Comunicat stampa

La Junta provinziala à aprovè incö (mertesc ai 10 de merz) le program operatif di ‚investimënć por la chersciüda y l’ocupaziun’ por indöt 136 miliuns de euro. Tla perioda 2014 – 2020 podaràl insciö gnì finanzié proieć cun les ressurses dl Fonds europeich por le svilup regional (FESR).

Söporjö 20,5 miliuns de euro é preodüs por laûrs de manutenziun straordinara dles strades statales y provinziales dl Südtirol. La deliberaziun y le program por l’ann 2015 é gnüs aprovà incö (10 de merz) dala Junta provinziala sön proposta dl’assessur Mussner. Al se trata indöt de 2.659 chilometri de rëi stradala, de 206 tunnels y de 1.662 punć.

La Junta provinziala à aprovè incö (10 de merz) na regolamentaziun nöia che reverda i jori de elicoteri te raiuns sot a sconanza. „Tres la definiziun tlera dla sort di jori, di trus de passaje aposta y de posć d’ateraje orunse smendrì le plü che ara va les conseguënzes di jori por l’ambiënt tles zones plü sensibles“, insciö l’assessur por la mobilité Florian Mussner.

I rapresentanć scolastics dl’Euregio à sotescrit incö, lönesc ai 9 de merz, a Balsan na cooperaziun por l’adatamënt di sistems de valutaziun scolastica, l’ampliamënt dla rëi dl trasport publich y l’introduziun dla materia scolastica „formaziun politica“. Le documënt de colaboraziun prevëiga implü n’incuntada anuala danter düć i rapresentanć scolastics dl Euregio.

www.14-18.europaregion.info é la misciun dl portal metü sö deboriada danter le Südtirol, le Tirol y le Trentin y che vëgn aministré dal’Euregio che reverda n’analisa storica dla Pröma Vera Mondiala y de sües conseguënzes por nüsc raiuns. Tla seziun „Let’s talk“ vëgnel insciö presentè vigni mëis na tematica nöia: por le momënt nen vara dl Monumënt ala Vitoria de Balsan.

En mertesc ai 10 de merz ne n’él degöna conferënza stampa dales 12.30 do la sentada dla Junta provinziala deache al é preodü na sentada de prescia dl Consëi regional a Trënt. La Junta provinziala s’incuntarà porchël por süa sentada edemala a Trënt.

Les iscriziuns por l’inserimënt tles gradatöres provinziales nöies, por la re-ejaminaziun di punć por les gradatöres „a esaurimënt“ y por l’inserimënt tles gradatöres d’istitut por l’ann de scora 2015/16 mëss gnì dades jö ćina les 12:00 ai 8 de aurì pro l’Intendënza ladina a Balsan.

La CD „Gejù cun tè poi crësce“ é na racoiüda de ćianties religioses metüda adöm dales scolares y dai scolars dla 5a tlassa dla scora elementara da La Val dl ann passè sot la direziun musicala de Veronica Rubatscher. Le resulat final, dè fora dal Ćiamp Inovaziun y Consulënza dl Departimënt Educaziun y Cultura Ladina, gnarà presentè en vëndres, ai 13 de merz, dales 16:00 tla dlijia da La Val.

Al é indöt 400 studënć y studëntes dl Universitês y dles scores altes che à presentè na domanda por un di 200 posć a desposiziun por practicums da d’isté. „L’Ofize Assunziuns Personal – sotlignëia l’assessuria Waltraud Deeg – é tl valuté dötes les domandes, y ćina la fin dl mëis de merz saràl düć che ciafarà na resposta por email.“

Incö (jöbia ai 5 de merz) él gnü tignì a Roma n’incuntada dl Fonds di comuns confinanć cun le presidënt Arno Kompatscher en rapresentanza dla Provinzia de Balsan: la tematica prinzipala é stada, dlungia i proieć da finanzié, la realisaziun de n program ampl che reverda dantadöt l’internet aslöm.