Atualità
Brosciura nueva sun l sistem tarifer dl trasport publich
Liedesc zënza auto tl Südtirol: brosciura nueva debant cun la nfurmazions sun la rë dl trasport publich local. Da giapé tla stazions y pra la purteles.
Per l segondo ann ndolauter vëniel ora "Liedesc zënza auto tl Südtirol", la brosciura che tol ite a na maniera sistematica duta la nfurmazions sun l sistem tarifer dl trasport publich local, sun l’adurvanza dla chertes y di abunamënc sciche nce sun i dërc y i duvieres di viagiadëures. N la giapa debant pra la purteles de venduda dl Trasport ntegrà Südtirol y tla stazions dla ferata, oradechël iela ie nce da garat tla verscion online. Dala validità dla chertes singules y di abunamënc al’adurvanza di automac de cunvalideda, dal calcul dla tarifes ala chertes resservedes ai studënc y ala persones dla terza età, dal trasport de tieres a chël dla rodes: dut chël che n muessa savëi sun la curieres y ferates tl Südtirol ie da liejer te chësc pitl cudejel despunibl tla trëi rujenedes ufizieles dla Provinzia de Bulsan, uel dì per talian, tudësch y ladin.
A dì dl assessëur Florian Mussner se tratel de "mo n var inant per otimisé la nfurmazion per i passajires y per fé che l trasport publich devënte mo plu trasparënt y daujin ai utënc. N cunscidrazion dla ntroduzion dl Südtirol Pass tl 2012 y dla mudazions cunseguentes dl sistem tarifer da dant y di adatamënc y dla ntegrazions suzessives ie chësta brosciura n aiut de utl sibe per chi che se nuza uni di di mesuns publics, sibe per chëi che ne se ntopa nia drë”, dij Mussner. La publicazion ie frut dla culaburazion danter l’Agenzia per la mubiltà (ativa nchin de setëmber), la Repartizion mubiltà, l Ufize trasport persones y l Servisc de nfurmazion dl trasport ntegrà Südtirol.
USP
