Scora / Cultura | 10.06.2004 | 17:30

I assessëures n cont dla fin dl ann de scola

USP – N bel instà y de bela feries mbincia i trëi assessëures ala scoles Florian Mussner, Luisa Gnecchi y Otto Saurer a duc i mpeniëi tla scoles te si tëuta de posizion per la fin dl ann de scola. Te chësta ucajion vëniel nce fat vel riflescion sun l svilup dla scola tl Südtirol.

“La fin dl ann de scola ruva tl tëmp de doi mumënc storics: per l Irak vën sù speranza de pesc y l’Europa ie da permò deventà l ncësa per truepa milion de persones cun na gran varietà de cultures y valores” scrij Mussner, Gnecchi y Saurer. A duc chëi che se da jù cun la scola tl Südtirol – dala sculees y sculeies ai nsenianc, culaburadëures y genitoresc – dëssel n ucajion dla fin dl ann de scola unì mustrà recunescënza. La scola ne ie bele da n pez nia me plu luegia ulache l vën me dat inant cultura y savëi, ma na istituzion che sënt la repunsabltà che i jëuni madurësc y devënte granc cun na identificazion ti valores de basa sciche la stima y l respet per la cultura y l savëi, l se mpenië, mparé for velch leprò y l respet de viers de chëi che la pënsa autramënter.

“Chësta ie la streda che la scola fej bele dai ani: l vën fat l puscibl a na maniera che duta la pusciblteies che pieta l’autonomia dla scola vënie nuzeda per eduché i jëuni a deventé granc cun na persunalità critica y davierta al mond“, nscì la minonga di trëi assessëures provinziei ala scola. N auter pont zentrel dla scola tl Südtirol ie l mparé rujenedes: „L savëi de plu rujenedes dà la puscibltà ai jëuni de dé esprescion a si cualiteis, bujëns y particulariteis cultureles tl mond dal didancuei“, sorissea Mussner, Gnecchi y Saurer.

La scola muëssa uni di se dé da fé per tenì l var cun i tëmps dla sozietà y per abiné metodologies nueves. Chësta mudazions se damanda che i nsenianc vede for inant cun la furmazion didatica. “Per savëi da se tò i sculeies iel uni di debujën de gran senisibltà, me a chësta maniera iel puscibl se deriejer tla sozietà de gran dimenscion y de gran mudamënc”, scrij i assessëuers.

“I mesuns finanziei che ti vën metui a desposizion ala scola dl Südtirol ie de gran mesura. Per pudëi fé duc i duvieres dla scola iel debujën dl mpëni de duc chëi che toca leprò“ dij i trëi assessëurs ala scola. Mussner, Gnecchi y Saurer fina via si scrit mbincian a duc i mpeniei tla scoles n bel instà y de bela feries.

USP

Galaria dales fotografies