Atualità

USP – La vijita ala scoles ladines da pert de na grupa nternaziunela tl ciamp dla furmazion ti à dat gran crëta per realisé l’inuvazion tla furmazion de sculeies cun handicap scrita dant dala Union Europa. Ntan ancuntedes a Sarns y vijites a scoles de Urtijëi iel unì prejentà a esperc da cin nazions doi ponc stersc dla scola ladina, la metodologies de ntegrazion y l nseniamënt dla rujenedes.

USP - Ala furmazion dla persunalità y ala furmazion tl ciamp dla materies de nseniamënt ie dedicà l program nuef di cursc che vën mo dan Pasca partì ora ai nsenianc y educadëures dla scoles y scolines ladines. Sun passa 90 plates vëniel prejentà passa 90 cursc che unirà pitei danter juni 2011 y merz 2012. Sëuraprò a chisc curs, possa nsenianc dla valedes ladines nce fé pea la furmazion piteda dai dipartimënc ala furmazion dl’autra doi grupes de rujeneda.

USP – Per pudëi nsenië tla scoles ladines muessen sëuraprò ai tituli de studi nce avëi n ejam de ladin dedicà. 27 candidac ie chëst ann passei l ejam de ladin per nsenianc.

USP - Dan doi ani fovel unì spartì la ncëria da ispetëura y diretëura dla scolines ladines tres la lege provinziela nueva sun ala formazion. Chisc dis à Hannelore Insam venciù cun gran merit l cuncors per sëurandé da nuef la ncëria da diretëura. Chësta stiera cumporta la urganisazion y l svilup urganisatif per 743 sculeies cun 104 culaburadëures tla 17 scolines dla valedes ladines.

USP – Co che dëssa unì furmei i nsenianc ladins vëniel ncuei (6 auril) tratà te n cungres a Persenon. Cun chësc cunvëni vëniel festejà i 10 ani dla Repartizion ladina d’Università y i respunsabli plu auc dl’università cun l assessëur provinziel ladin à te chësta ucajion mpermetù sustëni per svilupé mo inant la repartizion ladina. Ntan l di vëniel paredlà reformes dl sistem furmatif ti raions de mendranza ujins y dat lerch à prupostes nueves che dëssa mustré su la streda dla repartizion ladina per l daunì.

USP – Tl proscimo ann de scola saral 27 sculëis de plu tla scoles autes ladines. La cumpëida generela di sculeies dala scolines nchin tla scoles autes sarà de setëmber cun de ndut 3312 sculeies, ënghe de 27 majera. L aumënt de iscrizions vën valutà dai respunsabli dla scola sciche sëni de crëta de vies dl sistem scolastich ladin cun l nseniamënt de plu rujenedes.

USP – La scolines ladines à per l proscimo ann de scola pudù azeté feter duta la dumandes da pert dla families. Tla 17 scolines dla Val Badia y de Gherdëina uniral d’autonn tëut su 743 mutans y mutons.

USP – Vën pa l’esigënzes de nosta sozietà y dla scola ladina curides cun la furmazion atuela di nsenianc? La resposta dëssa dé n cungres scientifich metù a jì n ucajion di 10 ani dla Repartizion ladina d’Università de Bulsan. Esperc de furmazion, respunsabli dl’università y dla scola ladina, deberieda cun l assessëur provinziel ladin y respunsabli da vita soziela fajerà l pont dla situazion n cont dla furmazion di nsenianc ladins. L cungres dal titul “Le ladin tl sistem furmatif” vën tenì n mierculdi ai 6 de auril tla sënta universitera a Persenon.

USP - Le numer nü dla revista AULES é dedicada ala tematica dl suzès. Ara ne se trata nia ma de suzès y insuzès scolastich, mo ince de ciamps desvalis dla vita da vigni dé. Tla revista por les scores dada fora dal’ Intendënza Ladina, él da lì tesc’ por ladin, talian, todësch y grijun.

USP - Danter i 15 proiec che ie l’ena passeda unic tëuc su da nuef tl program per frabiché scoles iel nce lëures che unirà fai tla valedes ladines. De ndut à la cumiscion per frabiché scoles dat pro n finanziamënt per 17,7 milion de euro.