Manifestazions

Manifestazions
Prejentazion dl program a Maran

"Maran incunta la Ladinia" : – ligna de manifestaziuns

Aladô dl moto Maran incunta la Ladinia gnarál tigní de setëmber y otober tla cité de Maran döes edemes de evënc por promöie la conescënza dl lingaz ladin y dla cultura dla mendranza ladina. Chësta ligna de evënc importanta, a chëra che al tolará pert tröpes assoziaziuns, é gnüda presentada incö da doman (12 de messé) tl Palais Mamming a Maran dal assessur provinzial Florian Mussner, dal ombolt Paul Rösch, da Leander Moroder dl Istitut Ladin "Micurà de Rü" y dal diretur d'ofize Alexander Piccolruaz.

Le program tol ite - dal 24 de setëmber cina ai 7 d'otober - mostres, cursc de lingaz, letöres, films y spetacui che gnará tignis n pü' te döta la cité, en colaboraziun cun les uniuns da Maran y les istituziuns ladines plü importantes (la Direziun Educaziun y Cultura ladina, le Museum Ladin Ćiastel de Tor y l'Istitut Ladin Micurá de Rü).

Les Edemes culturales ladines gnará inaugurades ofizialmënter ai 24 de setëmber tl Pavillon des Fleurs cun la presentaziun dl program detaié dla ligna de manifestaziuns y n excursus cört por ci che reverda les raisc ladines dla cité de Maran. Dl'organisaziun de chëstes edemes se crüzia n grup de laur spezifich metü adöm da Planker, diretur dl Museum Ladin Ćiastel de Tor, da Felix Ploner, diretur dla ripartiziun cultra y intendënza ladina, dal diretur d'ofize Alexander Piccolruaz, da Moroder, diretur dl Istitut Ladin Micurá de Rü, dal ombolt Rösch, dal vizeombolt Andrea Rossi, dala direturia dla Repartiziun Cultura dl Comun Barbara Nesticò, da Sarah Freimuth dl Ofize Cultura, dai responsabli dla Biblioteca zivica da Maran Sonja Pircher y Umberto Massarini sciöche ince da Elmar Gobbi y Tiziano Rosani, responsabli dl Palais Mamming Museum.

A chësta ligna de manifestaziuns tolarál pert de plü artisć, auturs y musizisć ladins, l'assoziaziun Upad, le Museum dles Ëres, l'Accademia di studi italo-tedeschi, la Mediateca, le Ost-West-Club, le Lizeum artistich Cademia, les scores de lingac Alphabeta y la Merano Galoppo: en ocajiun dl Gran Pest de Maran/Untermais metará fora i artisć y les artistes che tol pert ala mostra UNIKA sües operes tl ipodrom, olache al sonará ince les musighes ladines cun passa 300 musiconc.

Program: Maran incunta la Ladinia

 

"Zacan y Incö": Mostra tl Museum Ladin

"Zacan y Incö": Mostra tl Museum Ladin
Scola elementera a La Ila 1954 /1955.Foto de Franz Vittur (Archif dl Museum ladin)

En gaujiun di 70 agn da canche al é gnü metü sö le sistem formatif paritetich ladin te Gherdëna y tla Val Badia organisëia le Museum Ladin, en colaboraziun cun le Departimënt Scora y Cultura Ladina dla Provinzia de Balsan na mostra particolara, che spliga la origina, le svilup y les particolarités de chësta scora plurilinguistica. Tres esponac chiris fora y n fi cöce storich-didatich dess chësc sistem formatif particolar ti gní porté plü pormez al publich interessé, danter l’ater ince a classes scolastiches. Ara se trata dla scora di paisc ladins, che pita da oramai setanta agn incá na formaziun plurilinguistica, tl respet dla cultura ladina tipica de chësc raiun. La mostra é curada dal diretur dl Museum Ladin Stefan Planker y da Katharina Moling.

La mostra “Zacan y Incö – Jí a scora tles valades ladines” ti vá do a n percurs storich, arichí da elemënc simbolics y documentaristics, dal mëteman dla scora tles valades ladines cina incö. Te na realté plülere marginala dles valades ladines dolomitiches ê la scora bele al mëteman oget de conflic y contrasć danter i nazionalisms talian y todësch un cuntra l’ater, zënza tigní cunt plü co intant di bojëgns y di dërc dla picia mendranza ladina.

Impormó dl 1948 án reconesciü l’insegnamënt curicolar dl ladin, ince sce ma te na picia mosöra. Le model paritetich orô presservé la balanza danter i lingac de insegnamënt talian y todësch, pitan insciö na oportunité da svilupé ince la cultura y le lingaz ladin. Chësta idea se á desmostré sterscia, portan ti ultims setanta agn ala afermaziun de na didatica plurilinguistica unica te süa sort y che á arjunt dër de bogn resultac por ci che reverda la competënza dles scolares y di scolars. Porimpó ne é le mëteman dla scora ladina nia sté saurí y á messü tigní fora les tenjiuns etniches di agn dedô cina ala secunda vera dl monn.

Na seziun é dedicada ai svilups didatics y educatifs che á caraterisé la scora ladina de vigni ordin y degré te so tru dai agn cotan movimentá dla istituziun dl 1948 cina aldedaincö, segné da de bones pratiches tla educaziun plurilinguistica integrada, tan che ara vëgn oramai odüda sciöche model de referimënt por les scores dles mendranzes linguistiches. La mostra, organisada en colaboraziun cun le Departimënt Educaziun y Cultura Ladina, é ponsada sides por les scores co ince por i interessá ince aldefora dla realté ladina y ó ester n contribut por la conescënza dla realté scolastica püch conesciüda al gran publich.

L’ alestimënt dla mostra é gnü proieté dai architec Weber y Winterle e la grafica dal Studio Mut.

 

Concurs leterar "SCRIBO"

Sostigní la leteratöra ladina, motivé i jogn da se dé jö cun la scritöra y arichí l repertoire de operes leterares ladines: chisc é i fins prinzipai dl concurs leterar “SCRIBO” (che vëgn dal latin y ó dí “iö scrii”) organisé dala Repartiziun Cultura y Intendënza ladina dla Provinzia. Le concurs é sté dediché ales döes seziuns prosa y teater.

Les operes leterares gnirá valutades dala iuria d'altonn.