Atualità
Minister Alfano indoman tl Südtirol: incuntada cun Kompatscher
Indoman sará le minister por i afars cun l’Ester Angelino Alfano en vijita tl Südtirol. Do l’incuntada cun le Presidënt sarál dales 12.15 na conferënza stampa.
Le sostëgn al’internazionalisaziun dles impreses y le svilup söla tematica di muciadus sará tl zënter dl’incuntada che le presidënt dla Provinzia Arno Kompatscher ará indoman a Balsan cun le minister por i afars cun l’Ester y dla Cooperaziun internazionala Angelino Alfano. “Ara nen jará dl sostëgn ales esportaziuns che investësc aldinfora dla Talia, dantadöt ti Paisc nia UE, mo naturalmënter ince di movimënc di muciadus do l’incuntada dl’edema da denant cun le minister austriach Kurz y do les detlaraziuns da inier al Prener”, á antizipé Kompatscher. Le Presidënt á confermé che “la situaziun al confin é sot a control ince por merit dla buna colaboraziun danter la Talia y l’Austria” y che “le problem ne é nia le Prener, mo le Mer Mediteran: degün ne pó dí che le sistem atual funzionëia cina che al gnará a se le dé milesc de morc tl Mediteran.”
Alfano sará en vijita tl Südtirol por döt le de y gnará acompagné dal Landeshauptmann tratan i aputamënc, che sará dales 10.50 tla fiera de Balsan cun n intervënt tl contest dla roadshow por l’internazionalisaziun metüda da jí dal'ICE y da Assoimprenditori. Daldo gnarál spo a se le dé n’incuntada istituzionala danter Kompatscher y Alfano. Spo él preodü detlaraziuns ai media da pert dl minister y dl presidënt,
indoman mercui, dales 12.15
tl salf stampa dla Provinzia
tl Palaz Widmann
plaza Silvius Magnago 1.
Domisdé él preodü naota n’incuntada dales 12.45 tla sënta dla Ciamena de Comerz, spo sarál le presidënt Kompatscher che acompagnará le minister Alfano a vijté döes impreses südtirolejes: dales 15.30 la Dr. Schär a Gargazon y dales 17 la firma Technoalpin a Balsan.
USP
