Atualità
Dala Junta: dezijiuns che reverda le sozial, plurilinguism, archirida
Alisiraziuns pro l’assunziun de porsones cun handicap, laboratori nüs al NOI y inglesc tles scolines talianes: les dezijiuns dla Junta da incö ai 18/07.
En aplicaziun dla lege provinziala sön la partezipaziun y inclujiun dles porsones cun handicap á la Junta provinziala definí incö ai 18 de messé i criters por la conzesciun di contribuc por l’assunziun de porsones cun handicap. “I jun inant cun le percurs legislatif che á sciöche obietif chël da passé a formes d’assistënza ala partezipaziun al laur por rové a na forma d’autonomia dles porsones cun handicap”, á dit le presidënt Arno Kompatscher. En general gnarál conzedü alisiraziuns ales porsones tutes sö te aziëndes y a colaboradus familiars cun n’invalidité zivila de almanco le 46 % o n’invalidié dl laur de almanco le 43 % por chi che al vëgn paié les cutes soziales al INPS. Le contribut reverda insciö na retüda parziala o totala dles cutes soziales aladô dla sort y dl livel d’invalidité. Danter les novités á l’assessuria Martha Stocker sotligné chëra dla dorada dla perioda de sostëgn: cina sëgn êl preodü cina a n mascimo de 8 agn, tl dagní gnarál alzé ince te n valgügn caji cina 25 agn. L’intervënt finanziar dla Provinzia, che ê sté te n pröm momënt de 1,5 miliuns de euro, é atualmënter de 5 miliuns de euro.
Implü á la Junta provinziala ince ajorné le program planivolumetrich por la pert zentrala dl Techpark NOI Südtirol. La Junta mët insciö a desposiziun 3 miliuns de euro implü dai fonds strotorai europeics por la realisaziun de laboratori nüs por ativités d’inrescida y de analisa, sciöche por ejëmpl sön les mumies y la fluidodinamica. “Chësc é le resultat de n percurs fat adöm a dötes les istituziuns y che nes conzedará da cherié y atrezé sperses aposta che podará gní adorades da düc i partners”, á splighé le presidënt Arno Kompatscher. I laurs reverda laboratori nüs da mëte a desposiziun por l’Université lëdia de Balsan, l’EURAC Research y le Zënter Laimburg. Le parch tecnologich sará davert dai 2 de otober inant.
N’atra dezijiun dla Junta provinziala é stada chëra da aprové na delibera de inciaria ala sozieté cooperativa Alpha & Beta por l’organisaziun de ativités de plurilinguism tles scolines talianes ti agn 2017/18 y 2018/19. L’investimënt complessif sará de 1,4 miliuns de euro. “Cun chësc proiet se desmostra nosc sistem scolastich tres plü plurilingual”, dij l’assessur Tommasini do la sentada dla Junta. Al se trata dl’introduziun de öna n’ora d’inglesc tles scolines talianes, olache al vëgn bele dötaurela pité ativités por s’avijiné al todësch. Le proiet reverda l’adoranza dl inglesc te dötes les scolines bele iniann sciöche esperimënt cun indöt 3500 mituns y mitans che á tut pert partis sö sön 172 seziuns.
USP
Galaria dales fotografies
