Atualità
Le calënder dl'Euregio: le Tirol, le Südtirol y le Trentin te imajes
Le calënder dl'Euregio ó ester espresciun dla colaboraziun sura i confins fora y spidl dla diversité dla contrada. Le calënder 2024 é sëgn danman y al é da ciafé debann.
Le calënder cun fotografies dl'Euregio 2024 é danman. Ince l'otava ediziun dl calënder descëda morvëia cun sü retrac dla natöra y dla contrada imprescionanc, cun consëis de escurjiuns interessantes y n iade de scoverta "pitorich" por i mëndri y les mëndres. En chësc ann á l'ofize en comunanza dla Regiun europeica Tirol-Südtirol-Trentin podü chirí fora les imajes plü adatades por le calënder dl'Euregio danter passa 2500 fotografies che é gnüdes menades ite. Les 49 fotografies che é gnüdes selezionades é gnüdes fates da 36 porsones apascionades de fotografia da dötes les perts dl'Euregio.
Tröpes de chëstes ê ince presëntes en jöbia sëra (ai 9 de novëmber) ala presentaziun dl calënder da pert dl secreter general dl'Euregio Christoph von Ach y dl diretur dl proiet Matthias Fink tla sënta dl'Euregio tl Waaghaus a Balsan. Les fotografes y i fotografs é gnüs laldá tl cheder dla manifestaziun por sü retrac demorvëia y Denise Laßnig dl Tirol dl Ost é gnüda premiada por la plata dancá dl calënder dl'Euregio.
Dala Kaiserklamm cina al Lago delle Piazze
Le calënder de fotografies 2024 mostra la gran varieté y les singolarités dla contrada y condüj tl monn afascinant dla fauna y dla flora dl'Euregio. I motifs é indô dër desfarënc y vá dal canoist tla Kaiserklamm a Brandenberg tl Tirol a fotografies imprescionantes de tiers dal Südtirol cina al Lago delle Piazze dlacé de Pinè tl Trentin. Implü él ince da ciafé de vigni sort de contrades da munt dles valades alpines altes. Por vigni sajun vëgnel ince dé consëis por escurjiuns te posc d'importanza dal punt de odüda storich y cultural. Tres n codesc QR cun chël che an röia sön la plata web dla Regiun europeica vára da ti ciaré a video informatifs sön vigni travert. Ales mëndres y ai mëndri ti pita le calënder de fotografies dl'Euregio 2024 da jí a fá n iade de esploraziun tres l'Euregio cun le variöl Tiri y süa compagna Anna. Les aventöres de trames les figöres é da ciafé tl liber da depënje dl EuregioFamilyPass.
Da ciafé debann sciöche calënder da parëi o da mësa
Le calënder de fotografies dl'Euregio 2024 é da ciafé sciöche calënder da parëi o calënder da mësa da en lönesc, ai 13 de novëmber inant tla sënta dl'Euregio tl Waaghaus söl Kornplaz a Balsan. Implü nen sarál ince zacotanc ti palac provinziai a Balsan y ai gnará spo ince partis fora te döta la provinzia tres i ispetorac forestai y les biblioteches zentrales (ciara la injunta).
Tl Trentin gnarál partí fora le calënder da parëi y da mësa dai 13 de novëmber inant tres i ofizi periferics dl'aministraziun provinziala (ciara la injunta). Implü podarán ince nen ciafé, cina che al nen sará assá, tl ofize informaziuns de Piazza Dante a Trënt y tla sënta dl'Euregio tla Casa Moggioli.
Tl Tirol pón s'aposté n calënder da parëi o da mësa scrion na e-mail a euregio@tirol.gv.at. I calëndri gnará mená por posta. An pó ince jí a se tó debann n calënder dl'Euregio tl zënter de informaziun y coordinaziun dl'Euregio a Desproch, tla Wilhelm-Greil-Straße 17. Implü nen vëgnel ince partí fora tles ferates ÖBB dl Tirol.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/jw/red
