Atualità
La cumpededa dla grupes de rujeneda nchin ala fin de fauré
La cumpededa dla grupes de rujeneda ie la fudamënta per truep aspec dla cunvivënza n pesc y dla scunanza dla mendranzes te Südtirol: ASTAT y Chemuns possa judé pea a fé la detlarazion.
Da n mëns incà iel bele l mesun de detlaré la purtenienza ala grupa de rujeneda, dut sot al moto "Tu contes". A de ndut 484.000 persones che sta te Südtirol ti vëniel damandà de detlaré pra ciuna grupa de rujeneda che n toca o pra ciuna che n uel se taché ite, la ladina, la taliana o la tudëscia. La cumpededa dla grupa de rujeneda ie la fudamënta per truep aspec dla cunvivënza n pesc y dla scunanza dla mendranzes te Südtirol. La à mé per dì na fazion de viers de coche l vën mpartì ite y dat ora la stieres de lëur publiches, de coche l vën dat ora i cuntribuc provinziei, de coche n ruva pra n cuatier cunvenziunà o suvenziunà, o de viers dla reprjentanza di organns colegei.
N possa detlaré si purtenienza ala grupa de rujeneda o nce mé se taché ite, se agreghé a na grupa de rujeneda. "Fé pea pra la cumpededa y detlarazion dla grupa de rujeneda ie n duvier zivich per duc i zitadins y duta la zitadines dla Talia che sta te Südtirol o che stajova tlo ai 30 de setëmber dl 2023. Chiche ëssa da se fé ert cun la prozedura, o chiche ëssa da vester melsegur possa jì pra l Ufize cumpetënt te Cësa de si Chemun o unì tlo ti ufizies dl ASTAT a Bulsan," coche stlarësc l diretëur dl Istitut provinziel de Statistica ASTAT, Timon Gärtner. Bele tl’enes passedes ti à i tecnics dl ASTAT judà a truep zitadins y truepa zitadines a scrì ora i papieresc online.
Lëtra de nvit ala populazion
Tl’enes passedes iel unì mandà ora na lëtra de nvit a uni familia, adresseda al/a pater/mater familias, cun la nfurmazions n con’ dla cumpededa y detlarazion ala grupa de rujeneda. Nscila giapa mé per dì na familia cun doi granc y doi mutons sot a 14 ani mé una na lëtra de nvit che vel per duc i cumëmbri de familia y che nvieia a fé pea pra la cumpededa linguistica. Na ezezion iel per la jëunes y i jëuni danter i 14 y i 17 ani, che giapa na lëtra a pert cun n pin persunel per la partezipazion online.
Co vàla pa a fé pea online? – Var per var
Per l prim iede possa uni zitadina y zitadin fé pea de prima persona pra la cumpededa de grupa de rujeneda tres la plata internet https://www.cumpededa-linguistica.provinzia.bz.it/. L portal online ie daviert nchin a dut l di di 29 de fauré dl 2024. Per garantì che la cumpededa reste anonima vàl debujën de generé i codesc de azes ndividuel (token y pin) do avëi azetà la nfurmatives n con’ dla privacy. Tlo vàl debujën de avëi na identità digitela SPID, na cherta dl zitadin ativeda o de na cherta d’identità eletronica CIE. Davia che token y l pin ie codesc alfanumerics, muessun cupië i codesc o i salvé ti aponc. Dala plata "Manejamënt di codesc de autorisazion (token) y password (pin)" muessun inò jì de reviers ala plata prinzipela dla cumpededa de purtenienza ala grupa de rujeneda; de regula tléchel jì de reviers ala prima scheda. Tl ciamp tlicà dant per generé l token y la password iel n segondo elemënt, plu avisa l ciamp de „Manda la detlarazion“. Sce n fej click lessù rùvun ite tl ciamp de login. L ie te chësc mumënt pona l mesun de bater ite n iede l token y pona la password. N fej pona click sun „Inant“ per ruvé ite tla plata ulache l ie pona da dé ite si grupa de rujeneda. N possa nce fé na detlarazion lasceda blancia. Tantosc che n à cris ora y n fej click sun „Inant“, vëniel ora n reassunt. La va pona de fé l click sun "Manda detlarazion" per cumpleté la cumpededa cun detlarazion de purtenienza ala grupa de rujeneda. Sce n uel iel nce l mesun de druché ora l atestat che n à fat pea. N video che spiega y n PDF iel da abiné sun la plata internet dla cumpededa linguistica.
Cumpededa analogica da auril inant
Chiche ne uel nia o ne possa nia fé online la detlarazion de purtenienza unirà cuntatà, da auril de chëst ann inant, da na cunlauradëura o n cunlauradëur nciarià/eda dl Chemun ulache n sta per scrì ora la detlarazion sun papier. Ala jënt de tëmp che viv te na cësa de paussa ti uniràl judà dal persunal a scrì ora la detlarazion de purtenienza ala grupa de rujeneda.
L ASTAT ti pieta ai zitadins y ala zitadines n sustëni sëuraprò per la cumpededa linguistica: sce n à dumandes pòssun tò su cuntat cun l call center tres l numer de telefonn 0472 973860, o tres l’adres e-mail cumpededa-linguistica@provinzia.bz.it y pra i ufizies cumpetënc di Chemuns.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/ck/dl
