galateo.
Daniel Alfreider ie nce tla Jonta provinziela nueva l terzo vizepresidënt dla Provinzia nsci coche assessëur per la Istruzion y cultura ladina, la Mubltà y la Nfrastrutures. Te chësta si ncëria sëntel la gran respunsabltà per l mantenimënt dla rujeneda y cultura ladina. Coche assessëur per la mubltà y la nfrastrutura uelel mëter inant si mpëni, se mbincian de mëter n droa cun elan y forza i pruiec bele nviei via, per arjonjer i traverc metui dant. "On metù de bona fundamëntes per la ferata, dut Südtirol dessa unì cunlià. Per arjonjer dut chësc vàla de ti sauté ite te cunlauran danter i ressorc y cun la jënt dl raion, deberieda cun i Chemuns."
Philipp Achammer ie inant assessëur cumpetënt per la Istruzion y cultura tudëscia, la Inuvazion , la Nrescida, i Museums y i Bënns culturei. "L se trata de njontes scialdi beles dla cumpetënzes che é bele abù," se ralegrea l assessëur Achammer. "Nosta provinzia ie prinzipalmënter te na bona situazion,“ ma truep se à nce mudà, nëus messon nce fé vares nueves tl ciamp dla furmazion y cultura."
Per l prim iede ie Magdalena Amhof (SVP) te Jonta provinziela, coche assessëura per Europa, Lëur y Persunal. La uel ti jì do a si lëur "cun elan, pascion y legrëza." L’assessëura uel tl prim vijité la repartizion Personal, ajache la ti à ti ani passei cialà avisa al svilup dl ciamp de y ntëur al personal, judan nce pea politicamënter. "Me n sté propi bën te chësc lëur," nscila Amhof. La se trata tlo, propi sciche tl ciamp dl lëur, for de jënt. Nce te si ciamp de cumpetënza Europa se ncunfòrtela a lauré pea ativamënter pra pruiec che ie bele unii nviei via y che unirà metui a jì.
Nce Christian Bianchi (Uniti per l’Alto Adige – Lega Alto Adige Südtirol) ie per l prim iede te Jonta provinziela. Si cumpetënzes da assessëur ie Frabiché, Patrimone y Liber fundier y cataster. Per ël se tràtel de "cumpetënzes mpurtantes, ulache posse purté ite bën mi esperienzes fates nchinamò coche ambolt." L sënt la gran respunsabltà per si ciamps de lëur y uel danter l auter cialé de fé jì plu aslune la pruzedures tecnich-aministratives per l bën dl’economia dl raion y dla zitadines y di zitadins.
Peter Brunner (SVP) ie l assessëur nuef per la Scunanza dl ambient, dla natura y dl tlima, per la Energia, l Svilup dl raion y l Sport. "Ue ti jì permez a chësta ncëria plëina de respunsabltà cun truepa umltà. L ie truepa sinergies y truepa chances de chëles che la va de se n nuzé." L va debujën de n valivamënt di nteresc, n muessa tò pea la jënt canche la va de abiné y de tò dezijions, da coche sotrissea l assessëur Brunner.
Ulli Mair ie assessëura nueva cun la cumpetënzes per la Segurëza y prevenzion contra la viulënza y per l Frabiché alesirà. Per ëila iel al mumënt mpurtant de se ancunté y senté adum cun i ufizies respunsabli y cun la y i atëures de si ciamps de cumpetënza. "I ciamps muessa funziuné jan a una, perchël ulons ti cialé a chël che va bele bën, pona a chël che l ie da fé autramënter, ulache la va de jì sun stredes nueves." Prinzipalmënter ti vàla a d‘ëila de „na politica bona, realistica y sce l ie mesun nce miëura per Südtirol.“ L’assessëura Mair rata che la jirà fata, lauran deberieda.
Hubert Messner (SVP) ie unì lità per l prim iede te Cunsëi provinziel. Coche assessëur per Prevenzion sanitera y sanità uelel mëter si focus tl mëter l sistem saniter sun giames nueves. "L sistem saniter ie miëur che si reputazion, on cunlauradëures che à ti ani passei arjont treverc ora de mesura boni. Chësc messons recunëscer." L sà sambën che l ie mo cantieres danman, ma n se à bele lascià tumé ite zeche per stlù chisc cantieres var do var. Per l assessëur Messner iel priuriter a renfurzé l’assistënza y la cura daujin da cësa.
Nce Luis Walcher (SVP) ie l prim iede te Jonta. A d’ël ti iel unì dat i assessorac dla Pauraria y bòsc da una na pert y dl Turism dal’autra. "La pauraria ie n spiedl de nosta provinzia," à sotrissà l assessëur. Si doi ciamps de cumpetënza passenea bën un cun l auter, "ajache i ie la seves de nosc ncësa." Walcher vëija de gran mpurtanza de se mpenië per vester bon de ti dé da ntënder a truepa jënt de nosta provinzia cieche ie avisa la pauraria y de crì tl ciamp dl turism n bon raport de cunlaurazion y de minonga cun la jënt da tlo.
Per si prima senteda iel unì metù la ancunteda de Jonta provinziela nueva bele n vënderdì ai 2 de fauré, scumencian nscila si lëur.
Nfurmazions n con‘ dla cumëmbres y di cumëmbri de Jonta nsci coche n con‘ dl program de guviern iel da abiné tl portal web dla Provinzia https://junta-provinziala.provinzia.bz.it/lld/home. La prejentazion dla Jonta provinziela ie oradechël a despusizion sun l canal you-tube dla Provinzia. Nce sun i canai social-media (Facebook, X, Instagram y YouTube) dla Provinzia vëniel dat nfurmazions tresora n con‘ dla Jonta provinziela nueva.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/ck/dl
