Atualità
Archif Quellmalz: registraziuns ladines, presentaziun ai 20 de jená
Ai 20 de jená gnarál presenté a San Martin de Tor la pröma racoiüda de registraziuns ladines dl archif de Alfred Quellmalz.
L’inrescidú musical Alfred Quellmalz, che á documenté al scomenciamënt di agn '40 la situaziun dla musiga popolara tl Südtirol, á lascé n archif che vëgn sëgn publiché y comenté scientificamënter ince por ladin. "Les registraziuns ladines tla racoiüda de Alfred Quellmalz (1940-1941). Ressonns de na cultura minoritara tl tëmp dl nazifascism tl Sudtirol": chësc é le titul dl volum trilingual cun CD publiché dai musicologs Barbara Kostner y Paolo Vinati sön inciaria y cun la colaboraziun dla seziun de musiga popolara dla Scora de musiga todëscia y ladina.
Le liber vëgn publiché ti trëi lingac dla provinzia y s’adressëia sides al publich spezialisé che ala jënt interessada ala cultura, pitan insciö a düc i grups linguistics n contribut important por l'analisa de n tëmp storich dër ri y contesté. La presentaziun dl liber sará en sabeda, ai 20 de jená, dales 18, tl Istitut Ladin Micurá de Rü, tla strada Stufles 20, a San Martin de Tor.
USP
