Val Badia: al vëgn taié lëgns tratan trëi fins dl'edema, strada stlüta
Al vëgn taié jö lëgns tl bosch de proteziun danejé dlungia la strada statala dla Val Badia ai 25-26 d'aurí, 9-10 de ma y 16-17 de ma - Al vá debojëgn da stlü la strada te deplü toc
BORNECH/SAN LAURËNZ/MAREO/SAN MARTIN DE TOR (OSP). De gran sperses de bosch sön les tëmples dër ërtes tla Val Badia, olache an ne röia nia pormez saurí, dantadöt tl raiun de bosch da Plaies, é gnüdes danejades dal chefer dla scorza. I laurs reverda dui toc, un vá da Mantëna Todëscia tl comun da San Laurënz cina Longega tl comun de Mareo y l’ater é danter Longega y Picolin tl comun da San Martin de Tor. Chësc bosch é n bosch de proteziun, chël ó dí che al tëgn sö peres y pedruns che broderëia jö y smendrësc insciö le prigo por i auti sön la strada dla Val Badia dessot. Ajache i lëgns é gnüs danejá cotan dal chefer dla scorza é sëgn la funziun dl bosch de proteziun dër limitada.
Danter la fin d'aurí y mez ma gnarál porchël fat da na dita spezialisada tl taié jö lëgns i laurs de desboscamënt che vá debojëgn pian ia dales sperses plü prigorores. I proprietars dl bosch inciariará da fá i laurs de desboscamënt che gnará coordiná dal'autorité forestala (OSP á reporté).
"Sëgn mëssel gní smendrí le prigo por la strada", sotrissëia le diretur dl Ispetorat forestal da Bornech Wolfgang Weger: "I lëgns taiá jö vëgn condüc demez da chësc raiun cun le jolier y condüc te posc arjigná ca aposta. Na picia pert romagn sön la spersa sot forma de lëgns taiá daliaicá por aumenté le grou de suraspersa y sciöche proteziun da peres y lovines che podess gní jö." I lëgns taiá daliaicá é taies che vëgn metüdes aposta daliaicá sön la tëmpla y fej da bariera. Implü é la lëgna morta n habitat de valüta por la biodiversité y important por na reforestaziun plü asvelta.
Te na incuntada dl'autorité forestala cun i patruns di bosc y i rapresentanc di comuns atocá de Mareo y San Martin de Tor, ai 14 d'aurí, ê düc a öna che al mësses gní fat val', cunta Gottlieb Moling dl Ispetorat forestal da Bornech.
Do avëi stlüt jö i laurs tratan les trëi fins dl'edema, gnarál valuté sce al vá ciamó debojëgn da lauré ciamó n‘atra fin dl'edema o da d'aisciöda o da d'altonn.
mac/it
