De dl Lingaz dla Uma: scores ladines á festejé diversité linguistica
En ocajiun dl De Internazional dl Lingaz dla Uma, che é gnü festejé ai 26 de forá, realisé deplü iniziatives cun le fin da reconësce, valorisé y zelebré la richëza linguistica te scora
BULSAN (USP). En ocajiun dl De Internazional dl Lingaz dla Uma, che é gnü festejé ai 26 de forá 2026 (impede ai 21 de forá, che foss stada la data ofiziala), á les classes che fej para pro le proiet “L’Altroparlante – Usc che se liëia”, metü a jí dal Ispetorat por le plurilinguism y dal Sorvisc por l’inclujiun dl’Intendënza Ladina, en colaboraziun cun l’Universitá per Stranieri di Siena, realisé deplü iniziatives cun le fin da reconësce, valorisé y zelebré la richëza linguistica te scora.
Te deplü scores mesanes dla Val Badia y de Gherdëna s’á les insegnantes y i insegnanc che tol pert al proiet ponsé fora ativités desvalies, sciöche n’inrescida anonima sura le lingaz dla uma dles scolares y di scolars, cun i resultac che é gnüs metüs fora te porte de scora, o la registraziun de audios ti tröc lingac baiá dales mitans, dai mituns y da sü geniturs. D’atres classes á lauré sön dic y espresciuns ti lingac y dialec desvalís o fat para pro na archirida dl tesur linguistica te biblioteca.
Te d’atres classes s’á l’iniziativa concretisé tres la realisaziun de n bingo y de n’ativité d’intercomprenjiun. Implü, á vigni scolar o scolara cherié süa silhouette linguistica y podü l’arichí cun parores, espresciuns y lingac che fej pert de süa storia personala; les silhouettes anonimes é spo gnüdes tacades fora ti porti sciöche rapresentaziun concreta dla richëza linguistica che é te scora.
Dötes chëstes ativités ti á pité a mitans y mituns n’ocajiun importanta por fá na reflesciun sön le significat dl lingaz dla uma y sön les tröpes dimenjiuns che chësc conzet tol ite.
“I ún podü odëi cun ci entusiasm y devertimënt che les mitans y i mituns se dá jö cun sü lingac y cun chi che é nüs por ëi. Al é important che la scora valorisëies döt le repertore linguistich di scolars y dles scolares, trasforman i lingac de familia te ressurses cognitives y relazionales”, á dit l’Ispeturia por le plurilinguism Claudia Rubatscher.
“Le De dl Lingaz dla Uma é sté n’ocajiun importanta por promöie te scora n clima davert, inclusif y che ti dá lerch a dötes les identités linguistiches, renforzan la cosciënza dla diversité linguistica sciöche patrimone cultural de düc”, á injunté la Referënta por l’inclujiun dles scores dles localités ladines Elena Pellegrini.
red
