La scolina ladina se presënta
Bënunii te nosta scolina
nscì saludons la mutans y i mutons te nosta rujeneda de l'oma tla scolines ladines
La va mé deberieda
Giaurion la streda a na bona culaburazion.
Dut chësc sënten ti raporc de partezipazion cun la mutans y i mutons, tl'ancuntedes y tl lëur cun i genitores y tla culaburazion cun i servijes spezialisei defrënc.
Viver tlo - jì ala scolina tlo
k
Renfurzé la rujeneda ladina y sustenì l plurilinguism tudësch y talian
Na carateristica de nosta atività pedagogica ie mantenì, renfurzé, y sustenì la rujeneda y la cultura ladina y de dé inant l plurilinguism coche valor.
La rujenedes de nseniamënt:
- Ladin (coche prima rujeneda)
- Tudësch y Talian (tla medema pertes)
Uniuna y uniun de nëus: n mond tl mond
i
Ntlujion y Ntegrazion
Viver uni di la ntlujion y la nterculturalità sciche esperienza de vita fej pert di valores vivui te nosta scolines ladines, chësc uel di:
- Ti dé valor a la personalità y la pruvenienza de uni muta y de uni mut, ajache i ie unics.
- Ntlujion y nterculturalità sciche esperienza de vita.
- Pité puscibiliteies de partezipazion, nseniamënt y esperienzes defrëntes tl cheder de na relazion soziela davierta.
Lerch y tëmp per sperimenté, mparé a cunëscer y fé pea
La scolina ie per la mutans y i mutons y per l personal pedagogich n post ulache n viv y n mpera.
L juech ie bonamënter l'atività plu mpurtanta tla nfanzia. L ti pieta a uni muta y a uni mut la puscibltà de ti vester ativamënter ai vares dl svilup y ala realtà dla vita. Ti dajon mpurtanza ala partezipazion y ala capazità dla mutans y di mutons de fé nstësc aldò de si età. Deberieda anjenions ca l ambient de scolina dedite y dedora.
Persones cumpetëntes y autonomes tla vita
Te nosc lëur pedagogich se tenions ala cunescënzes scientifiches nueves tl ciamp dla pedagogia dla nfanzia y dl'autra scienzes dl'educazion.
Ulon acumpanië la mutans y i mutons n tòch sun si streda cun dut nosc amor, duta nosta atenzion, dut nosc savëi y duta nosta cumpetënza.
