15 sorvisc, 3 band, 1 presidënt
Dales 13 – 19
Plaza Silvius Magnago

La plaza danter le Palaz Widmann, la sënta dl consëi provinzial y le palaz provinzial 2, rapresentëia le cör dl’aministraziun dl Südtirol y à da dui agn incà inom Plaza Silvius Magnago, sciöche le pere dl’Autonomia. Ai 5 de setëmber se trasformarà le post che rapresentëia simbolicamënter le podëi politich te na paladina cun trëi bands jones che à tut pert al concurs Upload che sonarà dales 16.30 sön la stiga dl consëi provinzial. Dales 13 ales 17 indere, se presentarà i 15 sorvisc provinziai che rapresentëia la gran varieté dles ativitês dl’aministraziun locala: dal’Avocatöra al’Informatica, dala Zentrala viabilité al Sorvisc meteo, dal’Euregio ai Museums, dai rüs da munt ala Proteziun zivila. Tres sön plaza Silvius Magnago saràl inće dales 17.30 la pert ofiziala dl dé dla porta daverta, cun l’intervënt dl presidënt Arno Kompatscher.

Le cör dla festa di 5 de setëmber sarà sön la Plaza Silvius Magnago, che gnarà infornida sö por l’ocajiun cun plantes y ciöfs di Urć de Ćiastel Trauttmansdorff. L’aministraziun provinziala presentarà la paleta ampla de sorvisc te de gran paiuns y na te’ picia ćiasa de lëgn fata dal’Aziënda provinziala Bosć y demane. Sön la plaza saràl inće n auto dla proteziun zivila.
Chisc é i seturs y sorvisc ti paiuns y la ćiasa de lëgn:
Paiun 1
OPERES IDRAULICHES
Sistemaziun di rüs de munt (model 5 metri lunch de n mür de arjinaziun dles eghes)
Paiun 2
AMINISTRAZIUN TRASPARËNTA
Trasparënza, sconanza di dać, finanzes, organn de valutaziun (racoiüda de domandes, domandes y arać sön l’aministraziun provinziala te na “scatora dles idees”)
Paiun 3
LEGISLAZIUN Y LINGAZ - MUSEUMS
Avocatöra, Museums
Paiun 4
METEO – PREVENZIUN DL MEDEFÜCH – INFO MOBILITÉ
Prevenziun dl medefüch, Sorvisc Meteo, Zentrala Viabilité, Info Mobilité
Paiun 5
E- GOVERNMENT
Bilinguism, Informatica
Paiun 6
EUROPA - EUREGIO
Repartiziun Europa, Euregio
Ćiasa de lëgn
AMINISTRAZIUN DE BOSĆ Y DEMANE
Aziënda provinziala bosć y demane
La Plaza Silvius Magnago se trasformarà inće te na paladina musicala. Danter les 16.30 y les 18.30 sonaràl sön la stiga dl Consëi provinzial trëi di grups musicai che à tut pert al concurs dl’Euregio “Upload”: ara se trata di Fergeby? de Balsan, di Candriù de Trënt y di Vormärz de Desproch.
Danter n conzert y l’ater, baiarà inće le Presidënt dla Provinzia Arno Kompatscher y le Presidënt dl Consëi provinzial Thomas Widmann che fajarà so discurs ofizial sön l’importanza da festejé le dé dl’autonomia y le svilup tl dagnì dl Südtirol.

Sön la plaza gnaràl inće istalè n hotspot che conzedarà da jì te internet debann cun le laptop, le tablet y le smartphone.

Co vëgn pa a s’al dè na lege
Dales 13 – 17
Consëi provinzial, Plaza Silvius Magnago 6

Inće le consëi provinzial, chël ô dì le majer organn politich y rapresentatif dla Provinzia de Balsan deura süa porta ala jënt ai 5 de setëmber. Tratan la festa dl’Autonomia podarà la jënt descurì olâ y coche na lege vëgn a s’al dè y se fà inće n’idea dl sistem aministratif che laôra do les coltrines. Denanco gnì tratà tl consëi provinzial mëss i provedimënć legislatifs fà n tru che passa tres le laûr sides di singui aconsiadus, che di ofizi competënć. Tl palaz olache al é le consëi provinzial gnaràl metü sö n percurs che jarà dal’alzada a tera ćina sö tla cuarta alzada, tres ofizi, sorvisc y carateristiches architetoniches dl frabicat. I grups di aconsiadus se presentëia inće sides te sü ofizi, che ti locai tl’alzada a tera, deperpo che la Defenüda Zivica, le Garant por l'infanzia y la jonëza y le Comitê provinzial por les comunicaziuns le fajarà te sües sëntes tla strada Cavour 23c.

Entrada alzada a tera

• Portina d’informaziun
• propostes online dl Consëi provinzial
• sënta dl Consëi provinzial inier y incö
• salfs dles sentades dles comisciuns
• afrësch de Peter Fellin
• afrësc de Siegfried Pörnbacher
• fraziun “SÜD-TIROLER FREIHEIT“
• fraziun “L’Alto Adige nel cuore”
• bar intern

Alzada a tera

• salf dl consëi provinzial
• ordinn da sentè
• cabines por la traduziun simultanea y i interpreć che laôra
• tofla eletronica
• aparać por tó sö
• afrësch de Karl Plattner

1. alzada

• ofizi dl presidënt y dl vizepresidënt dl Consëi provinzial
• secretariat general
• iter de na lege
• tribüna dl publich
• tribüna stampa y jornalisć che laôra

2. alzada

• Ofize Traduziuns
• Ofize Afars legislatifs y legai
• Ofize Aministraziun y prozedöra d’assegnaziun de n’inćiaria

3. alzada

• “Grüne Fraktion - Gruppo verde - Grupa vërda”
• fraziun “Bürgerunion – Südtirol – Ladinien”
• fraziun “Team Autonomie”
• fraziun “Movimento 5 Stelle - 5 Sterne Bewegung - Moviment 5 Steiles”
• fraziun “Partito Democratico – Demokratische Partei”

4. alzada

• fraziun „Die Freiheitlichen“
• fraziun „Südtiroler Volkspartei“

Alzada te tera

• film “Anguria o gelato?” – Ći é pa la democrazia y ći fej pa na aconsiadëssa o n’aconsiadù?

Strada Cavour 23/c

• Defenüda zivica
• ofize dl Garant por l'infanzia y l'adolescënza
• Comitê provinzial por les comunicaziuns

Sentà tla junta provinziala
Dales 13 – 17
Palaz Widmann, Plaza Silvius Magnago 1

Palaz Widmann rapresentëia la sënta dl presidënt dla Provinzia y dla junta provinziala, che s’incunta vigni dedolönesc dadoman tl salf dles sentades tla secunda alzada. Do l’esecutif porta dant le presidënt les dezijiuns plü importantes tl salf stampa dla junta, tla alzada a tera dl frabicat che à, por mirit dla curt interna, un di salfs de rapresentanza plü importanć dla Provinzia. Tratan döt le dé dla porta daverta po la jënt jì tl ofize dl presidënt, tl salf dles sentades dla junta y al sarà scomenciadies por i plü pici. I plü pici podarà jì a ti ćiarè danterlater ala zentrala litala y ala zentrala dl telefonn, y ara jarà da fà fotografies cun le sotfunz y les paladines adorà dai mëmbri dla junta provinziala tratan les conferënzes stampa.

Le Palaz Widmann, sön la plaza Silvius Magnago a Balsan, é le cör dl’aministraziun dl Südtirol, y rapresentëia la sënta sides dl Presidënt dla Provinzia, che à chilò so ofize, sides dla junta provinziala. Tramidui arà n rode zentral tratan le dé dles portes davertes.

Tl’alzada a tera dl palaz, olache la jënt gnarà saludada cun n ensemble dl Conservatore “Monteverdi”, él dantadöt les istituziuns che se crüzia di raporć cun paîsc, ënć y les assoziaziuns sura i confins dl Südtirol fora, chël ô dì l’Ofize Afars de cabinet, che presentarà tla curt interna sü proieć sön la cooperaziun al svilup.

Tl salf di spidli, tla alzada a tera, gnaràl deperpo arjigné ca dales 13 ales 17.30 na lerch por i mituns dai 3 ai 8 agn, cun n ćiantun di jüć cun musiga, aurela cörta y ativitês didatiches, organisé dal personal pedagogich dles scolines.

Tl foyer de Palaz Widmann s’incuntaràn por les vijites acompagnades tl frabicat, che piarà ia vigni 30 menüć dales 13 ales 16.30. Al gnarà dantadöt mostrè les carateristiches architetoniches y storiches dl palaz, y tla secunda alzada, olache al sarà n ater ensemble dl Conservatore “Monteverdi”, podaràm jì a ti ćiarè al ofize dl Presidënt dla Provinzia. Chilò ne podaràn nia ma ti ćiarè a n valgönes operes d’ert, mo inće al laûr da vigni dé de Arno Kompatscher, che sarà sides t’ofize che sön plaza Silvius Magnago. Le tour de Palaz Widmann jarà inant cun la vijita dl salf dles sentades dla junta provinziala, olache al gnarà mostrè n pice filmat sön i compić y le laûr dl esecutif dl Südtirol.

Le salf dles sentades dla junta provinziala sarà tl zënter dla verjiun numer 2 dla vijita acompagnada te Palaz Widmann, che gnarà fata dales 13, dales 14, dales 15 y dales 16. I vijitadus arà inće la poscibilité da se mëte tla situaziun dl presidënt o de n assessur, baié de n valgügn argomënć y scrî les deliberaziuns che toca laprò. Ala fin fajaràn le percurs che le presidënt dla Provinzia fej normalmënter le dedolönesc do la sentada dla junta: dala 2. alzada ala alzada a tera olache al podarà fà fotos cun le sotfunz y i paiuns dles intervistes y conferënzes stampa.

Monitorè tunì, ti ćiarè ai proieć
Dales 13 – 17
Palaz provinzial 2, Plaza Silvius Magnago 10

Tl palaz provinzial 2 él dui departimënć: le Departimënt Scora y Cultura taliana, Frabiché abitatif y Laûrs publics y le Departimënt Istruziun y Cultura ladina, Bëgns culturai y Museums, Patrimone, Sorvisc strades y Mobilité. Tramidui à arjigné ca por i 5 de setëmber mostres di proieć y n valgügn filmać. La jënt podarà fà n iade fora por i tunì che é tla provinzia de Balsan y vëgn monitorà da na zentrala tl frabicat.

Curt interna
Portina d’informaziun sön les competënzes y les scomenciadies organisades dal Departimënt por la Scora, la Formaziun profescionala y la Cultura taliana, le Frabiché abitatif y i Laûrs  publics y dal Departimënt por l'Istruziun y la Cultura ladina, i Bëgns culturai y i Museums, le Patrimone, le Sorvisc strades y la Mobilité.

Foyer
Tres na picia rapresentaziun vëgnel mostrè les repartiziuns di departimënć y cun modì y fotografies vëgnel mostrè i proieć. Al vëgn metü sö n stand cun dötes les publicaziuns y les brosciüres a chëres che an po ti ćiarè por conësce l’ativité dles repartiziuns y les operes ti seturs  frabiché y infrastrotöres.

Repartiziun 12 – Sorvisc strades
Te chësta ocajiun vëgnel daurì la zentrala de gestiun di tunì y splighé sciöche an ćiara dla segurëza stradala. Tl salf dles sentades 102 tla 1° alzada vëgnel presentè l’ativité dl sorvisc strades cun n film y na presentaziun powerpoint. Ti secretariać él i infopoint.

Repartiziun 11 – Frabiché y sorvisc tecnich
Tla 4° y 5° alzada vëgnel organisé cun modì y fotografies na mostra cun proieć desvalis söl frabiché. Tl auditorium vëgnel mostrè le film “Bautätigkeit in Südtirol“ (Frabiché tl Südtirol) sön operes che é gnüdes realisades ti ultimi agn y che à inće ciafè pesć.

Repartiziun 10 - Infrastrotöres
Tla pröma alzada y tl salf dles sentades 205 tla 2° alzada vëgnel organisé cun modì y fotografies na mostra di proieć dla repartiziun.

Repartiziun 6 - Patrimone
Tl salf dles sentades 405 tla 4° alzada él na presentaziun powerpoint sön les ativitês,  fotografies y material d’informaziun.

Departimënt por la Scora, la Formaziun profescionala y la Cultura taliana, le Frabiché abitatif y i Laûrs publics
Tl salf dles sentades 305 tla 3° alzada él na presentaziun powerpoint dl’ativité dl departimënt.

Departimënt por l'Istruziun y la Cultura ladina, i Bëgns culturai y i Museums, le Patrimone, le Sorvisc strades y la Mobilité
Tl salf dles sentades 507 tla 5° alzada él na presentaziun dl departimënt cun imajes.

Dötes les colaboradësses y düć i colaboradus dl palaz 2 é a desposiziun por dè informaziuns.

Ejams por fà la patent y salf dles mascinns
Dales 13 – 17
Palaz provinzial 3, Plaza Silvius Magnago 3

Le palaz provinzial 3 é la zentrala aministrativa dla mobilité dl Südtirol. Tla alzada a tera saràl na mostra de fotografies di majeri proieć realisà ti ultimi agn y le rest gnarà mostrè tles sëntes periferiches. Tl Zënter revijiun di veicui tla strada Sigismund-Schwarz, a Balsan Süd podaràn savaié da fà la patent y le salf dles mascinns dla furnadoia dl Renon romagnarà inće daverta.

La Repartiziun provinziala Mobilité se presentëia te cater posć le dé dles portes davertes, ai 5 de setëmber. Tl palaz provinzial 3, do plaza Magnago, é le personal a desposiziun cun informaziuns y consulënzes tratan döta la dorada dla manifestaziun; al é inće preodü vijites acompagnades tl palaz y tla alzada a tera vëgnel presentè i proieć plü importanć dla mobilité realisà ti ultimi agn. Implü gnaràl mostrè n video che mostra les particolaritês y le funzionamënt di bus a idrogenn.

N program rich saràl inće tl Zënter revijiun veicui tla strada Sigismund Schwarz a Balsan süd, olache an podarà savaié da fà l’ejam de teoria dla patent, ti ćiarè da daimprò ala strotöra y se fà splighé sciöche les mascinns y i aparać dla revijiun di veicui funzionëia.

Le sorvisc de portina dla Repartiziun provinziala Mobilité se presentëia te süa sënta nöia a Balsan, tla staziun a val dla furnadoia dl Renon. Al sarà  material informatif y la poscibilité da ćiarè do les coltrines dla furnadoia dl Renon, dantadöt tl salf dles mascinns.

Ai 5 de setëmber sarà inće la mobilité sön la plaza Magnago, olache la repartiziun arjignarà ca n percurs de segurëza stradala en colaboraziun cun l’ofize assistënza scolastica. Implü gnaràl mostrè da öna na pert la dotaziun dl metrobus nü cun le sistem dles chertes y dal atra pert, sciöche simbol dl svilup dl trasport local, n vedl bus dla Sasa.

Turism, merscia tët, ermo de Lasa
Dales 13 – 17
Palaz provinzial 5, strada Raiffeisen 5

Le palaz provinzial 5 é la “ćiasa” dl’economia. Tratan le dé dla porta daverta ti locai dla ex mensa provinziala tla pröma alzada gnaràl presentè na panoramica sön le svilup dl retlam tl setur dl turism, sön la nasciüda y la chersciüda dla merscia ambrela “Südtirol”, sön le monn dles cooperatives y sön l’ermo de Lasa. Inće les ćiavares y mineores fej pert dles competënzes dla Repartiziun Economia.

I ofizi tl palaz 5 ti presentëia sü sorvisc ala jënt. An ô dantadöt mostrè i svilups ti agn che al é gnü amplié l’autonomia.
Le program prevëiga n’esposiziun figurativa y grafica di sorvisc y dantadöt:

• dl svilup dl retlam dl turism ti agn;
• dla creaziun y dl svilup dla merscia tët Südtirol, la merscia de cualité y sü produć;
• dl’ativité de export;
• dl’inovaziun;
• dles cooperatives;
• dl setur ćiavares – dl ermo de Lasa y dles varietês de coltivaziun y dles presënzes geologiches.

Sön i punć zentrai dl program gnaràl inće lascè odëi n film cört.
Al po inće gnì fat na vijita acompagnada di ofizi sce an ô.

A spazier te bosch cun le Lafis
Dales 13 – 17
Palaz provinzial 6, Via Brennero 6

Le palaz 6, olache al é la Repartiziun Agricoltöra y Bosć gnaràl “ascognü” tratan le dé dla porta daverta, da n pice bosch cun lëgns metüs a desposiziun dai vivà forestai dla Provinzia. Amesa i lëgns fora jaràra da ciafè spëisa por i tiers, poms y mil, deperpo che tl palaz gnaràl mostrè le sistem informatif agricul y forestal Lafis.

Dan le palaz provinzial 6 tla strada Brennero a Balsan saràl n te’ pice bosch. N dër’ bosch: la Repartiziun Bosć mët a desposiziun i lëgns di vivas provinziai, les fotografies dl’esposiziun di bosć dl Südtirol, tiers y vicì imbalsamà. Implü saràl roll up speziai dles scores profescionales de agricoltöra y economia de ćiasa, le cufer dl zidlaês y chël didatich. Le personal dles repartiziuns dl laûr tl palaz provinzial 6 sarà a desposiziun por informaziuns y vijitedes tla sënta.

Tl frabicat él tröpes ocajiuns por capì le funzionamënt dl’aministraziun publica: sön les alzades jaràra por ej. da consultè le schedar di mêsc, odëi de pici filmać sön les tematiches tratades dales repartiziuns dl assessur Arnold Schuler y inće n valgügn sön la formaziun profescionala agrara, forestala y dl’economia de ćiasa. Al ne manćiarà sambëgn gnanca le material informatif.

Te düć i ofizi dl palaz provinzial 6 sarà le personal a desposiziun dla jënt por coriositês söl laûr dl’aministraziun publica. Le medemo fajarà l’assessur Schuler: i podëis l’incuntè y baié cun ël te so ofize dales 13 ales 17.

Cultura y formaziun zënza confins
Dales 13 – 17
Palaz provinzial 7, strada Andreas Hofer 18

Tratan le dé dla porta daverta pîta i ofizi dl palaz provinzial 7 bëgn 23 ofertes desvalies: n jüch online sön l’integraziun, na vijita acompagnada dles operes artistiches dl Ofize cultura, mostres, cursc introdutifs de fotografia, tecniches da tó sö y tröp d’ater.

SORVISC COORDINAMËNT POR L’INTEGRAZIUN

Last Exit: ći ô pa dì ester n profugh, lascè süa tera y messëi mëte man danü? Chësc é ći che i jogn proa fora te chësc jüch online. I colaboradus dl coordinamënt por l’integraziun i acompagnëia tl jüch.
Post: ofize 310
Ora: 13-17

Odëi y gnì odüs: tres i edli di profugs dl „Fischerhaus“ a Vandoies pon odëi da chësta mostra ći che al ô dì rové te n paîsc nü. Post: palaz provinzial 7, Andreas-Hofer-Str. 18
Dales: 13.00 - 17.00

Repartiziun Cultura todëscia

OFIZE CULTURA

”Arbeiten. Lavori in corso“
Descriziun: vijita acompagnada dles operes d’ert tla 3° alzada de zirca 30 menüć. Dal 2008 incà cumpra la Repartiziun Cultura todëscia, tl cheder dles mosöres de promoziun, operes de artisć dl Südtirol por documentè la creaziun artistica contemporana tl Südtirol. Zirca 270 operes de 160 artisć locai costituësc la basa de na gran coleziun metüda fora dantadöt ti locai dl’aministraziun publica. Por chi che ô nen savëi deplü saràl dan man n pice vademecum dl palaz (folder, 2014) y le dizionar dles operes (liber, 2011).
Ofize cultura, 3° alzada
Dalese 14 y dales 16

OFIZE LAÛR POR Y CUN I JOGN

Sentimënć-Cassa di libri
Na (picia) pert dl gran puzzle söl laûr de pedagogia sessuala dl Ofize Laûr por y cun i jogn en colaboraziun cun scores y laûr di jogn. Tröc sentimënć y na picia seleziun de libri cun zirca 4.320 plates.
Foyer dl Ofize Laûr por y cun i jogn, 1° alzada

Pro Memoria Auschwitz
Le iade dl recort, n proiet traversal di grups linguistics de AGJD y ArciRagazzi. Na mostra de fotografies, gestida da partezipanć ala scomenciadia, proponn sensaziuns y reflesciuns che vëgn da ti ćiarè avisa a temesc sciöche l’iniustizia, la descriminaziun y de vigni sort d’estremism.
Foyer dl Ofize Laûr cun y por i jogn, 1° alzada

OFIZE FORMAZIUN PERMANËNTA

MOSTRA AMBULANTA “Trotz – Triumph – Trauma …. eines Tirolers“
Na mostra cunta la storia de Andreas Hofer, che à pordü che al ê ćiamò dër jonn i geniturs tla Val Passiria y à messü crësce debota. Al à imparè da lì y da scrì y le talian tla Val di Non, ćina a deventè n leader politich tl Tirol do avëi fat l’ostì y le sciacher de bestiam y de vin. Do le gran suzès vëgnel la majera desfata y spo la mort. Na vita cun de bi y de borć momënć, n tru ćiamò poscibl al dedaincö? Co jìssera mo 200 agn dedô?
12 panì dl dessegnadù Jochen Gasser y dl storich y insegnant Norbert Parschalk, auturs dl liber “Andreas Hofer“ che analisëia  la conzesciun danter la biografia de Hofer y le monn contemporann. Ai inviëia a ponsè sura sön sciöche al vëgn designé y scrit la storia y cares che é les conseguënzes por la formaziun dl’identité dla porsona.
Ofize Formaziun permanënta, 1° alzada

Odëi y gnì odüs
Le fotograf Georg Hofer à vijité cun i profugs dla strotöra “Fischerhaus” de Vandoies de plü posć dl Südtirol y ti à dè n aparat da fà jö. I profugs à chirì fora, tl’otica dla fotografia partezipada, n so lingaz visif por inrescì so rode te n paîsc forest y por documentè süa manira da gnì en contat cun chësc monn nü. Che che va a ti ćiarè ala mostra po odëi le iade de descurida di profugs y mëte man da capì ći che al ô dì s’avijiné a n monn nia conesciü y ester confrontà cun so “ester forest”, so passè y l’esperiënza dl desraijamënt, sciöche inće cun ći che an à vit pro n mudamënt radical.
Coordinamënt por l’integraziun, 3° alzada
Workshop
Invit a descurì n vedl mistier y fà de pici cësć y d’atres cosses.
Ofize Formaziun permanënta, 1° alzada
Dales 14 – 17

OFIZE BIBLIOTECHES Y LETÖRA

Ći?	Descriziun	Post	Ora
„Biblioterapia“	La terapia sciöche mosöra por tratè les maraties po se concretisé inće cun i libri, canche an baia de amur, percurs de vita, aventöra, y i.i. L’espert de libri Markus Fritz ascuta i “sintoms“ y aconsiëia na “medejina“ adatada sot forma de letöres.	ofize 107	14 – 16.30
Aziun letöra por mituns	La jënt po lascè i mituns a na letöra y intratan jì a ti ćiarè al palaz provinzial.	ofize 105a	14.30 15.30 16.30 Por mituns dai 3 ai 5 agn
Tessera de letöra / Biblio24	La jënt po se scrì ite pro n pc dla Provinzia sciöche leturs dla biblioteca provinziala Teßmann y ciafè na tessera cun chëra che an po adorè biblio24, la biblioteca digitala dl Südtirol.	ofizi 108 y 104	14 – 16.45

OFIZE FILM Y MEDIA

Titul	Descriziun	POST	DORADA	ORA
Curs d’introduziun “Ćiün aparat da fà jö va pa bun?”	Na picia introduziun al monn dla fotografia: ći é pa l’esposiziun, le diaframa, l’ISO?	Salf eserzitaziun dl ofize film y media – alzada a tera	50 min.	13.30
Curs d’introduziun “Adorè la camera“	Laboratore creatif: co fà n film cört ?	Salf eserzitaziuns dl ofize film y media – alzada a tera	50 min.	14.30
Curs d’introduziun „Fà video“	Ći é pa important da fà n video?	Local di cursc	50 min.	15.30
Oasa film por mituns	Films cörć por scolars dla scora elementara y mesana dl sorvisc imprëst di media dl Ofize film y media	Imprëst media alzada a tera	tresfora	13.30 – 16.30
Proieziun de films de „Vita en movimënt“	Films fać cun material storich coiü adöm tl cheder dl proiet Interreg IV: Cité de Balsan N iade tl material privat dl Tirol y dl Südtirol Usc – na Provinzia crësc tl’autonomia	Salf eserzitaziun dl ofize film y media – alzada a tera	50 min.	Dales 13:30

OFIZE ASSISTËNZA SCOLASTICA
OFIZE PROMOZIUN DL STÜDE, UNIVERSITÉ Y INRESCIDA SCIENTIFICA

Titul: Simulaziun dl davagn y patrimone por ciafè n stipendium
Descriziun: aladô di ejëmpli vëgnel splighé sciöche an calcolëia le “davagn depuré” che é la basa por calcolè le stipendium. Dedô discusciun y domandes.
Post: pice salf dles sentades, 3° alzada
Dales: 13.30 y 15.30 por todësch – 14.30 y 16.30 por talian

Titul: Co damani pa online n stipendium por l’université?
Descriziun: le personal spliga y mostra sciöche an damana do n stipendium y é a desposiziun por domandes.
Post: pice salf dles sentades, 3° alzada
Dales: 13 y 15 por todësch, 14 y 16 por talian

Titul: Col bus a scora
Descriziun: n valgügn scolars va a scora cun i mesi dl sorvisc publich, d’atri n’à nia chësta  poscibilité. Por ëi vëgnel metü a jì n trasport straordinar. Le personal descrî coche al vëgn organisé chësc sorvisc de trasport.
Post: secretariat, ofize n. 202, 2° alzada
Dales: 13 – 17
Scomenciadia d’informaziun universitara Südtirol

Titul: reconescimënt di titui academics y profescionai arjunć foradecà
Descriziun: cun na presentaziun powerpoint vëgnel mostrè le reconescimënt di titui academics y dles abilitaziuns profescionales arjuntes foradecà da pert dl Ministêr competënt.
Post: pice salf dles sentades, 3° alzada
Dales: 15-17

OFIZE ORIENTAMËNT SCOLASTICH Y PROFESCIONAL

Titul: infoteca daverta
Descriziun: i consulënć d’orientamënt mostra le material informatif tla infoteca y spliga i contignüs. Al vëgn inće mostrè la homepage dl Ofize che contëgn informaziuns desvalies, respognü a domandes sön la formaziun scolastica, les profesciuns, le stüde universitar y descrit le desfiramënt  de na consulënza cun de plü tematiches.
Post: infoteca, 4° alzada
Dales: 13-17

Titul: Ëres y profesciuns tecnich-scientifiches (film por todësch, 15 min.)
Descriziun: jones che fej n stüde tecnich y ëres che fej na profesciun te chësc ćiamp cunta süa esperiënza. Le film cört mostra sciöche jones n’à datrai  nia le coraje da ti jì do a na cariera tecnica, inće sce al ti savess bel. Le fin de chësc film é da sensibilisé les ëres por le ćiamp tecnich-scientifich.
Post: infoteca, 4° alzada
Dales: 13.45

Titul: Ëres y profesciuns tecnich-scientifiches (film por talian, 15 min.)
Descriziun: jones che fej n stüde tecnich y ëres che fej na profesciun te chësc ćiamp cunta süa esperiënza. Le film cört mostra sciöche jones n’à datrai nia le coraje da ti jì do a na cariera tecnica, inće sce al ti savess bel. Le fin de chësc film é da sensibilisé les ëres por le ćiamp tecnich-scientifich.
Post: infoteca, 4° alzada
Dales: 14.45

Titul: Ëi cun profesciuns sozio-pedagogiches (film por todësch, 15 min.)
Descriziun: chësc film cört mostra l’esperiënza de 4 ëi che à na profesciun tipica por les ëres: n êfon, un diretur de scolina, n maester de scolina y n maester de scora elementara. Chisc profescionisć cunta de sües esperiënzes da vigni dé te süa “profesciun di soms”. Cun le film ôn fà crësce l’interès da pert di ëi por i laûrs sozio-pedagogics.
Post: infoteca, 4° alzada
Dales: 15.45

Titul: Ëi cun profesciuns sozio-pedagogiches (film por talian, 15 min.)
Descriziun: chësc film cört mostra l’esperiënza de 4 ëi che à na profesciun tipica por les ëres: n êfon, un diretur de scolina, n maester de scolina y n maester de scora elementara. Chisc profescionisć cunta de sües esperiënzes da vigni dé te süa “profesciun di somi”. Cun le film ôn fà crësce l’interès da pert di ëi por i laûrs sozio-pedagogics.
Post: infoteca, 4° alzada
Dales: 16.45

La creativité y i colloquiums de laûr
Dales 13 – 17
Palaz provinzial 8, strada Renon 13

Tl’aministraziun provinziala laôrel feter 3mile dependënć. I ofizi dla Repartiziun Personal, tl palaz 8, se crüzia de süa formaziun, so ajornamënt y so tratamënt economich. Tratan le dé dla porta daverta podaràn odëi sü dovëis, fajon n colloquium de laûr cun le diretur dla Repartiziun Personal Engelbert Schaller, o fajon na relaziun sön les tecniches de pinsier creatif.

Alzada a tera

Tl salf seminars dl palaz 8 gnaràl tignì n valgügn pici referać:

Tema: “Imparè cun tecnologies nöies“
Reladù  Hansjörg Auer – Ofize Svilup personal
Dorada: 30 menüć
Lingaz: todësch
Orar: dales 13:00 ales 13:30

Tema: „Mobbing?“
Reladëssa: Manuela Pierotti – Ofize Svilup personal
Dorada: 30 menüć
Lingaz: talian
Orar: dales 14:00 ales 14:30

Tema: „Simulaziun de n colloquium de valutaziun “
Reladù: Engelbert Schaller – diretur dla Repartiziun Personal – y n colaboradù o na colaboradëssa dla Repartiziun Personal
Dorada: 30 menüć
Lingaz: todësch
Orar: dales 15:00 ales 15:30

Tema „Tecniches de creativité“
Reladù: Hansjörg Auer – Ofize Svilup personal Dorada: 30 menüć
Lingaz: todësch
Orar: dales 16:00 ales 16:30

L’Ofize Svilup personal metarà a desposiziun publicaziuns y material cultural y formatif d’atualité.

5° alzada

Le sorvisc de prevenziun y proteziun mostrarà pro n valgügn info points i prighi lià al post de laûr: „Prigo chimich“, „Adoranza sigüda dles mascinns”, „Laûr sigü pro le videoterminal”, „Formaziun on line sön la segurëza söl laûr“.

Y implü:

I ofizi dla Repartiziun Personal presentarà i aspeć fondamentai de süa ativité y darà informaziuns sön i dać söl personal.

Adoranza dl teritore y parcs naturai
Dales 13 – 17
Palaz provinzial 11, strada Renon 4

I ofizi dla Repartiziun Natöra, Paesaje y Svilup dl raiun é tl palaz 11, te n frabicat dla categoria ĆiasaClima Or. Tratan le dé dles portes davertes sarà i dependënć provinziai a desposiziun dla jënt por sensibilisé sön le tema dl’adoranza dl raiun, sciöche inće por mostrè na mostra sön i parcs naturai y n valgügn filmać sön les Dolomites patrimone dl UNESCO.

Le palaz 11 ti corespogn al vedl ofize dla posta dla strada Renon, a Balsan, y é la “ćiasa” dla natöra y dl ambiënt. Te chësc palaz él i ofizi che se crüzia  di parcs naturai, dl paesaje  y svilup dl teritore y che deura ai 5 de setëmber sües portes mostran sü dovëis.

L’Ofize planificaziun teritoriala mët tl zënter le tema dl consum dl grunt cun proieziuns video tla alzada a tera, presentaziuns power-point  y spligaziuns da pert di colaboradus. Implü é le personal a desposiziun di vijitadus por domandes, stlarimënć y material sön süa  ativité: dal plan por les pistes dai schi ai plans d’atuaziun por i raiuns produtifs d’interès provinzial.

Inće l’Ofize Ecologia dla contrada se crüzia de consum dl teritore, y al le fej tres diagrams de de gran dimenjiuns. I colaboradus dl ofize é a desposiziun por splighé plü avisa sü dovëis y sües competënzes che tol inće ite i porti ecologics, i pra de munt y i contribuć. Al é inće preodü vijites acompagnades dl frabicat.

L’Ofize Parcs naturai presentëia na pert dla mostra alaleria söi parcs naturai y mostra na presentaziun multimediala sön les Dolomites y material didatich: dal scrin dl bosch ala scatora dles netores, ćina ales Dolomites Patrimone mondial dl Unesco. Al vëgn inće dè informaziuns sön la biodiversité, sciöche inće sön la flora y la fauna söl teritore sot a sconanza dl Unesco.

Statistiches, sanité, families… y n’intervista
Dales 13 – 17
Palaz provinzial 12, strada Canonico Michael Gamper 1

Le palaz 12 é le plü “jonn” di frabicać olache al é i ofizi dla Provinzia, y plü avisa les Repartiziuns Sanité, Politiches soziales, Familia, Laûr, Sport y Statistica, na paleta de ativitês bindebò ampla, avisa sciöche les scomenciadies por le dé dles portes davertes. Dales informaziuns sön le bonus fiscal por les restrotoraziuns ala bursa dl laûr online, dai contribuć por la nia autosufiziënza al’agenzia por la familia. Dötes chestiuns che podarà gnì aprofondides cun l’assessuria Martha Stocker, che sarà a desposiziun dla jënt por intervistes.

Düć i sorvisc tl palaz provinzial 12 sarà daverć al publich y le garage sot tera ite podarà gnì adorè debann dales 13 inant.

Entrada/Foyer
Tabela d’informaziun sön les manifestaziuns organisades.

Vijita acompagnada
I vijitadus s’incunta tl foyer, i dependënć  y i colaboradus di ofizi provinziai i acompagnëia.

Apuntamënć
“Mia intervista cun Martha Stocker“
Tó tles mans le microfonn y damana ći che t’ôs!
Les mius intervistes gnarà publicades te internet.

Departimënt – 4. Alzada
Jüch de rode sön la sanité. Ći che i ésses dagnora orü damanè – domandes y respostes sön la politica sanitara tla provinzia de Balsan (14.30-15.30 por todësch, 16-17 por talian)

Foyer
Sot le moto "Colloquium cun l’Agenzia por la familia“ presentëia les colaboradësses dl’Agenzia metüda sö da püch i proieć prinzipai y i ćiamps de süa competënza: sorvisc por l’infanzia, verda di mituns y jogn defora dal orar de scora, zëntri geniturs-mituns (ElKi) y formaziun por la familia, proieć Lëtres ai geniturs y Bookstart.

Ofizi dl’Agenzia por la familia – 2° alzada

Manifestaziuns informatives
Dorada 10-15 menüć, cun scomenciamënt vigni mesora danter les 14 y les 16.30.

Auditorium
14.00      Antizipaziuns dles alisiraziuns  fiscales– Repartiziun Frabiché abitatif

14.30       Mobilité di paziënć apostaziuns  online – Repartiziun sanité

15.00         Chirì laûr cun la börsa dl laûr eletronica – Repartiziun Laûr

15.30        Contribuć por la curida previdenziala di tëmps de cura di mituns y di familiars nia autosufiziënć – ASSE

16.00       Assëgn de cura – domanda y valutaziun dl bojëgn de cura y assistënza - Repartiziun Politiches soziales

16.30         Detlaraziun DURP – Repartiziun Politiches soziales

Salf 2.54
13 – 17     Informaziuns sön la statistica ofiziala tla Provinzia de Balsan - ASTAT

Salf 2.61
14.00        Le marćé dl laûr tl Südtirol – Repartiziun Laûr

14.30    Barometer IPL: N cheder dl clima danter i lauranć dl Südtirol –  IPL

15.00     Sistem di contribuć tl sport – Ofize Sport y promoziun dla sanité

15.30    La garanzia por i jogn – Repartiziun Laûr

16.00    Segurëza söl laûr: regoles dla formaziun por i lauranć

16.30    Azès ales unitês abitatives por jënt atempada y panoramica söl sistem tarifar varënt tles ćiases de palsa – Che paia pa ći? Repartiziun Sozial

Analises de vins, show de chimica, tour di implanć
Dales 13 – 17
Agenzia provinziala por l’ambiënt, strada Amba Alagi 5 / 35

L’Agenzia provinziala por l’ambiënt pîta süa oferta te trëi posć. La pröma é tl palaz dla strada Amba Alagi 5, olache al gnarà arjigné ca n show de chimica, an podarà analisé vins y mosoré i ćiamps magnetics di fonins. Dala strada Amba Alagi 35 deperpo piarà ia de dërtes tours fora por la zentrala eletrica de Kardaun, le termovalorisadù y l’implant de depuraziun de Balsan. Inće le laboratore biologich de Laives sarà davert por le publich.

De plü informaziuns: http://www.provincia.bz.it/agenzia-ambiente/progetti/giornata-autonomia-2014.asp

Post: strada Amba Alagi 5
Dales 13.00 - 14.00
Vijites acompagnades ti laboratori (te grups de alplü 15-20 porsones) cun i colaboradus a desposiziun por mostrè y splighé les massaries y sü dovëis.
Prenotaziun online sön la plata web dl'Agenzia ćina en mercui ai 3 de setëmber 2014: http://www.provinz.bz.it/agenzia-ambiente/progetti/iscrizioni-online.asp

Dales 14.00 - 15.00 y 16:00 - 16:45
Analisa debann sön la presënza de sostanzes y le respet di parametri de lege de ega y vin de proes portades dala jënt
Mosoraziun debann di ćiamps eletromagnetics de fonins o de pici aparać eletrics de ćiasa
Vijita acompagnada y spligaziun di tëmps che al rondenësc
Vijita de na zentrala de mosoraziun dla cualité dl’aria
Prenotaziun online sön la plata web dl'Agenzia ćina en mercui ai 3 de setëmber dl 2014: http://www.provinz.bz.it/agenzia-ambiente/progetti/iscrizioni-online.asp

Dales 15.00 - 16.00:
Show de chimica (entrada dl frabicat)
Prenotaziun online sön la plata web dl'Agenzia ćina en mercui ai 3 de setëmber dl 2014: http://www.provinz.bz.it/agenzia-ambiente/progetti/iscrizioni-online.asp

Döt le domisdé
Tla biblioteca presentaziun power-point sön l’ativité dl’Agenzia

Escurjiuns tratan le dé dles portes davertes

Prenotaziun online sön la plata web dl'Agenzia ćina en mercui ai 3 setëmber dl 2014 por chëstes   escurjiuns: http://www.provinz.bz.it/agenzia-ambiente/progetti/iscrizioni-online.asp
a) Vijita ala zentrala eletrica de Kardaun (max 15 porsones). Scomenciamënt: 13.30 y 14.45
b) Vijita al’implant de depuraziun dles eghes de Balsan  (max 15 porsones). Scomenciamënt: 13.45 y 15.00
c) Vijita al termovalorisadù de Balsan (max 15 porsones). Scomenciamënt: 14.00 y 15.15
Bus debann che pëia ia da plaza Vittoria dales 13.15 por tramesdöes les vijites
d) Vijita al implant de compost de Lana (max 20 porsones). Scomenciamënt: 14.30
Bus debann che pëia ia da plaza Vittoria dales 13.30. Al vëgn zoruch dales 16.15

Post: strada Amba Alagi 35

Destribuziun de tasces de drap
Proieziun sön l’incuinamënt lominus
Ćërcia de ega naturala
“SoundCheck" (Esperimënć sön la vera y l’aldì)
Informaziuns sön le papier reziclé
Consulënzes ala jënt da pert di ofizi  provinziai eletrificaziun, sparagn energetich, gestiun ressurses idriches, aria y vera, sconanza dles eghes, gestiun dl refodam y dl ofize aministratif dl ambiënt

Post: Laboratore biologich de Laives
Laboratore biologich de Laives, strada Sottomonte 2
Dales: 13.00 - 16.30

Vijita dl laboratore
La jënt po ti ćiarè al  laboratore, damanè i tecnics do informaziuns y fà para ativamëter pro n valgönes analises sön chisc argomënć:
Eghes de rü y lêć
Analisa microbiologica de ega da bëre y produć alimentars
Analisa al microscop de spëisa por tiers
Relevaziun dla presënza de stöp de flu tla mil y tl’aria (Sorvisc informaziun dl stöp de flu)
Relevaziun di moscoruns tigra
Analisa biologica dles eghes che va
Ecotossicologia

Ot alzades de cultura y formaziun
Dales 13 – 17
Palaz Plaza, via del Ronco 2

Tl palaz Plaza él i ofizi dla ćiasa dla cultura y dla scora taliana. Döt le dé dles portes davertes presentarà les döes Repartiziuns le calënder de sües scomenciadies culturales y formatives y mostrarà le sistem de catalogaziun adorè tles biblioteches. Ara jarà inće da desćiarié e-book y al gnarà dè informaziuns d’öga sön les sojornanzes-stüde y le reconescimënt di titui de stüde.

Foyer
Begngnü. Informaziuns y destribuziun de brosciüres d’informaziun.

Postaziuns multimediales por:

• mostrè i sorvisc online dles Repartiziuns Cultura y Intendënza scolastica y Raiun Pedagogich.
• Conësce y desćiarié la app “INFORMA SpecialeScuolaFormazione”, la revista dl Departimënt Istruziun y Formaziun taliana
• video sön les ativitês dles repartiziuns y le Raiun Pedagogich.

“Na roda al Plaza…”: dales 14, 15 y 16 vijita acompagnada di ofizi dl Departimënt Istruziun y Formaziun taliana

Dales 15.00: presentaziun dla publicaziun “Scripta manent 2013”, cun l’assessur Christian Tommasini.

Intervënt musical dl Raiun Istruziun y Formaziun Musicala “Vivaldi”

1° alzada: Ofize Cultura
Informaziuns sön la plata web dla cultura
Consultaziun y destribuziun de publicaziuns dl ofize y de DVD sön la scomenciadia  Café Philosophique y material informatif de “Nel Cerchio dell’Arte”

2° alzada: Ofize Bilinguism y lingacforesti
Informaziuns sön les zertificaziuns linguistiches dles scores y di gragn
Consulënzes por sojornanzes stüde deforadecà y contribuć
Informaziuns söl proiet “Volontariato linguistico” (Ich gebe mein Deutsch weiter y Parla con me… in italiano)

3° alzada: Ofize Sorvisc ai jogn
Consultaziun dles publicaziuns “Fairplay, Ricostituzione, Giovani in scena, LiberaMente,” catalogs de fotografies + DVD “Festival Resistenze, Camere delle meraviglie, Giovani critici, Alla scoperta della Costituzione”
Destribuziun de poster sön n valgügn proieć
Vijiun de n valgügn proieć en loop

4° alzada: Ofize Educaziun permanenta, biblioteches y media audiovisuai
Presentaziun y destribuziun dl numer nü dl boletin “Corsi&Percorsi” y informaziuns sön les ativitês dles agenzies educatives
Informaziuns y destribuziun de material sön les publicaziuns de storia y cultura locala y sön la scomenciadia “Bookstart”
Informaziuns sön co chirì tl catalogh dles biblioteches Explora y tla biblioteca digitala Biblioweb. Desmostraziun pratica: dal download ala letöra de n e-book sön n aparat mobil. Panoramica dles strotöres  bibliotecares tla provinzia y sön les ativitês de promoziun dla letöra.

5° alzada: Ofize Finanziamënt scolastich
Informaziun sön l’ativité dl Sorvisc Sport de scora y proieć sportifs dles scores; proieć de educaziun stradala; fornidöra de libri ai studënć defora dla sënta; contribut por cumprè libri tles scores altes; palestra Talvera y nodadoia Samuele.

6° alzada: Ofize Ordinamënt scolastich
Informaziun sön le reconescimënt di titui de stüde arjunć deforadecà; duplicać di diploms; ejams de stat; organns colegiai dla scora; calënder scolastich; “W il Teatro”; ativité dl ofize.

7° alzada: Direziun dl Departimënt Istruziun y Formaziun taliana y Direziun dla Repartiziun Intendënza scolastica taliana
Informaziun sön le Sorvisc Inovaziun y Best practices; City College.

8° alzada: Ofize Aministraziun scolastica
Informaziun sön la sojornanza-stüde de trëi mëisc tla Germania; organics; movimënć.
Poscibilité da fà  l’identificaziun/le reconescimënt pro le Sistem Informatich por la presentaziun dles Istanzes online dl MIUR, POLIS (al va debojëgn da stampè le formular de adejiun, de n documënt de reconescimënt varënt - le medemo tut tratan la registraziun online- cun la fotocopia dant y iadedô, dl codesc fiscal o dla tessera sanitara y na fotocopia dant y iadedô).

11° alzada: Raiun Pedagogich
Informaziun sön les ativitês istituzionales dl Raiun Pedagogich y destribuziun de material informatif.
Presentaziun dla Biblioteca dl Raiun Pedagogich.

12° alzada: Ofize Assunziun y cariera dl personal dozënt y dirijënt
Informaziun sön la gestiun dl personal scolastich; personal dozënt; assënzes; recostruziun dla cariera.
Poscibilité da fà l’identificaziun/le reconescimënt pro le Sistem Informatich por la presentaziun dles Istanzes online dl MIUR, POLIS (al va debojëgn da stampè le formular de adejiun, de n documënt de reconescimënt varënt - le medemo tut tratan la registraziun online- cun la fotocopia dant y iadedô, dl codesc fiscal o dla tessera sanitara y na fotocopia dant y iadedô).

Ert, Archif, Archeologia
Dales 13 – 17
Palaz Rottenbuch, strada Armando Diaz 8

La Repartiziun Bëgns culturai à süa sënta tl Palaz Rottenbuch, frabicat sambëgn sot a sconanza, tl cuartier Gries de Balsan. La jënt ne podarà tratan le dé dles portes davertes nia ma ti ćiarè al beliscimo palaz olache al é i afrësć dl 16ejim secul, mo podarà inće ti ćiarè a milesc y milesc de documënć dl Archif provinzial. Ai 5 de setëmber sarà inće l’archif de Frangart (via Bolzano 58) davert.

Program

Dales 13.15 14.15 15.15 16.15	Vijites acompagnades tla residënza Rothenpuech/sënta dla Repartiziun bëgns culturai, tla strada Armando Diaz 8 a Balsan y ilustraziun di dovëis dla sconanza di bëgns architetonics, artistics y archeologics por talian y todësch.
Ore 14.15 Ore 15.15 Ore 16.15	Vijites acompagnades tl depot dl archif provinzial, strada Armando Diaz 8B a Balsan, 2° alzada y ilustraziun dl’ativité dl archif provinzial.
Ore 14.30 Ore 16.00	Vijites acompagnades dl archif di reperć dl Ofize Sconanza di bëgns archeologics, tla strada Bolzano 58 a Frangart.

Consëis, quiz y l’orchestra di dependënć
Dales 13 – 17
Palais Esplanade, Piazza della Rena 10, Maran

La sënta de Maran deura sües portes ala musiga cun n’orchestra por stromënć a fle metüda adöm ma da personal provinzial. La jënt arà la poscibilité da ti ćiarè ai sorvisc tl Palais Esplanade sciöche l’orientamënt profescional y la mediateca linguistica, ara podarà tó pert a n quiz y arà la poscibilité da fà propostes y dè consëis.

Tla sënta destacada de Maran dl’Aministraziun provinziala tl palaz Esplanade él chisc sorvisc:

• Orientamënt profescional
• Mediateca linguistica
• Zënter mediaziun laûr
• Ofize raional agricoltöra de Maran
• Ofize Parcs naturai
• Staziun forestala de Maran
• Ispetorat forestal de Maran
• Direziun dla scolina taliana
• Zënter de consulënza pedagogica
• Direziun dla scolina todëscia

Le dé dla porta daverta, ai 5 de setëmber arà i vijitadus a desposiziun material d’informaziun sön i sorvisc y descriziuns di dovëis di ofizi tla curt interna dl palaz Esplanade. L’ativité dl’aministraziun gnarà inće ilustrada cun presentaziuns power point.
Le program metarà man sot le moto dal musiga por mirit dl ensemble de stromënć a fle metüda adöm en pert inće da personal provinzial dl laûr tl palaz Esplanade.
Dedô él preodü na seria de scomenciadies di ofizi:

• consulënzes
• informaziuns sön i ćiamps d’ativité (por ej. consulënza infoteca, laûr tles scores)
• conzet y modì dles scolines
• tutor di lingac tla mediateca
• proieziun de n film por inglej tl salf cinema dla mediateca, curs d’inglej por mituns tl Kids Corner.

Daìte dal’entrada po la jënt lascè alsavëi por scrit sües impresciuns y propostes: ći va pa bun, ći pon pa miorè, ći mësson pa mudé?
Implü podaràn denanco s’un jì scrì fora n formular sön i argomënć presentà, na “fadia” che gnarà spo premiada.

Dala A de agricoltöra ala V de vin
Dales 13 – 17
Villa Adele, viale Ratisbona 18, Porsenù

Tla sënta provinziala de Porsenù él n gran numer de sorvisc: agricoltöra, bosć, scolines, orientamënt profescional, mediaziun dl laûr. Tratan le dé dles portes davertes jaràra da aprofondì les conescënzes sön i sistems digitai plü moderns dl sorvisc forestal, studié les chertes di lëgns da ordöra y di vivà, s’informè sön les profesciuns desvalies, damanè fora esperć dl marćé dl laûr y jì a ti ćiarè ales direziuns didatiches dles scolines.

Ispetorat forestal de Porsenù en colaboraziun cun la staziun forestala de Porsenù

• Presentaziun dovëis prinzipai dl sorvisc forestal
• Cun ći mesi laôra pa incö le sorvisc forestal? Chertes ortofoto te na ressoluziun  alta,  GPS, y i.i.
• Presentaziun de n valgügn proieć realisà diretamënter dal sorvisc forestal: ressanamënt y sconanza di bosć, proteziun dales lovines, realisaziun de trus y percursc sön munt, cura dl bosch
• Banches dać elaborà dal sorvisc forestal sciöche stromënć de laûr: schedars de bosć, munts, mêsc, trus y i.i.
• Proieziun dl film “Der Lebensraum Wald in Südtirol“
• I dovëis dl’autorité forestala ti ćiacia y pësci

Ofize raional por l’agricoltöra de Porsenù

• Cataster dla coltivaziun de ordöra y dles plantes da üa
• Promoziun de investimënć privać tla lerch rurala (ejëmpli, fotos)

Ofize orientamënt scolastich y profescional de  Porsenù

• Presentaziun dl’infoteca dles profesciuns
• Presentaziun powerpoint dles fondamëntes dl’istruziun

Zënter de mediaziun dl laûr de Porsenù

• Le marćé dl laûr tl Südtirol te zifres (powerpoint)
• Sorvisc dl Zënter de mediaziun dl laûr

Direziuns dla scolina de Porsenù

Dovëis y modalitês de laûr dles direziuns

Film en pröma vijiun
Dales 13 – 17
Ćiasa Michael Pacher, Piazza Cappuccini 3e, Bornech

La jënt che jarà a ti ćiarè ala Ćiasa Michael Pacher a Bornech, odarà na dërta premiera. Por le pröm iade gnaràl mostrè n documentar cört sön le gran ial realisé sön inćiaria dla Repartiziun Bosć. Implü ciafaràn informaziuns plü menüdes sön les ativitês dl Ispetorat forestal, dl Ofize Sconanza dles eghes, dl Ofize Agricoltöra y dl Ofize Ćiacia y pëscia.

A Bornech é i ofizi provinziai tla Ćiasa Michael Pacher y plü avisa l’Ispetorat forestal de Bornech, cun laprò la staziun forestala, l’Ofize raional dl’agricoltöra, l’Ofize sconanza dles eghes y le Sorvisc por la ćiacia y la pëscia. Düć chisc sorvisc presentarà tratan le dé dla porta daverta sü dovëis y sües ativitês y le personal sarà a desposiziun dla jënt por domandes y coriositês.

Ai 5 de setëmber gnaràl mostrè tl salf Gilm dla Ćiasa Michael Pacher por le pröm iade n filmat de 16 menüć söl gran ial realisé da “Geosfilm” da Sanćiana sön inćiaria dla Repartiziun Bosć.

Operes d’ert di mituns
Dales 13 – 17
Palaz provinzial de Egna, plaza Franz Bonatti 2/3

La jënt che jarà a ti ćiarè al palaz provinzial de Egna podarà ti ćiarè a na mostra dër particolara. Tl frabicat él la direziun dles scolines y al gnarà metü fora operes d’ert realisades dai mituns y dales mitans. An ciafarà inće informaziuns sön i sorvisc provinziai dan man a Egna: dal laûr ai bosć, dala formaziun al’agricoltöra, dales scores al zënter di lingac.

Letöres por mituns y acompagnadus sö por munt
Dales 13 – 17
Schlandersburg, via Castel Schlandersburg 6, Solaneres

A Solaneres é i ofizi dl’aministraziun provinziala te n frabicat da na storia lungia che la jënt gnarà alsavëi tratan le dé dles portes davertes tres na seria de vijites acompagnades. Ai 5 setëmber jaràra inće da ciafè informaziuns sön i sorvisc dl’aministraziun ti seturs di bosć, dl’agricoltöra, dl orientamënt profescional, dla mediaziun dl laûr, dles scolines. Tla biblioteca gnaràl lit dant stories por mituns.

Chisc ofizi te Ćiaste Schlanderburg tol pert al dé dla porta daverta
Ispetorat forestal de Solaneres
Staziun forestala de Solaneres
Ofize raional dl’agricoltöra de Solaneres
Direziun dla scolina de Solaneres
Zënter de mediaziun dl laûr de Solaneres
Consulënza profescionala de Solaneres
Biblioteca Schlanderburg
Les scomenciadies söl program ai 5 de setëmber:

• Döes vijites acompagnades por descurì i aspeć plü importanć dla storia y dla cultura de Ćiastel Schlanderburg
• Brosciüres y material informatif de düć i ofizi a desposiziun di vijitadus
• Stand d’informaziun sön les profesciuns forestales, sciöche inće söi proieć y i dovëis dl sorvisc forestal
• Presentaziun di dovëis y dles competënzes spezifiches dl Ofize raional dl’agricoltöra
• Presentaziun di proieć y proieziun de n filmat sön les diretives dla Direziun dla scolina
• Presentaziun power-point söi dać da śëgn dl marćé dl laûr y söi sorvisc pità dal Zënter mediaziun dl laûr
• Letöres por mituns tla biblioteca