Atualità
Proteziun dales lovines por la localité Ruac a Calfosch
L’istalaziun de de plü rëis cuntra le prigo dles lovines dess amplié la proteziun y la segurëza dla localité Ruac sura Calfosch tl Comun de Corvara.
“La posiziun dles ciases a Ruac é propi söi prá dan Col Pradat y te situaziuns cun tröpa nëi tratan l’invern vëgnel a se le dé plü gonot spostamënc cun tröpa nëi che mët en prigo les ciases dessot y ince i trus tle vijinanzes”, spliga le diretur dl Ofize Sistemaziun di rüs da munt y paralovines Ost Sandro Gius. Bele ti agn 90 él gnü istalé na seria de rëis de proteziun propi por smendrí chësc prigo dles lovines.
Deache al é gnü a se le dé che ti ultims agn él gnü frabiché y amplié ciases ne basta la proteziun atuala nia plü, mo ara mëss gní ampliada por garantí na segurëza de döt le teritore cuntra i movimënc de tröpa nëi y dles lovines. Chësc vëgn ince confermé dal plann dle zones de prigo dl Comun de Corvara.
L’edema da denant él insciö sté l‘Ofize Sistemaziun di rüs da munt y paralovines Ost, che fej pert dl’Agentöra por la proteziun zivila, che á metü man cun l’istalaziun de na linia de rëis nöies por indöt 60 metri. Cina la fin d’otober dess i laurs sot ala direziun de Heinz Baumgartner gní completá. L’investimënt é de söporjö 40.000 euro.
USP
Galaria dales fotografies
