Comunicat stampa

OSP - La cualità de vita per la jënt de Pruca ie da ncuei ino mieura. Cun la giaurida ai auti dl tunel nuef da pert dl Presidënt dla Provinzia y dl Assessëur ai Lëures Publics vën l luech de Pruca taià ora dala fuera, dal mpanziamët dl’aria y dal pericul sun streda gaujà dal muvimënt di auti che furnea te Gherdëina. Ncuei danmesdi, ai 22 de utober ie l tunel nuef unì mplenì da na gran cumpëida de jënt che à festejà la giaurida tan aspiteda, dan lascé passé i prim auti. Da mesdì an bele pudù furné tres l tunel nuef de 420 metri che à custà ntëur a sies milion de Euro.

OSP – N juebia ai 23 de utober uniral batù tres l terzo tunel dla streda nueva dla Val Badia. I lëures per la streda ite per la bassa Val Badia va inant drët bën. La streda, che vën nuzeda dassënn per l trasport de persones y per l trasport pesoch vën fata da nuef, slargeda y segureda da sasc che manacia de tumé jù.

OSP – Ala fin de jené 2004 uniral inò ora l liber dai cursc "Zeit für Weiterbildung". Urganisazions, lies y firmes che mët a ji manifestazions de furmazion nchin de agost 2004 tla rujeneda ladina y tudëscia, possa se mëter n cuntat cun l ufize per la furmazion nchin ai 10 de nuvëmber.

La populazion dl Südtirol crësc de 1.219 persones y ova ala fin de juni 2003 na cumpëida de 469.448 persones. Tl sgondo trimester 2003 iel unì cumpedà 11,6 nasciui sun 1.000 zitadins y 7,9 morc sun 1.000 zitadins. La cumpëida de jënt che ie ruveda adalerch de 3.033 y de chëla che se n ie jita da tlo, de 2.245, ie aumenteda permez al ann passà. Ndut ie l saldo danter chësta doi zifres, positif cun n aumënt de 788 persones.

Tl’ena danter l 20.10.2003 nchin ai 24.10.2003 tenirà i culaburadëures di Ufizies Provinziei per l Artejanat udienzes tla sëntes destachedes.

OSP - Cinch sun sies mutans dla nueva scuadra naziunela taliana dl saut ie dl Südtirol, plu avisa de Gherdëina. A Bulsan iel unì presentà la scuadra dl’ëiles cun la presënza dl Presidënt dla Provinzia de Bulsan, dl Assessëur per l turism y dl Assessëur ladin. Dal Assessorat per l turism y cuestions alpines vëniel sustenì la scuadra nueva che purterà l inuem dl Südtirol pra la garejedes nternaziuneles de saut.

OSP – L mierculidi che vën sarà n di de festa per l luech de Pruca. L presidënt dla Provinzia y l assessëur per i lëures publics giaurirà l tunel dl netreda te Gherdëina do che l ie unì laurà dassënn per doi ani. A chësta maniera unirà l luech de Pruca straverdà dal gran muvimët de auti tres si zënter

OSP - L fé su de n ITC nuef a Urtijëi ie uni dat pro dala Cumscion Tecnica Provinziela deberieda cun proiec a Bulsan, na pert nueva per l spedel de Bulsan, l fe su da nuef de na scola a Welschnofen y l renuvamënt dl Chemun de Mühlbach. Chesta decijions ie unides tëutes tla senteda dl lunesc ai 6 de utober.

OSP - Danter i ponc al orden dl di dla senteda dl Guviern Provinziel de n lunesc ai 6 de utober iel danterauter nce uni trata dla puscions dla vedla streda dla ferata ti Chemuns de Urtijëi y Sëlva.

Sciöche avenimënt dëgn da gni recordè y de gran importanza, nia ma por la Dlijia de Südtirol, mo tla medema mosöra por döt le raiun de Südtirol, definësc le Presidënt dla Junta provinziala la santificaziun dl prou da Oies, Ojöp Freinademetz, da en domënia, ai 5 de otober 2003 a Roma. Por i Ladins è chësta sambëgn ciamò na maiù ligrëza dal momënt che le Sant à dagnora dër aprijé y tignì alalt da ester n ladin. Chësta è la minunga dl presidënt dla Junta provinziala te süa relaziun injuntada.