Comunicat stampa

USP – Per arjonjer na majera culaburazion danter l’Academia europieca EURAC y l’Università de Bulsan à la Jonta provinziela numinà vel reprejentanc che per tramedoi cunsëies de aministrazion. Werner Stuflesser de Urtijëi dëssa resté presidënt dl’Eurac.

USP – Nchin te doi enes, ai 31 de mei, ti vëniel a duc i ladins mo dat ucajion de mandé ite stories scrites per jëuni. I pec che unirà mandei ite per l cuncors de leteratura scrit ora dal Ufize provinziel per la Cultura Ladina unirà cialei tres da na cumiscion de esperc. Chëi che unirà valutei plu biei unirà pona publichei te n liber.

USP - Ncuei, 16 de mei scumëncia i lëures per salansé ora i tuniei sun la streda dla Val Badia. Nchin ai 21 de mei iel ntan la nuet da fé cont de pudëi me passé sun mesa larghëza dla streda.

USP – Ndependënza tl’energia, nuzé funtanes de energia nëta y segura, y n cunsum fat cun cë. Chisc ie i ponc zentrei dl pachetl de pruvedimënc prejentà (ncuei) ai 12 de mei dal assessëur Michl Laimer. La Jonta provinziela se à tëut dant truep. Laimer à detlarà che nchin tl 2050 uelen smendrì la produzion de anidrida de carbonium da 5 a 1,5 tones per persona te n ann. 90% dl bujën de energia dëssa unì curì cun energia alternativa.

USP – Tla Talia vëniel tëut demez 19.700 stieres de nsenianc ajache l mancia l finanziamënt publich. Te Südtirol iel stat mesun mantenì 7.996 stieres per l nseniamënt tla scoles elementeres, mesanes y autes, zënza scurté stieres. Tla valedes ladines ulache l ie de pitla scoles, iel per i proscimi trëi ani de scola unì garantì la cumpëida de nsenianc per pudëi pité l nseniamënt te tlasses nce cun manco sculeies.

USP - La Biblioteca provinziala Teßmann y la ciasa edituria Studienverlag inviëia ala presentaziun dl liber „Kulturelles Erbe und Tourismus“, en jöbia, ai 19 de mà dl 2011, dales 8 da sëra ta Biblioteca a Balsan.

USP – La politica europea per l’agricultura dëssa de plu tenì cont di raions da mont, valivé ora svantajes naturei y tò pruvedimënc per alimenteres. Chësc se à Luis Durnwalder sciche portausc dl cumité dla regions damandà (ncuei domesdì) ai 11 de mei a Bruxelles. La pruposta prejenteda tl Parlamënt Europeich ie unida azeteda y unirà data inant ala Cumiscion Europea.

USP – Un di plu vedli mejes documentei te dut l raion dl’Elpes ie te Gherdëina. Chësc ie unì ora da nrescides sun la datazions dendrocronologiches y dal studi sun l’architetura storica che la repartizion provinziela per i monumënc y l Museum de Gherdëina à lascià fé tl cheder di lëures per dé ora la Cherta di Mejes de Gherdëina. L conservator dla Provinzia, Leo Andergassen prejenterà i resultac di studi n vënderdi ai 13 de mei a Urtijëi.

USP - Da n valgun ani incà iel ti luesc plu alauta dl’Engiadina na scola paritetica. Da permò ie i diretëures dla scoles ladines jic a vijité chësta scola per ancunté i respunsabli.

USP – Chisc dis iel sun la stredes dl jëuf de Frea unì scumencià a museré plu avisa l deslivel. Ntan chisc lëures, che ie udui dant nchin ai 20 de mei iel da fé cont che la streda messerà uni tant unì sareda de fin o che l sarà a aspité pra n semafer.