La junta provinziala tles scores
Le presidënt dla Provinzia Kompatscher baia cun la jonëza dles scores altes de Sterzing. (Foto USP).
Dialogh sön l'autonomia cun la jonëza
Por ti cunté ala jonëza dla storia dl'autonomia y ti ciaré al svilup dl Südtirol tl dagní, á la junta provinziala tut la dezijiun da se incunté le pröm de de scora dl ann de scora nü cun les studëntes y i studënc de nü scores altes dla provinzia, sciöche le presidënt dla Provinzia Arno Kompatscher á dit: "Propi ajache chësc ann él l'aniversar de chisc trëi avenimënc tan importanc (100 agn dal contrat de pesc de Saint-Germain, 80 agn dal’opziun, 50 agn dal surantuta dl pachet) dla storia dl Südtirol, unse chirí aposta le contat cun les studëntes y i studënc dla scora alta. L'odlada devers dl passé pó daidé dantadöt jënt jona capí i avenimënc da sëgn. Dal'atra pert adorunse sciöche portadus dla responsabilité ince le pinsier critich de nosta jonëza."
La junta provinziala tles scores
Le presidënt dla Provinzia Kompatscher é sté tl zënter dles scores altes a Sterzing y i vizepresidënc Arnold Schuler, Giuliano Vettorato y Daniel Alfreider s'á incunté cun la jonëza tl zënter dles scores altes de Mals, tl ginase Carducci a Balsan y tl zënter dles scores altes a Urtijëi. L'assessuria provinziala Maria Hochgruber Kuenzer é jüda a ciafé les studëntes y i studënc dla scora alta profescionala Zuegg a Maran. A Balsan s'á Thomas Widmann y Massimo Bessone incunté cun la jonëza dla scora alta profescionala Max Valier y Galileo Galilei. Philipp Achammer é sté tla scora alta profescionala Durst a Porsenú. L'assessuria provinziala Waltraud Deeg á albü n'incuntada bilinguala a Bornech: iló ára baié sides cun les studëntes y i studënc de lingaz dla uma todësch dl ginase Cusanus, che cun chi de lingaz dla uma talian dl ginase Antonio Cantore.
Ai studënc y ales studëntes dla scora alta ti ál plajü le barat cun les assessuries y i assessurs provinziai. Al scomenciamënt él gnü mostré le film “Mit langem Atem” sön la storia dl'autonomia realisé sön inciaria dla Provinzia. Spo ti él gnü ciaré cun les studëntes y i studënc ales soluziuns dl quiz sön l'autonomia y al ti é gnü pité l’ocajiun por fá domandes y na discusciun. Les studëntes y i studënc s’á anuzé dl’ocajiun por fá domandes sön argomënc desvalis.
„Co pón pa vire damí le plurilinguism?", á damané na scolara de lingaz dla uma talian, che incunta tres ciamó preiudizi te Puster. O: „A ci desfidades mëss pa l'autonomia ti ester?“ Al é ince gnü baié de tematiches zities a livel politich, sciöche chëra di migranc y dla zitadinanza dopla. Tl medemo tëmp é la jonëza cosciënta dl passé. Insciö s'á valun damané ci che al nen foss sté dl Südtirol sce ara foss jüda atramënter cun la lîta dl pachet, o sce al manaciâ veramënter na vera zivila ala fin di agn 50.
Altre informazioni: http://www.provincia.bz.it/news/it/news.asp?news_action=4&news_article_id=629879
Inhalt teilen: 
