Atualità
De dla memoria: ciaré ala storia por costruí le dagní
Ciaran ala storia por costruí le dagní: chësc é l’invit dl preisdënt dla Provinzia Arno Kompatscher en gaujiun dl De dla memoria.
La data de ai 27 de jená, tratan chëra che tl 1945 él gnü demolí les pontorines de Auschwitz tl 1945, é gnü detlaré “De dla memoria” por ne desmentié nia l’Olocaust. Ince tl Südtirol sciöche te döta l’Euregio vëgnel metü da jí por l’ocajiun de plü scomenciadies, danter chëstes ince le iade dla memoria cun indöt 400 jones y jogn da döta l'Euregio ala pert, tl contest dl proiet Promemoria_Auschwitz.
“Ince chësc ann sarál indô 400 jones y jogn di trëi grups linguistics dl Südtirol, Tirol y Trentin che tolará pert al iade dla memoria a Auschwitz por s’informé y studié n capitul dër tragich de nosta storia europeica”, dij Arno Kompatscher, presidënt dla Provinzia y atualmënter ince presidënt dl’Euregio. Se confronté cun le tëmp passé é dër important por i jogn, “por se engajé tres deplü por proiec de pesc y de convivënza”, ajuntëia Kompatscher. I jogn y les jones piará ia da Balsan en jöbia al 1 de forá. Dales 14.30 sarál i assessurs Christian Tommasini y Philipp Achammer che incuntará ciamó le grup tl Auditorium Haydn a Balsan. Le proiet Promemoria_Auschwitz vëgn organisé da Arci dl Trentin, da Arciragazzi da Balsan y dal Arbeitsgemeinschaft der Jugenddienste adöm cun APS Deina.
En ocajiun dl De dla memoria ti fej le presidënt a düc y dötes n invit a na reflesciun sön le tëmp passé: “Conësce la storia nes porta a tó dezijiuns plü orientades tl vers dl dagní y da investí nosc tëmp por i valurs dla pesc, dla liberté y dla democrazia”. Le Südtirol á l’obietif da ester na picera Europa tl’Europa, insciö Kompatscher, y insciö “éra damanada da se impegné por la toleranza, la solidarieté, la dignité umara y i dërc dla porsona. N sforz dessigü nezesciar atualmënter, sce an conscidrëia i svilups atuai che porta tres de plü a tendënzes nazionalistiches y populistes.”
USP
