Atualità
Ejam de ladin dl’Intendënza ladina: iscrizions nchin ai 27 de setëmber
L’iscrizions per tò per al ejam de ladin dl’Intendënza ladina ie daviertes nchin ai 27 de setëmber dl 2022. La proa scrita dl ejam ie ududa dant per mez utober dl 2022.
La nseniantes y i nsenianc che uel unì tëuc su tla graduatories per nsenië tla scoles dla valedes ladines muessa passé l ejam de ladin urganisà dal’Intendënza ladina.
L termin per dé ju la dumandes de amiscion ala segonda sescion dl ejam tl 2022 toma ai 27 de setëmber dl 2022 dala 12:00.
La proa scrita dl ejam ie ududa dant ai 17 de utober dl 2022.
La dumandes de amiscion al ejam muessa unì fates scrijan ora l formuler aposta che ie da abiné sun la plata internet dl’Intendënza y Cultura Ladina tla sezion dla zirculeres. L formuler muessa unì mandà al’Intendënza y Cultura Ladina tres email: intendenza-ladina@provinzia.bz.it o PEC: culturayintendenzaladina@pec.prov.bz.it.
Sce l ie n numer minim de 4 partezipantes/partezipanc, mët l Istitut Ladin “Micurá de Rü“ a jì cursc debant per se njenië ca al ejam de ladin sibe te Gherdëina che tla Val Badia. N possa se nfurmé diretamënter pra l Istitut Ladin “Micurá de Rü” ai numeri de telefon 0474 523110 (Val Badia) o 0471 794268 (Gherdëina), o scrì na mail a werner@micura.it (Val Badia) o erna@micura.it (Gherdëina). I cursc mët man al scumenciamënt de setëmber, n possa se scrì ite nchin ai 2 de setëmber 2022.
Nfurmazions plu avisa iel da abiné tla zirculera aposta publicheda sun la plata internet dl'Intendënza ladina.
Clican chiló röiun ala verjiun originala dl comunicat stampa por visualisé imajes, documënc o video che taca lapró
USP/red
